Nog adres

Фыццаг дунеон инновацион форум Цхинвалы

obrozovanie.jpg
11 октябры Цхинвалы ауагъд æрцыд фыццаг дунеон инновацион форум «Alania open doors», кæцыйы организаци кодтой Хуссар Ирыстоны Ахуырад æмæ зонады министрад, Системон анализы академи (Дзæуджыхъæу) æмæ SATA Group. Форумы куысты хайад райстой Республикæ Хуссар Ирыстоны Хицауады уæнгтæ, Цæгат Ирыстонæй - Ахуырады министрады информаци æмæ зонады хайады хистæр Сæлбиты Алан, инновацийы фарстаты фæдыл Цæгат Ирыстон - Аланийы Хицауады Сæрдары уынаффæгæнæг Пухаты Нелли, афтæ ма инновацион ахуырадон технологиты сферæйы специалисттæ Дагъыстанæй æмæ горæт Ростовæй. Форумы уазджытæ уыд Турцийæ дæр.
Ахуырады сферæйы ногдæр технологитимæ форумы хайадисджыты базонгæ кодтой уæрæсейаг компанитæ «ВидеоТехнологии» æмæ иууон ахуырадон системæ Дневник.ру, Цæгат Кавказы Хæххон-металлургион институты иумиаг технологиты лабораториты къухдариуæггæнджытæ æмæ æндæртæ.
Форумы райдиан мадзалы хайадисджытæн раарфæ кодта Хуссар Ирыстоны Ахуырад æмæ зонады министр Цыбырты Маринæ:

«Фæнды мæ, цæмæй ахæм æмвæзады мадзал уадзыны фыццаг фæлварæн рауайа æнтыстджын, фæстиуæгджын æмæ, кæй зæгъын æй хъæуы, фæнды мæ, цæмæй ахæм мадзæлттæ уагъд цæуой дарддæр дæр», - банысан кодта министр.
Уый куыд загъта, афтæмæй абоны социалон-экономикон ивындзинæдтæ активонæй æндавынц ахуырады сферæйыл æмæ дзы домынц «мобилондзинад æмæ адекватон дзуапп æхсæнады нырыккон домæнтæн, стереотиптæ æмæ традицион ахастыты раивын».
«Нырыккон иумиагахуырадон скъолаты приоритетон здæхтытæй иу у ахуырадон процессы ног инновацион технологитæ биноныг кæнын. 2013-2017 азты Хуссар Ирыстоны ахуырады рæзты фадыгон программæйы бындурон приоритеттæй иу, иннæ ахсджиагдæртимæ иумæ, перспективæйы нысан æрцыд инновацион технологиты рæзт», - загъта Цыбырты Маринæ.
Хуссар Ирыстоны къухдариуæгады номæй форумы хайадисджытæн раарфæ кодта РХИ-йы Фæсарæйнаг хъуыддæгты министр Санахъоты Давид.
«Æнгæс форумтæ тынг ахсджиаг сты уый тыххæй, æмæ Уæрæсейы Федерацийы æмæ Хуссар Ирыстоны инновацион процесстæ дарддæр кæнынц, уыдон сты цæвиттойнаг. Ныридæгæн интеграцион процесстæ цæуы Ирыстоны цæгат æмæ хуссар хæйтты, кæцытæ рæздзысты æмæ уый уыдзæн эффективон æмæ пайда æрхæсдзысты Ирыстоны хуссарæн дæр æмæ цæгатæн дæр нæ паддзахады хæрзиуæгæн, кæцы фидар кæны æмæ рæзы», - банысан кодта Санахъоты Давид.
Уый фæстæ ныхасы рацыд Тыбылты Алыксандры номыл Хуссар Ирыстоны паддзахадон университеты ректор Тедеты Вадим. Уый куыд загъта, афтæмæй ХИПУ-йы рæзтæн нысаниуæгджын приоритет у инновацион ахаст, университеты инновацион потенциалы рæзт.
«Университеты мидисджын ивындзинæдты апп сисс инновацион архайд, кæцы баконд æрцыд ахуырадон, зонадон-кондадон æмæ инфокоммуникацион технологиты ахуыры процессмæ», - банысан кодта ректор.
Дарддæр йæ компанийы архайды тыххæй радзырдта иууон уæрæсейаг ахуырадон хызæг Дневник.ру-йы къухдариуæггæнæг Гавриил Леви.
«Абоны онг мах ахуырадон лæггæдтæ кæнæм электроны хуызы Уæрæсейы 35 регионы ахуырадон уагдæттæн, кæцытимæ мах сарæзтам æмбæлон сразыдзинæдтæ. Хуссар Ирыстонимæ ахæм сразыдзинад саразын, æмæ республикæйы скъолаты дарддæры рахызт ног технологитæм, уыдон дзуапп дæттынц мæ компанийы миссийæн - ацы процессы алы хайадисæгæн, алы ахуыргæнинагæн, ахуыргæнæгæн æмæ ныййарæгæн ахуырад максималонæй эффективон æмæ æнцонæмбарæн саразын», - банысан кодта Леви.
Форумы æвдыст æрцыдысты иууыл ногдæр ифтонггæрзтæ, кæцытæй пайдагонд цæуы ахуырадон сферæйы.
Дарддæр форумы хайадисджытæ хайад райстой тымбыл фынджы куысты, кæцы уыд ахæм темæйыл «РХИ-йы æнæфæцудгæ рæзт инновациты бындурыл».

