Nog adres

Нæ професси у вазыгджын æмæ хъæуæг

23 июлы дзыллон-информацион фæрæзты бонæй нысан цæуы. Уыцы бон 107 азы размæ фыццаг «Ирон газет» ирон æвзагыл мыхуыры рацыд.
Ацы цымыдисон, фæлæ вазыгджын æмæ ахсджиаг професси лæггад кæны дунейы цæрæг адæмæн, алы хæдзармæ дæр хæссы алыгъуызон хабæрттæ.
Хуссар Ирыстоны Информацион фæрæзтæ егъау куыст бакодтой æмæ дунейæн базонын кодтой нырыккон дуджы гуырдзиаг фашизмы фыдмитæ. Уыдон ныр та кусынц фæсхæст æндидзынады æхсызгон хабæрттæ рæгъмæ рахæссыныл.

Журналисты вазыгджын професси куыд æмæ цæмæн равзæрстой нæ республикæйы информацион фæрæзты бæрнон æмæ рæнхъон кусджытæ, уый фæдыл нын сæ хъуыдытæ дзурынц:
Хъуылымбегты Роберт - Паддзахадон телерадиокомпани “Ир”-ы директор:
- Адæймаг йæ хъысмæт бынтон йæхæдæг не скъуыддзаг кæны. Журналистикæйы фа-дыгмæ ме 'взонгæй æз уадиссаг хъусдард не здæхтон. Фылдæр мæ цымыдис здæхт уыд этнографимæ. Фыстон цыбыр уацтæ журнал «Фидиуæг»-мæ, фæлæ уыдон дæр баст уыдысты этнографиимæ. Фæндыд мæ стыр ахуыргонд гоймаг рацæуын. Зындгонд этнографтæ Цыбырты Людвиг, Цоциты Алан-иу мæ арвыстой дард хъæутæм æрмæг æмбырд кæнынмæ.
Цæмæй диссертаци бахъахъхъæнай, уый тыххæй цалдæр уацы хъуамæ ныммыхуыр кæнай. Æмæ зылдтæн хæдзарæй хæдзармæ æмæ сæ фарстон, куыд хуым кæнынц, куыд цæрынц, чындзæхсæвтæ куыд аразынц æмæ афтæ дарддæр.
Журналисты куыст дæр æнгæс у - цæуы æмæ æмбырд кæны информаци. Уацтæ мын мыхуыр цыдысты, уæрæсейаг газеттæ æмæ журналты.
1997 азы «Вестник Южной Осетии», ахæм газет уагъд куы цыд, уæд мæ æрбахуыдтой уырдæм кусынмæ. Мыхуыр цыдысты, кæй зæгъын æй хъæуы, уыцы газеты фæрстыл мæ уацтæ дæр. Кæм-иу мын сæ ме 'мкусджытæ раппæлыдысты мæ уацтæй, кæм - газеткæсджытæ æмæ афтæ мæхиуыл феввæрсыдтæн.
Ацы газет уадзыныл чи куыста, уыцы къорд - Коцты Ингæ, Бабаты Виктор, Гаглойты Вася, Æлборты Валодя, Хъуылаты Мулдар æмæ æз ацыдыстæм паддзахадон телеуынынад аразынмæ. Уым æнцондæр уыд - фыссын куы 'рæхсай, уæд видеоæрмæджытимæ кусын дæр æнцон у.
Фæнды мæ раарфæ кæнын мæ коллегæтæн бæрæгбоны охыл, мæ зæрдæ сын зæгъы, фыццаджыдæр, æнæниздзинад, уый фæстæ та æнæмæнгдæр оптимизм, уымæн æмæ сомбонæй ныфс куынæ уа, уæд куыст зæрдæйæ нæ цæуы. Куыстмæ тырнындзинад дæр у сæйраг, уымæ гæсгæ хорз журналист у æххормаг журналист æмæ хъуамæ уынæм, нæ алыварс хорзæй дæр æмæ æвзæрæй дæр цы процесстæ цæуы, уыдон.
