Nog adres

/Æндидзынад/ Адæмæн куысты бынæттæ, пырх агъуыстытæ – къаддæр

img_3356.jpg
Куыд ма хъусын кодтам, афтæмæй Цхинвалы хуыйæн фабрикæйы æндидзынгæнæн-цалцæггæнæн куыстытæ сты сæ тæмæны. Кусджытæ архайынц рæвдз æмæ ныфс бавæрæн ис, сплангонд рæстæгмæ, ома, июлы фæудмæ цалцæггæнæн куыстытæ кæронмæ кæй фæуыдзысты, уымæй.
25-æм июны Президент Тыбылты Леонид бабæрæг кодта, хуыйæн фабрикæйы реконструкцион куыстытæ куыд цæуынц, уый. Йемæ ма уыдысты РХИ-йы Хицауады Сæрдары хæдивæг Мелкоев Гурам æмæ Президенты ад-министрацийы минæвæрттæ. Бæстæйы сæргълæууæгыл фембæлд арæзтадон организаци «БТК-4»-йы генералон директоры хæдивæг Цæкъоты Артур. Тыбылты Леониды цымыдис кодтой ацы объекты арæзтадон куыстыты гъæд æмæ темптæ, фасадæй райдай-гæйæ суанг плиткæйы онг. Генералон директоры хæдивæг бæстæйы сæргълæууæгæн бæстонæй радзырдта, цалцæггæнæн куыстытæ фæуынхъус кæй сты, уый тыххæй.
«Æндидзынгæнæн-цалцæггæнæн куыстытæ цæуынц рæвдз, графикмæ гæсгæ. Ныртæккæ кусджытæ æрæв-нæлдтой малярон-сæрдæн æмæ электромонтажон куыстытæм. Афтæ ма цехты цæттæ кæнæм ифтонггæрзтæ сæвæрынмæ. Ифтонггæрзты иу хай ныридæгæн райстам, иннæ хай та райсдзыстæм æввахс рæстæджы. Иу мæймæ план кæнæм уадзæн-срæвдзгæнæн куыстытæ райдайын», - банысан кодта Цæкъоты Артур.

Президент Тыбылты Леонид бафарста Цæкъойы фырты, объект сцæттæ кæныны тыххæй хæрдзтæ бирæ сты æмæ финансон фæрæзтæ куыд хардз цæуынц, уый тыххæй. Ацы фарстæн уый сдзуапп кодта, зæгъгæ, кусæм объектæн раздæр бацæттæгонд сметæйон документацимæ гæсгæ. Афтæ ма банысан кодта, зæгъгæ, 15 июлмæ хъуамæ 3-æм уæладзыджы куыстытæ æххæстæй кæронмæ фæуой æмæ 27 июлмæ та - бæстыхайы куыстытæ се 'ппæт дæр. Бæстæйы сæргълæууæг объекты цехтыл азилгæйæ, банысан кодта, райгондæй кæй баззад, цалцæггæнæн куыстытæ куыд æххæст цæуынц, уымæй.
Тыбылты Леонид йе 'нæразыдзинад равдыста, уый размæ хуыйæн фабри-кæйы афтæхуыйнæг æндидзынгæ-нæн-цалцæггæнæн куыстытæм чи æрæвнæлдта æмæ цалцæггæнæн куыстытæ мæгуырау гъæд æмæ кæронмæ чи нæ сæххæст кодта, уыцы къухдариуæггæнджыты тыххæй. Загъта ма, хуыйæн фабрикæйы æндидзынгæнæн куыстыты тыххæй уæд стыр æхцайы фæрæзтæ хицæнгонд кæй æрцыдысты, фæлæ, зæгъ, уыдон æмбæлон æгъдауæй хардз не 'рцыдысты. Йе 'нæразыдзинад ма равдыста, хуыйæн фабрикæйы раз уынджы 'рдыгæй цы плиткæ æвæрд æрцыд, уый гъæдджынæй кæй нæ бакуыстой, уый фæдыл дæр.
Хуыйæн фабрикæйы фыццаг уæладзыджы гом рудзгуытæй бакæсгæйæ дæр зыны, куыстытæ рæвдз æмæ гъæдджынæй æххæст кæй цæуынц, уый. Рафидыдтой къултæ, кæцытæ æрдæгæй дæлæмæ сæрст сты сойджын ахорæнæй, ныр та йын æрæвналдзысты йæ астæрдыл плиткæ æвæрынмæ.
Ацы ахсджиаг объект куы скуса, уæд иуæй бирæ рæстæджы æгуыстæй чи бады, уыдонæй 200 адæймаджы бæрцæн куысты бынæттæ фæзындзæн, иннæмæй та нæ горæты фæкъаддæр уыдзæн æрдæгпырх бæстыхæйтты нымæц.
ДЖИОТЫ Екатеринæ