Nog adres

2008 АЗЫ АВГУСТЫ КАВКАЗЫ КОНФЛИКТТЫ «РАЙХЪАЛ КОДТА» СААКАШВИЛИ

Паддзахадон арæныл хизын æмæ режимы фарстатæ хауынц æрмæстдæр Цхинвал æмæ Сухумы хицауадты компетенцимæ, сæ паддзахадон æмæ националон суверенитет фидар кæныны закъонон бартæм гæсгæ. Уый тыххæй æрæджы Венæйы ЕÆÆО-йы Æдзухон советы рабадты хъусын кодта ЕÆÆО-йы цур Уæрæсейы æдзухон минæвар Андрей Келин, - уый хъусын кæны УФ-йы Фæсарæйнаг хъуыддæгты министрады официалон сайт.
Келины ныхæстæм гæсгæ, Уæрæсе æнæхъæнæй хорзыл нымайы Гуырдзыстонимæ Абхаз æмæ Хуссар Ирыстоны арæнты стабилондзинады. Йæ хъуыдымæ гæсгæ, уый у Инциденттæ ма æруадзын æмæ сæм рæстæгыл хъус æрдарыны механизмты куысты фæстиуæг. «Уыимæ иумæ мах бындурондæр разы не стæм Хуссар Ирыстоны уæвæг уæрæсейаг арæнхъахъхъæнджыты аххосджын кæныныл æмæ сын сæ куыстæн аргъ кæныныл. Уыцы ныхæстæ не сты регионы ног политикон реалитæн æмбæлон», - бахахх кодта Келин.

