Nog adres

Тымбыл фынг | Æхсæнады хъæуы консолидаци

23 ноябры Медиа-центр «Ир»-ы ауагъдæуыд тымбыл фынг «Консолидаци», зæгъгæ, ахæм темæйыл. Тымбыл фынджы хайад райстой Хуссар Ирыстоны Президенты бынатмæ кандидат Бибылты Анатоли, РХИ-йы компартийы лидер Коцты Станислав, Парламенты депутат Цгъойты Мераб, парти «Иудзинад»-ы уæнг, депутат Цхуырбаты Вадим, парти «Фыдыбæстæ»-йы лидер Гобозты Вячеслав, Адæмон партийы лидер Челæхсаты Роланд, президенты бынатмæ экс-кандидат Коцты Аланы бæрнджын Гæбæраты Инара, экс-кандидат Хъотайты Аланы бæрнджын Гæбæраты Вадим æмæ æндæртæ. Мадзалы нысан уыд æхсæнад æмæ политикон тыхты консолидаци.
Тымбыл фынг уагъта Къудухты Олег. Уый банысан кодта, зæгъгæ, цы политикон тыхтæ æрбалæууыдысты Бибылты Анатолийы фарсмæ, уыдон сты оппозицион партиты минæвæрттæ. Уый та нысан кæны уый, æмæ Бибылы фырт у хæдбар политик, «Хицауады лæг» нæу. Ацы процесс фидæны дæр адарддæр кæнын хъæуы, цæмæй бавæрд æрцæуа иудзинад æмæ дарддæр æмкуыст кæной.
Дарддæр раныхас кодта Бибылты Анатоли æмæ бузныджы ныхæстæ загъта, йæ фарс чи рахæцыд, уыдонæн се ‘ппæтæн дæр.
DSC00195.JPG
РХИ-йы Компартийы лидер Коцты Станислав бахатыд Бибылты Анатолимæ, цæмæй, куы фæуæлахиз уа, уæд æхсæнады кæрæдзимæ æрбаввахс кæна, нæ адæмы бахъахъхъæныны тыххæй уымæн стыр æмæ ахсджиаг нысаниуæг ис.
Йæ хъуыдытæ загъта Цгъойты Мераб: «2008 азæй æртæ азæй фылдæр рацыд æмæ нæма дæр æндидзынгæнæн куыстытæ нæ фесты. Мах æртæ азы фесæфтам æмæ нæ ныр хъæуы æппæт дæр саразын. Уый æмбары Бибылты Анатоли æмæ уый хорз хъуыддаг у. Мæнмæ гæсгæ уый æнцой кæндзæнис профессионалтæ æмæ бынæттон кадртыл», - банысан кодта Цгъойты Мераб.
Уый фæстæ раныхас кодта экс-кандидат Коцты Аланы бæрнджын Гæбæраты Инара æмæ фидарæй загъта, зæгъгæ, Бибылты Анатоли ныры къухдариуæгады раразмæгонд кандидат нæу. «Бибылты Анатолийы æвзæрстыты размæ программæйы мах федтам реалон тых, кæцы нын нæ адæмы баиу кæндзæнис æмæ аскъуыддзаг кæндзæнис риссаг проблемæтæ», - баххах кодта Гæбæраты Инара.
Парти «Фыдыбæстæ»-йы лидер Гобозты Вячеслав банысан кодта, зæгъгæ, хъæуы саразын афтæ, цæмæй ныры режим ацæуа. Йæ ныхæстæм гæсгæ. бæрæгæй зыны системон кризис æмæ йын хос кæнын хъæуы реформæтæй. «Æз афтæ нымайын, æмæ Бибылты Анатолийæн ис æппæт шанстæ ацы реформæтæ ауадзынæн», - загъта Гобозты Вячеслав.
Бибылты Анатолийы фарс рахæцыны тыххæй сæ позици загътой Челæхсаты Роланд, Цхуырбаты Вадим, Гæбæраты Вадим.
Тымбыл фынджы рæстæджы Бибылты Анатоли йæ тезисты фидарæй банысан кодта. зæгъгæ, йыл адæм се ууæнк куы бафтауой æмæ йæ куы равзарой, уæд сараздзæнис афтæ, цæмæй профессионалтæ, кæцытæ сты æндæр æмæ æндæр кандидаты штабты, йæ позиционертæ уой æви оппозиционертæ, уæддæр сæ уый æрбакæндзæнис республикæйы къухдариуæгадмæ.
ОСИАТЫ И.