Nog adres

Хуынд æрцыдысты тренингтæм Дзæуджыхъæумæ

Хуссарирыстойнаг дохтыртæ хайад исынц бирæнымæц травмæты рæстæджы экстренон æнæбафæстиат æххуыс бакæныны фæдыл семинарты. Тренинг «Уæззау цæфты рæстæджы дохтыры экстренон архайдтытæ» уагъд цæуы Дзæуджыхъæуы Сырх Дзуары Дунеон комитеты хирург Энзо Кемеллойы къухдариуæгадæй æмæ Цæгат Ирыстоны паддзахадон медицинон академийы минæвæртты фарсхæцынадæй.
Æнæниздзинад хъахъхъæнын æмæ социалон политикæйы фæдыл парламентон комитеты сæрдар Плиты Александр куыд фехъусын кодта, афтæмæй Хуссар Ирыстонæй семинарты хайад исынц Республикон соматикон рынчындоны дохтыртæй æртæйæ.

«Семинартæ уагъд цæуынц 22 октябрæй 25 октябрмæ политравмæты хайады базæйыл, кæцы байгом ивгъуыд аз Дзæуджыхъæуы Республикон клиникон рынчындоны. Хуссар Ирыстонæй семинарты хайад исынц Республикон соматикон рынчындоны терапевт Джиоты Моника, реаниматолог Харебаты Женеттæ æмæ травматолог Константин Серветник», - фехъусын кодта Плиты Александр.
Уый куыд загъта, афтæмæй тренингты системонæй амынд цæуы бирæнымæц цæфты рæстæджы экстренон æнæбафæстиат æххуыс бакæныны фæдыл фæлтæрддзинад, кæцыйæн ис стыр аргъ дохтырты дарддæры куысты.
Сырх Дзуары Дунеон комитеты семинартæ уагъд цæуынц 2001 азæй. Ацы аз сæ хайад исынц 44 специалисты Цæгат Кавказы республикæтæй æмæ Хуссар Ирыстонæй.