Nog adres

Бузныг, дохтыр!/ УЫЙ АМОНДЫ ХЪУЫДДАГ У

Рынчын адæймагæй мæгуырдæр кæй ничи ис, уый бæлвырд кæнын никæмæн хъæуы. Уымæн баххуыс кæнын удыбæстæ кæй у, моралы закъон у. Гъе, фæлæ нæ уæззау æмæ нуæрттæхалæн дуджы тынг фæзын ахæм тыхст адæймæгтæн æмбæлон медицинон æххуыс райсын.
Нæ низтæй фервæзыны æнхъæл балæууыдыстæм нæ республикæйы соматикон рынчындоны, æз, Коцты Зæлинæ æмæ Дыгъуызты Таймураз - РХИ-йы хъæууонхæдзарадон министрады кусджытæ.
Фестæм, æнхъæл куыд нæ уыдыстæм, ахæм фæндараст. Рынчындоны хирургион хайы ныл сæмбæлдысты, ныфс нæ чи бауагъта, ахæм адæм. Нæ рыст нын, куыд рынчын адæймæгтæ, афтæ æввахс айста йæ зæрдæмæ рынчындоны сæйраг дохтыр Кокойты Маирбег.

Равдыста нæм, æцæг дохтыр æмæ æцæг адæймаг рынчынмæ цахæм ахаст равдисы, ахæм. Ахæм цæстæй нæм ракастысты йæ дæлбар медицинон персонал дæр. Ам нæ зæрдыл æрлæу-уыдис иу ахæм рæсугъд æмбисонд: «Дон сæрæй рæсугъд кæны», ома, уæлейæ хицау цахæм у, ахæм вæййынц йæ дæлбар кусджытæ дæр.
Уайтагъд нын ныфсытæ æвæрынмæ фесты, иу æмæ дыууæ сымах хуызæн рынчынæн, мыййаг, куынæ баххуыс кодта, зæгъгæ. Схуыссын нæ кодтой, алкæй йæхи палатæйы æмæ ма нын ноджыдæр ныфсытæ æвæрдтой: - тыхсгæ мацæуыл кæнут. Нæ дохтыр комæй кургæ, Хуыцауы лæвар адæймаг у, зæгъгæ, адзæбæх уæ кæндзæн.
Нæ дыууæйы дæр, куыд алкæйы, афтæ лæмбынæг басгæрста Кокойты лæппу æмæ ба-фæдзæхста, операцимæ сæ ба-цæттæ кæнут, зæгъгæ. Цыбыр рæстæгмæ нын сарæзтой анализтæ, УЗИ, рентгены нывтæ...
Мæнæн мæ масты разындис егъау дуры къæртт, Таймуразæн та уыд грижæ. Ноджыдæр немæ ныхас кодта хицæнтæй æмæ æвдыста ахæм ахаст, цыма нæ къухты æнгуылдзты ныхтæ дæр рогæй фелвасдзæнис. Æмæ ахæм рæстæджы зæрдыл куыднæ хъуамæ ‘рлæууа уырыссаг загъд: «Слово лечит, слово ранит». Ахæм диссаджы фæлмæн ахаст нæм равдыста æмæ йæ рæвдауæн æмæ ныфсæвæрæн дзырдтæ хосау ахъардтой уæнг-ты. Дохтыр Маирбег канд хостæй æмæ хирурджы кардæй нæ, фæлæ хос кæны дзыхы дзырдæй дæр. Æндæр рынчынты ныхæстæ нæ ныр уæлдай фидардæрæй бауырныдтой.
Операци саразынæн банысангонд боны та ныл Маирбег фембæлдис зæрдæвæрæн мидбылхудтимæ. Æмæ дæ бауырнæт, зынаргъ газеткæсæг, кæд карды бынмæ бацæуын стыр зын у, уæддæр, нырмæ нæ иуы, стæй та иннæйы цыдæр магикон тых хаста операцигæнæн столмæ.
Нæ дыууæйы дæр фервæзын кодта нæ низтæй æмæ нæ хæдзæрттыл сæмбæлдыстæм дзæбæхæй. Уый уыдис ацы аз, марты. Уæдæй фæстæмæ нæм, нæ дохтыры тыххæй дзырд куы æрхауы, уæд ныл дис бафты. Ау, уæззау дуджы ма адæймагæн ахæм лæггад бакæн, уый, æцæгæйдæр, йæ бон у æрмæстдæр, дохтыры ардбахæрдыл æнувыд чи у, æнæниздзинады сæраппонд рынчынтæн йæ уды хъарм æмæ стыр профессионалондзинад парахатæй чи хæлар кæны, ахæм адæймагæн.
Æмæ ма нæм афтæ дæр кæсы - Маирбег у амондджын адæймаг. Уымæн æмæ йæ зæрдæ у ахæм стыр æмæ дзы бацæудзæн дунейы уарзт, уый у адæймагæн æнæниздзинад æмæ цард чи дæтты, ахæм стыр дохтыр æмæ диссаджы ирон адæймаг.
Цæр нын, Маир, дæ адæмы, не ‘взонг Республикæйы хæрзиуæгæн, дæхи макуы бахъæуæд дохтыры æххуыс. Хи хъæбулы уарзтæй дæ уарзынц адæм æмæ уый амондджын хъуыддаг у нæ сыгъд æмæ уырыд дуджы.
КОЦТЫ Зæлинæ,
ДЫГЪУЫЗТЫ Таймураз