Nog adres

Рæхджы скусдзæн базарадон-ирхæфсæн центр

DSCF3334_2.JPG
Не 'хсæн ис ахæм адæймæгтæ, кæцытæ хъуыды кæнынц æрмæст сæхиуыл нæ, фæлæ сæ радтæг адæмы хорздзинадыл дæр. Кæй зæгъын æй хъæуы, ахæмты сæр ныры рæстæджы тынгдæр хъæуы, уымæн æмæ æмбæстæгты фылдæр хай бæрæг аххосæгтæм гæсгæ фæиппæрд сты сæ уарзон куыстуæттæй, нал сын ис, кæм бакусой, ахæм бынæттæ. Уымæ гæсгæ тыхсынц материалон æгъдауæй, æвзарынц зындзинæдтæ. Зæгъгæ, кæмдæр искæцы куыстуат сæндидзыдта æмæ кусынæввонг ссис, уæд æхцондзинад æрхæссы алкæмæндæр, уæлдайдæр та, куыст чи агуры, уыдонæн.
Куысты бынæттæ рæхджы кæм фæзындзæн æмæ йæ бакондмæ бирæтæ æнæрхъæцæй кæмæ æнхъæлмæ кæсынц, уый уыдзæн, кæй кой ракæнынмæ хъавын, уый дæр. Фæлæ уал алцы дæр - фæдфæдыл.
Советон хицауад ма йæ тынгыл куы уыд, уæд Хуссар Ирыстоны областы разамонджытæ æрæвнæлдтой нæ горæты Ленины уынджы кæрон базарадон центр аразынмæ. Райдыдтой дзы арæзтадон куыстытæ æххæст кæнын, фæлæ йын кæронмæ саразын нал бантыст. Рацыд ма чысыл рæстæг æмæ царды цалх ныззылд зыгъуыммæ. Уæд ма кæй æндæвта ацы арæзтад дæр. Уæдæй ардæм дзæвгар азтæ рацыд æмæ мæнæ цалдæр азы размæ фæзынд, йæ сæндидзын кæныныл чи ахъуыды кодта, ахæм адæймаг. Уый у Ирыстоны иузæрдион хъæбул æмæ патриот Багаты Хъазбег Магрезы фырт.

Райдианы уал бацархайдтой, къорд азты дæргъы брондон чи ссис, уыцы территори асыгъдæг кæныныл. Ласгæ дæр дзы дзæвгар акодтой - æдæппæт 120 машинæйы бæрц. Æмæ сындæггай къултæ хæрдмæ цыдысты дыккаг уæладзыджы онг. Арæзтады бригадир Плиты Валери мын куыд радзырдта, афтæмæй уый уыдзæн базарадон-ирхæфсæн центр æмæ йæ иумиаг фæзуат у 5 мин квадратон метры. Фыццаг уæладзыджы уыдзæн 25 базарадон залы æмæ дзы фæлхасгæнджытæ æлхæндзысты алыгъуызон продукттæ, цæхæрадоны халсæрттæ, нозт, минералон æмæ адджын дæттæ æмæ æндæртæ. Уымæй дарддæр ма куыд йæхи кусджытæн, афтæ æрбацæуæггæгтæн дæр йæ лæггады хай кæндзæн хæрæндон. Æндæртимæ абаргæйæ, ам хæринæгты æргътæ уыдзысты бирæ асламдæр. Дыккаг уæладзыджы балхæнæн уыдзæн хæдзарон дзаумæттæ æмæ цардуагон алыгъуызон мигæнæнтæн. Уымæй дарддæр ма ам уыдзысты сывæллæттæн æмæ æвзæнгтæн тренажерон зал, сывæллæтты хиирхæфсæн центр æмæ кинотеатр. Фæлхасгæнæг базарадон центрмæ куы æрбацæуа, уæд, гæнæн ис, йæхи фæндонмæ гæсгæ йæ кæстæры уырдæм бакæна. Уый йæхи аирхæфсдзæн, ныййарæг та æнцад-æнцойæ азилдзæн, цы йæ хъæуы, уыдæттæ балхæныны тыххæй. Æвдисæн стæм, бирæ магазинты рæзты машинæтæ куыд схъомпал вæййынц æмæ дзы ахизæн куыд нал вæййы. Фæлæ ам алцыдæр уыдзæн фæткыл, уымæн æмæ дзы уыдзæн æрлæууæн бынæттæ. Ноджы ма машинæты хицæуттæн бахизæн уыдзæн мидæггаг кæртмæ дæр, кæд сын уæззау товар ласинаг уа, уæд.
Æрдзурын æмбæлы бæстыхайæн йæхи тыххæй дæр. Ам бацархайдтой, цæмæй арæзтад ифтонг æрцыдаид, нырыккон домæнтæн дзуапп чи дæтдзæн, ахæм арæзтадон æрмæджытæй. Къултæ арæзт æрцыдысты пенобетонæй. Уый та ахæм у æмæ уазал рæстæджы хъарм кæны æмæ хъарм боныгъæды та уыдзæн сатæг уæлдæф. Кæд ма залты хъармдзинад бахъæуа, уæд сæм ис сæрмагонд системæ æмæ уымæй дæр пайда кæндзысты.
Астæрдтæ сты полиуретанæй, уый дæр хауы ног технологитæм. У æнцон- аразæн, кафелæй та у асламдæр. Уæлхæдзар æмбæрзт у андулинæй. Уый къæвдайы рæстæджы хъæлæба не ‘взæрын кæны, згæ дæр ыл нæ хæцы. Афтæ ма хæтæлтæ дæр сты немыцаг пластикæй æмæ сæлгæ дæр тынг нæ кæнынц.
Арæзтады бригадиры ныхæстæм гæсгæ фыццаг уæладзыг скусдзæн иу мæйы фæстæ. Æхцайы фæрæзтæй цух кæй сты, уымæ гæсгæ дыккаг уæладзыг сцæттæ кæныны куыстытæ чысыл афæстиат уыдзысты. Æххæст хъомысадæй куы скуса, уæд дзы æдæппæт фæллой кæндзæн 120 адæймаджы.
ХУЫБИАТЫ Н.