Дипломат банысан кодта, зæгъгæ, Хуссар Ирыстоны арæнгæрон режим у æдасдзинады æнæатонгæ хай, Гуырдзыстонимæ паддзахадон арæны иуæй-иу фадгуыты, бынаты арæны хахх банысан кæныны тыххæй, инженерон куыстытæ та кæнынц хуссарирыстойнаг арæнхъахъхъæнæг службæтæ ахæм бынæтты, цыран тас у бынæттон цæрджыты ‘рдыгæй æнæзакъонæй арæны режим халынæн.
«Дыууæ паддзахады 'хсæн иумиаг арæны 391 километрæй дзырд цæуы дæсгай километртыл, æмæ гуырдзиаг фарс уый хорз зоны. Уæрæсейаг арæнхъахъхъæнджытæ æххæст кæнынц æрмæстдæр уыцы хæслæвæрдтæ, кæцыты тыххæй сæм бахатынц сæ хуссарирыстойнаг коллегæтæ, паддзахадон арæны иумиаг тыхтæй хъахъхъæныны тыххæй 2009 азы дыууæфарсон сразыдзинады бындурыл», - зæрдыл æрлæууын кæнынæн загъта Келин.
Уæрæсейаг æддагполитикон ведомствойы минæвар дарддæр загъта, зæгъгæ, хуссарирыстойнаг фарсы мадзæлттæ паддзахадон арæны инженерон æгъдауæй схæрзарæзт кæныны фæстиуæгæн здæхт сты, фыццаджыдæр, инциденттæ фæкъаддæр кæнынмæ, кæцытæ баст сты дыууæ фарсы бынæттон цæрджыты æнæрхъуыдыйæ арæны фæтк халыны цаутимæ.
«Уый къулы арæзтад нæу, фæлæ у æрмæстдæр паддзахадон арæны иуæй-иу рæтты банысан кæнын. Кæм бетонон блоктæ æвæрд цæуынц, кæм цæджындзтæ кæнæ тел ивæзт цæуы. Уый фæстиуæгæн иуварсгонд цæуы фактор, кæцы арæнгæрон æвзæрын кæны æндыгъддзинад. Бæрæг у, арæныл дихгæнæн арæзтадтæ райдайынæй бæрæг фæкъаддæр æнгæс инциденты нымæц. Кæд раздæр нысан цыдысты бон дæсгай æнæзакъонæй рахизыны цаутæ, æмæ-иу адæймæгты бахъуыд æрцахсын, уæд июлæй сентябры онг нысан æрцыд æрмæстдæр 38 цауы, уымæй дæр фæткхалджытæ æрмæстдæр цыдысты фæдзæхст кæнæ та символикон ивар уырыссаг сомтæй (50 евройы бæрц). Æндыгъддзинад фæкъаддæр кæныны факт бæрæг у, уыцы нымæцы йæ банысан кодта Гуырдзыстоны Евроцæдисы Мониторингон мисси Женевæйаг дискусситы», - банысан кодта дипломат.
Хуссар Ирыстон æмæ Абхазы минæвæрттæ куыд дзырдтой, - дарддæр дзырдта уый, - афтæмæй сыхаг бæстæтимæ арæны режим хъахъхъæнын у регионы бынæттон цæрджыты æдасдзинад æмæ стабилондзинад бахъахъхъæныны æнæфæивгæ домæн.
«Уыимæ иумæ ма уыдон ноджыдæр бафидар кодтой дыууæ республикæйы цæттæдзинад, Гуырдзыстонимæ иумæ къамис саразын дыууæфарсон арæнты делимитаци æмæ демаркацийы фæдыл. Банысан кæнæм уый, æмæ, ома, арæныл сæрибарæй хизыны æрымысæггаг проблемæты тыххæй дзурынц цифрæтæ: æрмæст ацы аз гуырдзиаг-хуссарирыстойнаг арæныл регистраци æрцыд 139 минæй фылдæр ахизыны цауы, арæныл ахызт 30 мин автомашинæйы», - бахахх кодта Келин.
Уый ма хъусдард аздæхта, «æнæбындур терминтæ «оккупаци» æмæ «оккупацигонд территоритæ» дарддæр дæр кæй зæлынц», уымæ.
«Юридикон дзырдуатмæ куы ‘ркастæуа, уæд уый нысан кæны, иу паддзахады гарзджын тыхтæ æндæр паддзахады территори кæнæ территорийы хай куы бацахсынц æмæ йæ сæ къухы куы дарынц, хицауиуæгад дзы куы сæвæрынц, уыцы хицауиуæгад йæхи закъæттæ куы рауадзы æмæ афтæ дарддæр. Æппæт уыдон кæм сты Хуссар Ирыстон æмæ Абхазы? Уыдонæн ис сæхи гарзджын тыхтæ æмæ милици, сæ парламенттæ уадзынц закъæттæ. Уым ис чысыл уæрæсейаг базæтæ, кæцытæ æппындæр не 'ндавынц политикон цардыл. Америкæйаг æмæ натойаг базæтæ ис æндæр бæстæты. Фæлæ уый нысан кæны, уыдон оккупацигонд кæй сты?», - загъта уый.
Гуырдзыстоны ЕÆÆО-йы уæвынад сæндидзын кæныны тыххæй, ногæй сидтытыл дзургæйæ, Келин равдыста иннæ бæстæтæ-хайадисджытимæ иумæ конструктивонæй ацы фарстмæ æркæсынмæ цæттæдзинад.
Уыимæ иумæ дипломат бахахх кодта, зæгъгæ, ахæм миссийы мандат парахат нæ цæудзæн сыхаг хæдбар паддзахадтыл - Абхаз æмæ Хуссар Ирыстоныл, кæцытæ нырма не сты ЕÆÆО-йы хайадисджытæ.
«Ацы паддзахадты ЕÆÆО-йы быдырон уæвынад саразыны фарсты тыххæй, фыццаджыдæр, бахатын хъæуы æрмæстдæр Сухум æмæ Цхинвалмæ», - бамбарын кодта уый.
Келин бахахх кодта, зæгъгæ, Фæскавказы стабилондзинад сфидар кæнын æмæ цæрджыты æдасдзинад сифтонг кæныны тыххæй иунæг раст фæндаг у конструктивон диалог Тбилисæн Цхинвал æмæ Сухумимæ, регионы иннæ сыхæгтимæ.
«Гаранти йын радтæн ис æрмæстдæр Хуссар Ирыстон æмæ Абхазы республикæтæ æмæ Гуырдзыстоны 'хсæн тыхæй ма спайда кæныны тыххæй юридиконæй бæрнджын сразыдзинæдтæ саразгæйæ. Уымæ фыццаг къахдзæф уаид тыхæй ма спайда кæныны тыххæй Женевæйы дискусситы æппæт хайадисджыты иумиаг хъусынгæнинаг. Гуырдзыстоны ныхмæ тыхæй ма спайда кæныны тыххæй Уæрæсейæ исты бæрнджын хæслæвæрдтæ райсынмæ бахъавдтытæн æппындæр ницы нысаниуæг ис. Рох кæнын нæ хъæуы, Кавказы 2008 азы августы конфликтты «райхъал кодта», номхуындæй - Саакашвили», кæцы бардзырд радта Цхинвал æмæ уæрæсейаг фида-уынгæнджыты ракетæтæй æхсынæн. Уый тыххæй растыл нæ нымайæм ахæм «домынæдтæ», афтæ ма ахæм æмба-рынæдтæ хъарын, куыд «æдасдзинады дунеон ма-дзæлттæ», кæцыты тыххæй Медведев-Саркозийы бадзырдты нæй иунæг дзырд дæр», - загъта уый.
Гуманитарон къорды лигъдæтты тыххæй Келин зæрдыл æрлæууын кодта, зæгъгæ, уый тыххæй диалог сæхгæдтой абхазæгтæ æмæ хуссарирыстойнæгтæ, гуырдзыстойнаг фарс лигъдæтты фæдыл резолюцийы проект ИНО-йы Генералон Ассамблеямæ æркæсынмæ куы бавдыста, уый фæстæ.
«Абхазæгтæ æмæ хуссарирыстойнæгтæн фадат нæй Нью-Йоркы сæ позици бамбарын кæнынæн, америкæйаг фарс сын нæ дæтты визæтæ. Ахæм уавæры ацы республикæты делегацитæ æнæхъуаджыйыл нымайынц Генералон Ассамблеяйы куыст женевæйаг дискусситæй баивын», - бамбарын кодта дипломат.