Nog adres

Бæрæгбонон концерт

nikala_3.jpg
Адæймаг цы зæххыл цæры, уый фыдгулы дзæмбытæй сæрибар куы æрцæуы, ныфсджынæй куы фæкæсы йæ сомбонмæ, уæд йе уæнгты хъæлдзæгдзинад æрфысым кæны, хорз зæрдæйы равг ын вæййы.
2008 азы августы хæст куы фæци, уымæй цалдæр боны фæстæ Уæрæсейы Федерацийы Президент Дмитри Медведевы Барамындæй нымад æрцыд нæ республикæйы Хæдбардзинад. Ууыл стыр райгондæй сæмбæлдысты нæ рыстзæрдæ адæм, сæ цинæн кæрон дæр нæ уыд.

Уыцы æнæферохгæнинаг боныл сæххæст 5 азы æмæ йæ нæ хæстæфхæрд æмбæстæгтæ нысан кæнынц райгонд æмæ хъæлдзæгæй. Дæ циныл дын æндæртæ куы цин кæной, æввахс æй куы исой сæ зæрдæмæ, уæд бæрæгбон дæр уæлдай хъæлдзæгдæр вæййы. Афтæ уыд, Цхинвалы музыкалон ахуыргæнæндоны 25 августы цы диссаджы бæрæгбонон концерт ауагъдæуыд, уый дæр. Хайад дзы райстой куыд ахуыргæ-нæндоны коллектив, афтæ Санкт-Петербургæй æрхонгæ артисттæ дæр.
Концерт байгом Дунеон конкурсы лауреат, Санкт-Петербурджы Римский-Корсаковы номыл музыкалон ахуыргæнæндоны студент, не 'мзæххон Тадтаты Григол æмæ Дунеон конкурсты лауреат, ацы ахуыргæнæндоны студенткæ Тадтаты Аннæйы музыкалон номырæй.

Уый фæстæ сценæйыл сæ арæхстдзинад æвдыстой, сæ рæсугъд æмæ аив хъæлæстæй аивадуарзджыты зæрдæтæ балхæдтой нæ музыкалон ахуыргæнæндоны студенттæ Пæррæстаты Сослан æмæ Хæбæлаты Лали. Фортепианойы парти сæххæст кодта пианисткæ Гæджиты Жаннæ.
Кæд бирæ рæстæг нæ уæвынад кæны Цæгат Ирыстоны фольклорон ансамбль «Къона», уæддæр йе 'нтыстытæй буц æмæ сæрыстыр сты йæ табугæнджытæ. Ныридæгæн уарзон сси канд Цæгат Ирыстоны нæ, фæлæ Уæрæсе æмæ фæсарæнты дæр, кадимæ хæссы ирон аивады кæлæнгæнæг тых. Хуссар Ирыстоны æмбæстæгтæ тынг бауарзтой ацы аивадон коллективы æмæ сын кодтой зæрдиаг къухæмдзæгъд. Хъисфæндыры цагъдимæ азарыдысты «Колхозон чызг», «Нартыхты Сосойы зарæг» æмæ æндæртæ.
Сценæйыл сæ бæрзонд аивад нæ бавгъау кодтой, Санкт-Петербургæй нæм цы артисттæ æрцыд, уыдон дæр. Ансамблы уæнгтæ алыгъуызон музыкалон инструменттыл иумæ æххæст кодтой классикон музыкæйы номыртæ æмæ зарджытæ. Æхсызгон у уый банысан кæнын, æмæ се 'хсæн кæй уыдысты не 'мзæххонтæ Тадтаты Григол æмæ Санкт-Петербурджы консерваторийы студент, «Ирыстоны æвзонгад»-ы конкурсы лауреат Цыбырты Шота дæр. Тадтайы фырт номыртæ æххæст кодта скрипкæйыл, Цыбыры фырт бæрзонд систа йæ рæсугъд æмæ тыхджын хъæлæс. Аивадуарзджытæ сын уый тыххæй кодтой зæрдиаг къухæмдзæгъд, сценæйæ сæ фæндараст кодтой цины хъæртимæ.
Бæрæгбонон концерты уыдысты нæ республикæйы Президент Тыбылты Леонид, республикæйы бæрнон кусджытæ, уазджытæ Приднестроваг Молдаваг Республикæ, Хæххон Хъарабахы Республикæйы делегаци æмæ æндæртæ. Концерты кæрон йæ хайадисджытæн зæрдиаг арфæтæ ракодта æмæ сын иууыл хуыздæр фæндиæгтæ загъта Республикæ Хуссар Ирыстоны Президент Тыбылты Леонид.
ХУЫБИАТЫ Никъала