Nog adres

27 октябрь - Автомобилон транспорты кусджыты бон/ РАЙГОНД СÆ СТЫ БÆЛЦЦÆТТÆ

Бæлццæттæ ласæн автотранспорты шофырты хæс у цæрджытæн лæггад кæнын. Уый хорз æмбары нæ республикæйы автомобилон транспорты управленийы разамынад æмæ архайы, цæмæй сæ бæлццæттæ уой райгонд. Шофырты 'хсæн хорз æвæрд у фæллойадон дисциплинæ, æмæ кæддæриддæр сæ рейсты ацæуынц рæстæгыл. Кæй зæгъын æй хъæуы, æнцон нæу шофыры куыст, домы цырддзастдзинад æмæ культурон ахаст бæлццæттæм. Раст у, бæрæг аххосæгтæм гæсгæ хатт æвзарынц зындзинæдтæ, фæлæ уæддæр уыцы къуылымпытæ ницæмæ даргæйæ, кусынц цæсгомджынæй.

Автостанцы бæстыхай у зæрдæмæдзæугæ, бæлцæттæн ис, мæгуырау боныгъæдты сæхи кæм бааууон кæной, кæм æрулæфой, ахæм бынат. Къулыл зынæн ран конд у, республикæйы районтæ æмæ хъæутæ, стæй Дзæу-джыхъæумæ цы рейстæ цæуы, уыдон график. Управленийы эксплуатацийы хистæр Зассеты Лев куыд загъта, афтæмæй куыстуаты æдæппæт нымадæуы 45 алыгъуызон маркæ автобусы. Цух не сты шофыртæй дæр æмæ сæ алчи дæр йæ куыстмæ рацæуы рæстæгыл.
Раздæр азты дæр коллективы дзæвгар уыд, йæ хъуыддагмæ бæрндзинады цæстæй чи каст, иузæрдион ыл чи уыд, ахæм шофыртæ. Уыдонæн стыр кад уыд куыд коллективы, афтæ цæрджыты 'хсæн дæр. Ахæмтæ уыдысты управленийы раздæры шофыртæ Бæззаты Славик, Болататы Хетæг æмæ æндæртæ. Хистæр фæлтæры хорз традицитæ дарддæр намысджынæй æххæст кæ-нынц, абон дзы чи фæллой кæнынц, уыдон. Сæ нымæцмæ хауынц Тедеты Еврик, Тыбылты Таймураз, Тадтаты Уы-рызмæг, Хуыбылы фырт, Цхуырбаты Нодар æмæ иннæтæ.
Зæгъын хъæуы, раздæрау рейсон автобустæн фаг бæлццæттæ кæй нал ис, фылдæр хатт, зæгъæн ис, æмæ афтидæй дæр кæй фæцæуынц. Уый уымæн, æмæ арæх кæй пайда кæнынц хисæрмагонд машинæтæй, стæй ма нæ хъæутæ адæмæй кæй стæнæг сты. Фæлæ уæддæр, уыдæттæм æнæкæсгæйæ, рейсон автобустæ æмбæстæгты раз æххæст кæнынц сæ хæстæ.
Ныртæккæ цасдæр фенцондæр куыд шофыртæ, афтæ цæрджытæн дæр, горæты сæйраг уынгты иу хай арæзт кæй фесты, уымæй. Афтæ ма, хæрзвадат фæндæгтæ сырæзт Цхинвалæй Знауырмæ, Дзаумæ æмæ Дменисмæ. Фæ-лæ афтæ зæгъæн нæй Къуайсайы горæт æмæ республикæйы иуæй-иу хъæуты тыххæй. Уымæ гæсгæ транспорт хæлы, ивæн хæйттæ ссарæн та бынаты нæй. Цæуын сæ бахъæуы Ростов æмæ Уæрæсейы æндæр горæттæм æмæ сæ хæрдзтæ слæууынц дзæвгар. Зассейы фырт куыд банысан кодта, афтæмæй сын нæ хицауад ныфс бавæрдта ног автобустæ балхæнынæй. Уыдон кæд ацы аз нæ, уæддæр фидæн аз æнæмæнг райсдзысты æмæ ноджы хуыздæрæрдæм фæзындзæн сæ куыстыл. Стæй уыдзысты, сæ ивæн хæйттæ Дзæуджыхъæуы ссарæн кæмæн уа, ахæм автобустæ. Управленийы автобустæй чи фехæлы, уыдон цалцæг кæ-нынц ЦАРЗ-ы заводы. Ам ис цалдæр æрмадзы, кусы дзы 6 слесары æмæ дзы цалцæгкæнинаг цы автобустæ вæййынц, уыдон куыстæввонг æркæныныл бацархайынц зæрдиагæй.
Мах дæр нæ газеткæсджыты номæй зæрдиаг арфæ кæнæм РХИ-йы автомобилон транспорты управленийы коллективæн сæ бæрæгбоны цытæн æмæ сын зæгъæм иууыл хуыздæр фæндиæгтæ сæ зын, фæлæ хæрзиуæгон куысты. Кæддæриддæр рæсугъд фæндæгтæ уæ хай æмæ уыл бæлццæтты хорз арфæтæ цæуæд!
ХУЫБИАТЫ Никъала