Nog adres

ТЫБЫЛТЫ ЛЕОНИД: «Хуссар Ирыстоны æмбæстæгтæн æнæкъуылымпыйæ хос кæнынц уæрæсейаг медицинон уагдæтты»

_MG_2374_resize.jpg
10-æм июлы РХИ-йы Президент Тыбылты Леонид республикæйы министрадтæ æмæ ведомствоты къухдариуæггæнджытæн цы оперативон рабадт ауагъта, уым уынаффæ цыд Хуссар Ирыстоны æмбæстæгтæн экстренон медицинон æххуыс бакæныны тыххæй æрвитыны фарстатыл. Рабадты куысты хайад райстой Президенты Администрацийы къухдариуæггæнæг Цоциты Барис, постконфликтон фарстатæ æрбæстон кæныны фæдыл Президенты æххæстбарджын минæвар Джиоты Мурат, Хицауады Сæрдары фыццаг хæдивæг Хъуылымбегты Доменти, Хицауады Сæрдары хæдивджытæ Мелкоев Гурам æмæ Джиоты Аллæ.
Рабадты уынаффæйы сæрмагонд темæ уыд Сырх Дзуары Дунеон Комитеты архайды руаджы Гуырдзыстоны медицинон клиникæтæм Хуссар Ирыстоны æмбæстæгты æрвитыны факттæ кæй сарæх сты, уый.
Паддзахады сæргълæууæг фехъусын кодта, зæгъгæ, рынчынты гуырдзиаг медицинон уагдæттæм æрвитыны факттæ кæй сарæх сты, уыдон сты æнæбындур, уымæн æмæ ис «Экстренон медиционон æххуыс бакæныны нысанæн Республикæ Хуссар Ирыстоны æмбæстæгты республикæйæн æддæмæ хосгæнæн уагдæттæм æрвитыны тыххæй» РХИ-йы Хицауады Уынаффæ, кæцыйы хъуамæ æххæст кæной æппæт хуссарирыстойнаг æмбæстæгтæ. Президенты ныхæстæм гæсгæ, республикæйы æмбæстæгтæн хос кæныны тыххæй иунæг æнæкъуылымпы здæхт сты уæрæсейаг медицинон уагдæттæ.

«Документы ирдæй фыст ис, зæгъгæ, Сырх Дзуары Дунеон Комитеты æмархайдæй рынчын гæнæн ис æмæ æрвыст æрцæуа æндæр паддзахадтæм, стæм цауты, кæд æмæ рынчынæн йæ уавæрмæ гæсгæ аласæн нæ уа Уæрæсейы Федерацийы медицинон уагдæттæм, уæд», - бахахх кодта уый.
Президент бардзырд радта æмбæлон ведомствотæн, цæмæй равзарой ацы фарстатæ æмæ сæ райсой сæрмагонд контролы бынмæ.
Рабадты рæстæджы ма æруынаффæ кодтой иуæй-иу актуалон фарстатыл, кæцытæ хауынц Президентмæ æмбæстæгты куырдиæттæм. Паддзахады сæргълæууæг æрсидт республикæйы æппæт министрадты, ведомствоты æмæ районты администрацитæм, цæмæй уыдон лæмбынæгдæр ахаст дарой адæмы проблемæтæм æмæ сæ бынаты оперативонæй скъуыддзаг кæной.