Тымбыл фынг/ РХИ-йы æнæфæцудгæ рæзт инновациты бындурыл
Мадзалы райдиан Хуссар Ирыстоны Ахуырад æмæ зонады министр Цыбырты Маринæ банысан кодта, зæгъгæ, мах æвдисæнтæ стæм, Хуссар Ирыстонæн уникалон цы мадзал у, уымæн, æмæ йын махæй алчи дæр, кæй зæгъын æй хъæуы, аргъ кæны, куыд инновацион технологиты иууон системæмæ нæ бацыды фыццаг къахдзæф. Ацы форумимæ, зæгъгæ, мах бæттæм стыр ныфсытæ.
Йæ рады Цæгат Ирыстоны Ахуырады министрады информатизациты æмæ зонады хайады хистæр Сæлбиты Алан банысан кодта, форумы цы æмбæстæгтæ уыд, уыдоны стыр цымыдис инновацион технологитæм æмæ цы фарстатыл уынаффæ цыд, уыдонмæ.
«Абоны мадзал цæттæ кæнгæйæ, махæн кæронмæ æмбæрстгонд нæ уыд, инновациты, рæзты темæ æмæ уыцы дырыс фæндон, кæцы равдыстам хъуыддагмæ нæ ахастæй - ныхасæй хъуыддагмæ, Хуссар Ирыстоны уымæ рагæй уыдысты цæттæ. Мæнæн æхсызгон уыдзæн, абоны мадзал фыццаг къахдзæф куы суа, уый, кæцыйы фæстæ уыдзæн дарддæры æнтыстджын рæзт», - банысан кодта Сæлбиты Алан.
Йæ рады Хуссар Ирыстоны паддзахадон университеты инновацион технологиты рæзты, уæлдæр ахуыргæнæндоны куыстмæ сæ бафтауыны перспективæтæ æмæ проблемæты тыххæй йæ хъуыдытæ загъта ХИПУ-йы ректор Тедеты Вадим.
«Мах фæнд кæнæм нæхи газет рауадзын ирон æмæ уырыссаг æвзæгтыл. Уæлдæр ахуыргæнæндоны арæзт цæуы видео-студи дæр, университеты куысты æппæт сферæты дæр план кæнæм цифрæйон технологитæй пайда кæнын», - банысан кодта ректор.
РХИ-йы Фæсарæйнаг хъуыддæгты министр Санахъоты Давид куыд загъта, афтæмæй республикæйы царды инновациты æрцыдæн аивæн нал ис.
«Мæн бузныджы ныхæстæ зæгъын фæнды форумы организатортæн уый тыххæй, уыдон уыйас тых æмæ энерги кæй бахардз кодтой, цæмæй форум ауагъд æрцæуа Цхинвалы, ахуырады сферæйы раззагон технологиты равдысты тыххæй», - загъта Фæсарæйнаг хъуыддæгты министр.
Дарддæр ныхасы рацыд уæрæсейаг компани «Видео Технологии»-йы къухдариуæггæнæг Максим Фролов. Уый дæр банысан кодта инновацион форумы æнтыстджын куыст.
«Тынг цымыдисон уыд байхъусын фарстатæм, форумы хайадисджыты хъуыдытæм. Æхсызгон мын уыд инновацион технологитæм æмбæстæгты цымыдисдзинад. Мæн фæнды, цæмæй ахæм здæхты фылдæр мадзæлттæ уагъд цæуой», - банысан кодта Максим Фролов.
Тымбыл фынджы кæрон Хуссар Ирыстоны Ахуырад æмæ зонады министр Цыбырты Маринæ æмæ уæрæсейаг иууон ахуырадон системæ Дневник.ру-йы къухдариуæггæнæг Гавриил Леви сæ къухтæ æрфыстой æмкуысткæнынады тыххæй сразыдзинадыл.