Nog adres

Нæ риссаг дзуринæгтæ

20 июны газет «Хурзæрин»-ы бакастæн уац «Бæдтæн куырисыл кæдмæ худдзæнис». Уацы кæрон автор æхсæнады номæй дзуры. Æмæ йын æз стыр бузныджы ныхас зæгъын. Уæндонæй кæй рацыд, иуæй-иу цæстфæливджыты ныхмæ, уый тыххæй. Ау, нæ сомбон нын æгъатырæй чи ныгæны, нæ намыс нын цъыфы чи æв-дулы, уыдонæн цæмæннæ исты барæнтæ исæм сæ ныхмæ? Мæ дзуринæгтæ бирæ сты, фæлæ дзы иу цалдæры кой хъуамæ ракæнон. Ацы бонты «Эхо Кавказа»-йы фæзынд, нæ хæдбардзинад æмæ национ химбарынадыл цъыф чи калы, ахæм уац «Неутешительные перспективы», йæ автор Тарханты Жаннæ. Чи-дæртæ цин кæнынц, гуырдзы нæм сæ ахаст кæй фæфæлмæндæр кодтой, уый тыххæй.

Æз нæ дзурдзынæн уацы мидисыл, фæлæ мæ зæгъын фæнды. Гуырдзы 1920 азæй 2008 азмæ Хуссар Ирыстоны адæмæн цы хъизæмæрттæ бавзарын кодтой, уый Цæгат Ирыстоны абон иуæй-иу бæрнон кусджытæ ферох кодтой бынтондæр. Афтæмæй Николай Цискаридзейæн радтой Цæгат Ирыстоны адæмон артисты кадджын ном æмæ ма йæ лæгъстæмхасæнтæй хонынц аивадон разамонæджы бынатмæ дæр. Уыцы адæймæгтæ та зæдтæ куы фестой, уæддæр сæм Гуырдзыстоны уынгмæрзæджы бынат дæр не 'рхаудзæнис. Худинаг уын уæд, худинаг, æвзæр хорзæй чи не 'взары. Фыццаг хатт гуырдзиаг артист йæ къах æрæвæрдта Ирыстоны зæххыл æмæ йын стыр кады хорзæх йæ риуыл асагътой. Не знæгтæ дæр уый уынæг сты æмæ дзы абон спайда кодтой. Абон Цискаридзейы схорзæхджын кодтой, сомбон та æндæр гуырдзиæгты. Афтæмæй, дур æхсын чи нæ зоны, уый дзы йæ фæскъæбут цæвы, зæгъы фыдæлты æмбисонд. Фæрсын Цæгат Ирыстоны иуæй-иу разамонджыты: мæхъæл уæм куы лæбурдтой, уæ цæрæн бынæттæй уæ куы сырдтой, уæд уæ фарсмæ æххуысмæ гуырдзиæгтæ æви ирæттæ балæууыдысты? Æмæ цы хъуамæ зæгъат. Абоны фæлдурæдджын дуджы Цæгатæй дæр æмæ Хуссарæй дæр нæ зæрдыл хъуамæ дарæм, иу адæм кæй стæм, иу æвзагыл кæй дзурæм.
ДУДАЙТЫ Герсан