Nog adres

Абхазы делегаци фембæлд ирон бархионтæй абхазаг-гуырдзиаг хæсты чи фæмард, уыдоны хиуæттимæ

12-æм июлы Хуссар Ирыстонмæ æрцыд Абхазы делегаци, йæ сæргъ æфсæддон хъуыддæгты фæдыл Республикæ Абхазы президенты уынаффæгæнæг, инæлар-майор Закан Нанба, афтæмæй. Делегцийы сконды ма уыдысты 1992-1993 азты абхазаг-гуырдзиаг хæсты абхазаг æфсады хæстонтæй чи фæмард сты, уыдоны ныййарджытæ.
Цхинвалы уазджытыл сæм-бæлдысты Хуссар Ирыстоны Хъахъхъæнынады министрады минæвæрттæ сæ сæргъ министры хæдивæг Гассеты Ибрагим, афтæмæй. Делегацийы уæнгтæ веноктæ сæвæрдтой Зары фæн-дагмæ фæзилæны мемориалон комплексыл, цыран 2008 азы августы гуырдзиаг æфсæдтæ æхстой хæстæй чи лыгъд, уыцы сабыр цæрджыты, афтæ ма 5-æм скъолайы кæрты мемориалон уæлмæрдыл дæр.

Абхазаг делегацийы сæргълæууæг Закан Нанба куыд загъта, афтæмæй сæ визиты нысан у абхазаг-гуырдзиаг хæсты цы ирæттæбархионтæ фæмард сты, уыдоны ныййарджыты бабæрæг кæнын.
«1992 азы махмæ хæст куы райдыдта, уæд нæм Хуссар Ирыстонæй æрцыдысты бирæнымæц бархионтæ. Хъыгагæн, уыдонæй иуæй-иутæ фæмард сты. Мах абон Цхинвалмæ æрцыдыстæм уый тыххæй, цæмæй сæ ныййарджыты раз нæ сæр ныллæг æркъул кæнæм, бузныг сын зæгъæм æмæ сæ нæхимæ, Абхазмæ фæхонæм. Мах стыр цинимæ уыдоны баулæфын кæндзыстæм нæ санаториты», - загъта Закан Нанба.
Уый зæрдыл æрлæууын кæнгæйæ, зæгъгæ, 30-æм сентябры Абхаз нысан кæндзæн Гуырдзыстонимæ хæсты фæуæлахизы 20-азы, фæмардуæвæг бархионты ныййарджыты фæхуыдта ацы цауы фæдыл бæрæгбонон мадзæлтты хайад райсынмæ.
Уый фæстæ уазджытæ РХИ-йы Хъахъхъæнынады министрады минæвæрттимæ бабæрæг кодтой абхазаг-гуырдзиаг хæсты Хуссар Ирыстонæй цы æхсæз бархионы фæмард, уыдоны ныййарджыты, загътой сын бузныджы ныхæстæ æмæ сæ фæхуыдтой улæфынмæ Абхазмæ.
«Мах Хуссар Ирыстонимæ æрбаиу кодта иу хъысмæт. Мах фæцардыстæм уæлахизы онг, Уæрæсе нын банымадта нæ республикæты хæдбардзинад. Уæдæ, æнæхъуаджы нæ фæмард сты нæ сывæллæттæ. Бузныг Хуссар Ирыстоны æппæт бархионтæн, бузныг сæ ныййарджытæн. Уыдон æнустæм баззадысты нæ историйы æмæ сын мах никуы ферох кæндзыстæм сæ хъæбатырдзинад», - фембæлды банысан кодта æхсæнадон змæлд «Сухумы мæдты» сæрдар, Абхазы æхсæнадон пала-тæйы уæнг Фируза Капба.
Уыцы бон Цхинвалы уыд абхазаг делегацийы цытджын æгъ-дауæй РХИ-йы паддзахадон хорзæхтæй схорзæхджын кæныны церемони.