Nog adres

/Равдыст/ Гæбæраты Феликс: «Ирыстон мæнæн у иу»

DSCN9152.jpg Хуссар Ирыстоны хæдбардзинад Уæрæсе куы банымадта, ууыл фондз азы сæххæсты цытæн ацы бонты нæ республикæйы уагъд æрцыдысты бирæ алыгъуызон бæрæгбонон мадзæлттæ. Уыдонæй сæ иу уыдис не ’мзæххон, Цæгат Ирыстоны культурæйы сгуыхт кусæг, Уæрæсейы дизайнерты цæдисы уæнг, зынгæ нывгæнæг Гæбæраты Феликсы нывты равдыст. Уый байгом ис 24-æм августы нæ горæты Профцæдисты хæдзары.
Гæбæраты Феликс райгуырдис Хуссар Ирыстоны Знауыры районы Куатетрийы хъæуы. Астæуккаг скъола æнтыстджынæй каст фæуыны фæстæ ахуыр кæнынмæ бацыд нæ горæты Тугъанты Махарбеджы номыл нывгæнæн ахуыргæнæндонмæ æмæ йæ каст фæцис сырх дипломыл. Уый фæстæ та йæ ахуыр адарддæр кодта В. И. Мухинайы номыл Ленинграды аивадон-сæудæ-джерадон ахуыргæнæндоны. Йæ ахуыр фæуыны фæстæ æрыз-дæхтис Цæгат Ирыстонмæ æмæ абоны онг дæр кусы æмæ цæры уым. Бирæ азты дæргъы Феликс сфæлдыстадон куысты æмрæнхъ йæ зонындзинæдтæ лæвар кæны кæстæр фæлтæрæн. Ныртæккæ кусы ахуыргæнæгæй Дзæуджыхъæуы Модæты институты. Йæ ахуыргæнинæгтæй бирæтæ систы зынгæ адæймæгтæ.
Ацы диссаджы къухты хицау адæймагæн йæ курдиаты руаджы бирæ бантыстис ирон адæмы цардуаг ирд ахорæнтæй равдисынæн: сæ истори, фæлтæрæй-фæлтæрмæ адæмы ’хсæн цавæр хицæндзинæдтæ ис, Цæгат æмæ Хуссар Ирыстоны æрдзы рæсугъддзинад æмæ æндæртæ. Гæбæрайы фырт йе сфæлдыстадон тыгъдады пайда кæны алыгъуызон жанртæй æмæ техникон фæрæзтæй. Гæбæраты Феликс ма у бирæ монументалон куыстыты автор, кæцытæ уæвынад кæнынц Цæгат Ирыстоны алы къуымты.
Уæдæ бирæ сты Феликсы сфæлдыстадон куыстытæ, кæцытæй дыууæ Ирыстонæн кæны кад. Йæхæдæг куыд зæгъы, уымæ гæсгæ Ирыстон кæд дыууæ дихы у, уæддæр уымæн Ирыстон у иу. Уæдæ цахæмфæнды бæрæгбон дæр ахæм адæймæгты хайбавæрдæй бирæбæрцæй вæййы рæсугъддæр. Уымæ гæсгæ Гæбæраты Феликсы нывты равдыст байгом ис официалон æгъдауæй. Ардæм æрбацыдысты нæ республикæйы Президент Тыбылты Леонид æмæ Хицауады разамонджытæ, интеллигенцийы минæвæрттæ, нывгæнæгæн йе ’ввахс адæм. Уыдон се ’ппæт дæр стыр цымыдисимæ зонгæ кодтой Феликсы куыстытимæ æмæ йын дзырдтой бузныджы ныхæстæ.
Арфæ æмæ йын бузныджы ныхæстæ загъта Президент Тыбылты Леонид дæр.
Уый куыд банысан кодта, уымæ гæсгæ Хуссар Ирыстонæй ацæу-гæ иннæ нывгæнджытæн дæр арæхдæр хъуамæ аразæм сæ куыстыты равдыстытæ. Стæй ма æрдзырдта Мæскуымæ йæ балцы тыххæй, бæрæгбоны нысаниуæджы тыххæй æмæ нын Уæрæсе цавæр аргъ кæнынц, æппæт уыдæттыл. Уый фæстæ Гæбæраты Феликсы схорзæхджын кодта Республикæ Хуссар Ирыстоны сгуыхт нывгæнæджы номæй.
Нывгæнæгæн ма бузныг æмæ арфæйы ныхæстæ загътой Культурæйы министр Кокойты Махар, нывгæнæг Æлборты Æхсæртæг, газет «Хурзæрин»-ы редактор Гæбæраты Юри æмæ æндæртæ.
Бæрæгбонон мадзал сæ музыкалон номыртæй барæсугъд кодтой сывæллæтты сфæлдыстадон галуаны хъомылгæнинæгтæ æмæ сывæллæтты зарæггæн-джыты къорд «Булæмæргъ».
ТУАТЫ Ларисæ