Nog adres

Ныббар нын, беслæн...

pamiatnik.jpg
Фараст азы рацыд уыцы кæуинаг æмæ еусайраджы бонæй. Кæмæйдæрты рохдæр фæци, фæлæ йæ-хи ирон зæрдæйæ чи хоны, ирон уд æмæ зæрдæ кæмæн ис, уыдонæй нæ ферох уыдзæн. Уый уыд æмæ у не стырдæр трагеди. Нæ кæуинæгты кæуинаг æмæ нæ худинæгты худинаг.
Фараст азы размæ Беслæны цы 'рцыд, уый æндæр адæммæ куы æрцыдаид, уæд, дзырд дæр ыл нæй, æртыккаг дунеон хæст расидтаиккой. Мах къуырмайы 'фсон, скодтам, цы 'рцыд уымæ куырм цæстæй акастыстæм, æмæ дарддæр нæ царды хай кæнæм; нæ ахаст цардмæ, нæхимæ нæ ивæм, куыд цардыстæм æмæ цæрæм, афтæ цæрын худинаг кæй у, ууыл уæддæр нæ ныхъуыды кодтам. Æмæ, цыма уымæй нæхи удты рыст фæрогдæр кæнынæн фæзæгъæм: Шамил Басаев йæхæдæг дæр амард...
Афтæмæй та уымæй махæн нæ фенцондæр, нæ худинаг нын не 'хсы нæ нацийы цæсгомæй.
Нырма дæр æй нæ бамбæрстам, мах хуызæн чысылнымæц адæмæй иу цæфæн æртæ сæдæ адæймагæй фылдæры ныццæгъдай, уымæй дæр сабиты, уый нацийы сæфт кæй у. Ныр уыцы цардбæллон хъæбултæй бирæтæн сæхицæн уаид хъæбултæ, фараст азы фæстæ ноджы фылдæрæн æмæ афтæ дарддæр. Цы нын сарæзтой, уый не стырдæр трагеди у, афтæ саразынмæ нæм сæ ныфс кæй бахастой, уый - не стырдæр худинаг.
Уæддæр цæмæн, цæй тыххæй?

Рацыд фараст азы, фæлæ кæронмæ нæ базыдтам, цы стыр цæф ныл сæмбæлд, уымæн йæ рæстдзинад. Цæмæн, уый та куыд нæ æмбарæм! Хатыргæнаг кæй стæм, знагмæ знаджы цæстæй кæсын кæй нæ зонæм, уый тыххæй нæм бахастой сæ ныфс. Æрвылаз дæр нын ног ахуыры азы райдайæн бон бæрæгбон уыд, уымæн æмæ нæ рæзгæ фæлтæрыл, нæ фидæнимæ баст бæрæгбон у. Фæлæ нын ныр фараст азы уыцы туг æмæ цæссыгамæхст бон æрлæууын кæны нæ зæрдыл. Хъуыды йæ кæнæм, нæ чысыл зæрдæйы уидæгты нын æртæ бон æмæ æртæ æхсæвы хъизæмарæй фæдарыны фæстæ куы ныццагътой, æгас дуне нæ тæригъæ-дæй сау марой куы кодта, уæд гуырдзы фырцинæй уæларвмæ куыд хаудтой... Уый тыххæй цы - сæ афтæхуыйнæг эмиссарты сын Беслæны тæригъæдджын уæлмæрдмæ нæ бакодтой, æртæ кæрдзын æмæ сыл бæгæныйы кæхцимæ нæ бацин кодтой?!.
Августы хæст дæр афтæ сфыстам Саакашвилийыл, Беслæны трагеди Басаевыл куыд сфыстам, афтæ. Фæлæ ма нæхи бафæрсæм: махæн дæр куы уыдис æмæ ис разамонджытæ, уæд уыдон цæмæннæ искуы искæмæ бабырстой, мах цæмæннæ рæмудзæм, быныскъуыд цæмæннæ кæнæм искæй сывæллæтты? Уымæн æмæ нæ туджы нæй искæй цæгъдын, искæй марын. Уæдæ не знаг адæмты æнусон фыдæх иугай адæймæгты аххос цæмæн фæкæнæм? Нæ иу уадул нын чи ныццæвы, уымæ иннæ цæмæн бадарæм? Цæмæй августы хæст дæр æмæ Беслæны трагеди дæр фæлхатт цæуой æнусты дæргъы?...