Nog adres

Цхинвалы аивадон коллективтæ уыдысты Ленингоры районы

Горæт Цхинвалы администрацийы культурæйы хайады ансамбль концертон программæимæ уыд Ленингоры районы. Горæты администрацийы пресс-службæ куыд фехъусын кодта, афтæмæй концерт ауагътой Ленингоры Культурæйы хæдзары æмæ йæм æрæмбырд бирæ адæм.
«Концерт байгом кодта фæсивæдон ансамбль «Аланир», кæцы сæххæст кодта ирон адæмон кæфтытæ. Концерты ма хайад райстой Хуссар Ирыстоны сгуыхт артисттæ Хуыгаты Мадинæ æмæ Козаты Галинæ. Сценæмæкæсджыты зæрдæтæ йæ зарджытæй барухс кодта ирон зарæггæнæг Хаситы Сослан», - банысан кодта пресс-службæйы минæвар.

Уый куыд загъта, афтæмæй артистты зæрдæмæ фæцыд, ленингойраг сценæмæкæсджытæ сæ зæрдиагæй кæй айстой, уый.
«Цхинвалы администрацийы культурæйы хайады ансамблтæ фыццаг хатт уыдысты гастролты Ленингоры. Амæй фæстæмæ уыдон ноджыдæр фæнд кæнынц Ленингоры районы цæрджыты зæрдæтæ ног концертон программæйæ барухс кæнын», - банысан кодта пресс-службæйы кусæг.
Цхинвалы администрацийы культурæйы хайады куыд фехъусын кодтой, афтæмæй концерттæ равдисдзысты республикæйы иннæ районты дæр.