Nog adres

Хуссарирыстойнаг сывæллæттæ - Орелы областы

vlagere.jpg
Хуссарирыстойнаг сывæллæттæ хайад райстой Сабырдзинады дунеон фестивалон лагерь «Дети, мир и красота!»-йы, кæцы уыд Орловскы областы æнæнизгæнæн центр «Ветерок»-ы базæйы.
Сывæллæттæ ацы лагеры фесты 21 бон.

«Лагеры баулæфыд Сывæллæтты сфæлдыстадон галуаны дыууадæс хъомыл-гæнинаджы, - загъта къорды сæргълæууæг Дзабиты Екатеринæ. - Фестивалы нæ сывæллæттæ равдыстой се сфæлдыстадон курдиат, æххæст кодтой адæмон æмæ нырыккон кæфтытæ, зарджытæ».

Хуссарирыстойнаг делегаци хайад райста Орел æмæ йæ областы немыцаг фашисттæй ссæрибар кæныныл 70 азы сæххæсты бæрæгбонон мадзæлтты.

«Хайад райстам Сабырдзинады мысæн цыды, Дунеон фольклорон фестивалы, кæцытæ баст уыдысты бæрæгбонимæ». Дзабион ма загъта, зæгъгæ, сывæллæттæн сорганизаци кодтой конкурстæ, мастер-класстæ, экскурситæ. «Экскурситæ сорганизаци кодтой Мценск, Орел æмæ Кроммæ. Сывæллæттæ сæ бал-цæй баззадысты тынг райгондæй», - банысан кодта уый.

Къорды сæргълæууæг ма фехъусын кодта, зæгъгæ, 7 августы сабырдзинады лагеры арæзт æрцыд мысæн мадзал, Хуссар Ирыстоны 2008 азы августы хæсты чи фæмард, уыдоны тыххæй: «Сæххæст кодтой музыкалон-литературон композици «Свеча памяти». Архайды рæстæджы æрæмбырдуæвджытæ лæууыдысты сæ къухты судзгæ цырæгътимæ. Бирæтæ нæ урæдтой сæ цæстысыг дæр», - загъта Дзабион.
Сывæллæттæн бакодтой лæвæрттæ, радтой сын дипломтæ æмæ грамотæтæ, лагеры фæлгæтты алыгъуызон фестивалты хайад кæй райстой, уый тыххæй.
Банысан кæнын хъæуы уый, æмæ Сабырдзинады дунеон фестивалон лагерь «Дети, мир и красота!» сорганизаци кодтой Дунеон æхсæнадон фонд «Российский фонд мира» æмæ Орелы областы ацы организацийы хайад.