Nog adres

Сæ лæггæдты хуызтæ фæфылдæр уыдзысты

DSCF3348.JPG

Адæймаджы æнæниздзинад дæндæгтæ цахæм уой, уымæй бирæ кæнгæ у. Æнæхъуаджы нæ дзырдæуы зарæджы, уæхи дæндæгтæй сæкæртæ фондзыссæдз азы хæрут, зæгъгæ. Фæлæ, хъыгагæн, фылдæр хатт дæндæгтæн сæхи æнæниздзинад дæр фæцуды æмæ сæ уæд æнæмæнг бахъæуы дохтыр-стоматолоджы сæр. Сæ иутæн æр-цæуы хос æмæ дарддæр сæ куыст фæкæнынц, иннæты бынæтты та фæзынынц аразгæ дæндæгтæ æмæ сæ пациенттæ райгондæй баззайынц.

Æрвылбон дæр дзæвгар æмбæстæгтæ хизынц, нæ горæты Тæболты Сергейы уынджы цы стоматологон поликлиникæ ис, уый къæсæрæй. Дæндаджы алыгъуызон рыстытимæ фæтындзынц пациенттæ æмæ иугæр дохтыр сæ уæлхъус æрбалæууыд, уæд сæ басгары лæмбынæг æмæ сын бакæны æмбæлон медицинон æххуыс. Рынчын фервæзы йæ низæй æмæ æхцонæй сулæфы. Ацы хосгæнæн уагдон рынчынты ныфс у суанг йæ сырæзтæй фæстæмæ, лæггад сын кæны цæсгомджынæй.

Стоматологион поликлиникæйы сæйраг дохтыр Плиты Витали куыд загъта, афтæмæй коллективы æдæппæт нымадæуы 39 адæймаджы æмæ се 'ппæты тырнындзинад у рынчынтæм аудгæ ахаст дарын. Мидæмæ бахизгæйæ, цæстытæ уайтагъддæр ацахсынц сыгъдæгдзинад, æнæмæнг фæхатдзынæ хорз разамонæг æмæ йæ дæлбар кусджыты æмархайд æмæ хъæрмуд ахаст. Ифтонг сты алыгъуызон нырыккон ифтонггæрзтæ æмæ æрмæджытæй æмæ æппæт уыдæттæ, кæй зæгъын æй хъæуы, хорзæрдæм æндавынц сæ куыстыл. Агъуыст æмæ кусæн кабинеттæ капиталон цалцæг æрцыдысты гуырдзыйы фæстаг хæсты размæ. 2008 азы августы хæсты рæстæджы кæд бахъыгдард, уæддæр сæ сцалцæг кодтой æмæ ныр кусы æнæкъуылымпыйæ. Æввахс рæстæджы ма хъуамæ скуса дæндæгты протезон хайад æмæ уæд сæ кусджыты нымæцмæ бафтдзæн 6-7 адæймаджы.
- Уымæй дарддæр ма нæ зæрды ис ноджы дыууæ кабинеты байгом кæнын, - зæгъы Плийы фырт. Уымæй нын ныфс бавæрдтой нæ Республикæйы Президент Тыбылты Леонид æмæ Æнæниздзинады министрад. Зындгонд куыд у, афтæмæй бирæ сывæллæттæн гуырцæй вæййы зылын дæндæгтæ. Дохтырты бон та у уыдон сраст æмæ сдзæбæх кæнын. Нæ республикæйы дæр бирæ ис дæндæгтæй ахæм сахъат кæстæртæ æмæ хос кæнынмæ цæуынц Дзæу-джыхъæу кæнæ Уæрæсейы æндæр рæттæм. Зæгъын хъæуы уый, æмæ иуæй фæндаггаджы æргътæ дзæвгар сты, иннæмæй та даргъ фæндæгтыл фæллайынц æмæ фыдæбоны хай фæвæййынц. Цæмæй ацы згъуыд иуварс æрцæуа, ууыл зæрдиагæй куыстæуы æмæ æввахс рæстæджы нæхи поликлиникæйы æрбиноныг кæндзысты, сывæллæтты дæндæгты æнæниздзинадыл кæм аудой, ахæм кабинет.
Уыдзæн ма дзы ноджыдæр иу кусæн хатæн æмæ уый та хуындзæн инплантологи, ома, æфсæры мидæг зилгæ дæндæгтæ куы аразынц.
Куысты æнтыст баст у кадрты цæттæдзинадыл, уыдон цас фылдæр кусой сæхиуыл, сæ зонындзинæдтæ бæрзонддæр кæной, уыйбæрц æнтыст дæр уыдзæн. Уый æмбаргæйæ, коллективы алы дохтыр дæр 5 азы иу хатт йæ квалификаци фæбæрзонддæр кæныны тыххæй курсыты вæййы Дзæуджыхъæу, Мæскуы æмæ æндæр рæтты.
Сæйраг дохтыр нæ республикæйы æнæниздзинады ми-нистрадимæ иумæ архайынц, цæмæй районтæ дæр ифтонг уой стоматолог-дохтыртæй æмæ уый цасдæрбæрцæй сæ къухы æфтгæ дæр кæны. Зæгъæм ахæм бынæттæ уал фæ-зынд Знауыр æмæ Дзауы. Фæнд кæнынц ахæм хосгæнæн уагдæттæ Къуайса æмæ Ленингоры дæр байгом кæнын. Уый уыдзæн арфæйаг хъуыддаг дæрддзæф бынæтты цæрджытæн.
ХУЫБИАТЫ Н.