Фæнды ма мæ зæгъын уый, æмæ, уадз, уæт бирæ газеткæсджытæ, телекæсджытæ æмæ радиомæхъусджытæ.
Туаты Ларисæ - газет «Хурзæрин»-ы уацхæссæг:
- Алы адæймагæн дæр царды вæййы æрдзæй рахæсгæ курдиат. Уымæ гæсгæ скъола каст фæуыны фæстæ йæ царды фидæны фæндаг равзары йæ зæрдæмæ æввахслæууæг профессимæ гæсгæ. Уæдæ мæн дæр журналисты дæсныйад равзарынмæ ахæм хъуыды сразæнгард кодта, æвæццæгæн. Скъолайы ахуыры азты рæстæджы мын æхцон-дзинад хаста, сочиненитæ-иу алыгъуызон темæтыл куы фыстам, уый. Уæлдай тынгдæр та фыссын уарзтон мæ мадæлон æвзагыл. Стæй ма мын æхсызгон уый уыдис, æмæ нæ университеты 1994-95 азты журналистикæйы факультет кæй фæзындис. Уæд скъолайы фæстаг азты ахуыргæнгæйæ, аскъуыддзаг кодтон ацы факультетмæ бацæуын. Æмæ абоны онг дæр æз фæсмон нæ кæнын, ацы дæсныйад кæй равзæрстон, ууыл.
Уымæ гæсгæ æз абон арфæ кæнын бæрæгбоны цытæн куыд мæ уарзон коллективæн, афтæ нæ республикæйы æппæт дзыллон информацийы фæрæзты кусджытæн, сæ куысты сын цы уа сфæлдыстадон æнтыстытæ.
Чилæхсаты Алыксандр - газет «Южная Осетия»-йы æхсæнадон-политикон хайады редактор:
- Хæрз чысылæй æз лæмбынæг мæ хъусдард здæхтон, мæ фыд хæдзармæ цы газеттæ «Правда» æмæ «Известия» хаста, уыдонмæ. Фæлдæхтон сæ æмæ сæ дæргъвæтин рæстæг фарстон. Кæй зæгъын æй хъæуы, мæ кармæ гæсгæ, æххæст не 'мбæрстон уацты мидис, фæлæ мæм газеттæм цымыдис баззад.
Нæ бинонтæ се 'ппæт дæр периодикон мыхуыр стыр цымыдисимæ кастысты æмæ чингуытæ, газеттæ æмæ журналтæм æвдыстон стыр цымыдисдзинад æмæ йæ бахъахъ-хъæдтон царды.
Æвзонгæй, газеттæ фæрсгæйæ, æз мæхи æвæрдтон, уацтæ чи фыссы, уыдон бынаты æмæ сæм цасдæрбæрцæй мæхимидæг хæлæг дæр кодтон. Уымæн æмæ мыхуыры фадыджы кусджытæ аразынц æхсæнадон хъуыды, æрцæугæ цаутæм хъусдард здахынц, æндавынц карз критикон мыхуыры æрмæджытæй.
1990 азы 9 сентябры уæрæсейаг централон газет «Советон спорт» ныммыхуыр кодта мæ фарст, кæцы хауд Гарзджын тыхты командæты 'хсæн ССР Цæдисы чемпионат футболæй ауадзын. Ацы бон æз нымайын ме 'нæштатон æмгуыстады райдиан мыхуыры фæрæзты. Уый фæстæ мæ куыст райдыдта газет «Южная Осетия»-йы.
Журналисты професси мæ йæхимæ æлвасы уымæй, æмæ æндавы адæймаджы хъуыдыкæнынадыл, хъуыды сфидар кæныныл, процесстыл æндавы æмæ цард æвдисы йæ алы гуырæнты. Уымæй дæр журналисты професси у цымыдисон, æдзух змæлдимæ баст у.
КЪÆБУЛТЫ М.