Nog adres

ЙÆ ЦАРДÆЙ АХИЦÆН ЛЕГЕНДАРОН ЖУРНАЛИСТ

pescov.JPG
12-æм августы Мæскуыйы 83-аздзыдæй амард «Комсомольская правда»-йы легендарон журналист, сæдæгай очеркты æмæ дæсгай чингуыты автор æмæ телеуадзæг Васили Песков.
Уый райгуырд 1930 азы Воронежы областы Орловойы хъæуы. Йæ фыццаг уацтæ фыссын райдыдта воронежаг газет «Молодой коммунар»-мæ, æмæ «Комсомольская правда»-йы та кусын райдыдта 1956 азы. Уæрæсейаг кæсджытæ йын хорз хъуыды кæнынц æмæ уарзынц «Комсомольская правда»-йы йæ авторон рубрикæ «Окно в природу»-йы , кæцы Песков уагъта æрдæг æнусы бæрц, телекæсджытæ та - алæвæрд «В мире животных», кæцыйы уадзæг уыд 15 азы дæргъы.
Советон газеткæсджытæ æмæ телекæсджытæ хорз хъуыды кæнынц, Песков фыццаг хатт тархъæды Лы-ковты бинонты куы ссардта æмæ сыл алæвæрд куы сарæзта, уый. Ацы бинонты фæдыл ын йæ уацтæ стыр цымыдисимæ кастысты теле æмæ газеткæсджытæ.
“Нæ журналистикæ”-йы легендæ чи сси, уыцы адæймаджы ацыд махæн у стыр зиан», - загъта «Комсомольская правда»-йы сæйраг редактор Владимир Сунгоркин.

Васили Песковы бинонтæ æмæ коллегæтæн мæсæллæйы ны-хæстæ загъта Уæрæ-сейы президент Владимир Путин дæр.
«Фыдыбæстæйон журналистикæ, литературæ æмæ æппæт нæ бæстæйæн уый у стыр зиан. Васили Михаилы фырт уыд курдитатджын æмæ диссаджы адæймаг», - дзырдæуы президенты телы.
Газет «Московский комсомолец»-ы сæйраг редактор Павел Гусев йæ коллегæйы тыххæй загъта: «Уый уыд советон дуджы нысаниуæг-джындæр журналисттæй сæ иу. Уыд алыварсон адæй-маг, кæцы милуангай газеткæсджытæн бакодта æрдзы диссаджы дуне».
Газет «Аргументы и факты»-йы редактор Николай Зятьков: «Васили Песков уыд легендарон журналист. Уый Фыдыбæстæйон журналистикæйы æрмæст нысаниуæгджын фигурæ нæ уыд, фæлæ ма адæймаг, кæцы уыд хæрзæгъдаудзинад æмæ патритоизмы легендæ дæр».
Васили Песковы тынг хорз хъуыды кæнынц æмæ йын стыр аргъ кодтой хуссарирыстойнаг журналисттæ дæр. Абоны онг дæр нæ журналисттæй бирæты хæдзæртты сты ацы легендарон журналисты уацты газетæй лыггæгтæ.