Nog adres

Хицауады/ ФÆФЫЛДÆР УЫДЗЫСТЫ ХÆЛЦАДОН ХÆРДЗТÆ

Æрæджы Хицауады радон æмбырды дзырд цыд къорд ахсджиаг фарстыл. сæйраджыдæр хъусдард аздæхтæуыд нæ республикæйы паддзахадон иумиаг ахуырадон уагдæтты хæлцады хæрдзтæ фæфылдæр кæнынмæ. Ацы фарсты фæдыл сæрмагонд докладимæ раныхас кодта финансты министр Ирина Сытник æмæ фæндон бахаста, цæмæй паддзахадон бюджетмæ ивындзинæдтæ хаст æрцæуа, Цхинвал, Дзау æмæ Ленингоры районты иумиаг ахуырадон уагдæттæн сæ хæлцадон хæрдзтæ фæфылдæр кæныны тыххæй. Зæгъæм, Цхинвалы скъола-интернаты иу адæймагæн хæлцадон хæрдзтæ хъуамæ схизой 80 сомæй 115 соммæ, скъолайыагъоммæ ахуырадон уагдæтты иу адæймагæн 55 сомæй 72 соммæ, скъолаты æнæхъæн бонæн 40-47 соммæ, адарддæргонд къордты дæр 40 сомæй 47 соммæ, горæт Цхинвалы бирæ профилон колледжы дæр 40-47 соммæ. Афтæ ма цæмæй дыккаг аходæн дæр фæфылдæргонд æрцæуа 16- 20 соммæ.
Æмбырды рæстæджы æркастæуыд Республикæ Хуссар Ирыстоны паддзахадон арæнты бынат банысан кæныны уагæвæрдмæ дæр. Хицауады уæнгты размæ фарст æркæсынмæ рахаста нæ республикæйы Паддзахадон æдасдзинады комитеты Арæнхъахъхъæнæг службæйы къухдариуæггæнæг Сергей Колбин. Уый куыд банысан кодта, афтæмæй Уæрæсейы Федераци æмæ Хуссар Ирыстоны ‘хсæн паддзахадон арæны делимитацийы фæдыл кусы æмхæццæ къамис.
«Ацы ахсджиаг куыст бакæныны фæстæ паддзахадон арæны тыххæй арæзт æрцæудзæн сæрмагонд бадзырд æмæ уый фæстæ та банысангонд æрцæудзæн йæ бынат. Проект ист куы ‘рцæуа, уæд уый стыр ахъаз фæуыдзæн дарддæры куысты этапмæ цæттæйæ бахизынæн»,- банысан кодта Колбин.
Æмбырды ма дзырд цыд республикæйы тыхон структурæтæ æмæ барадхъахъхъæнæг органты хæлцадон продукттæн финансон фæрæзтæ фæфылдæр кæныныл дæр.
Финансты министр Ирина Сытник дæр фæндон бахаста, цæмæй Мидхъуыддæгты министрад, Хъахъхъæнынады министрад, Паддзахадон æдасдзинады комитет æмæ Паддзахадон хъахъхъæнынадæн дæр сæ хæлцадон хæрдзтæ иу адæймагæн фæфылдæр уой 68 сомæй 115 соммæ. Фæндон ист æрцыд иумиаг хъæлæсæппæрстæй. Хицауад дæр йæ разыдзинад равдыста нæ республикæйы хæлцадон продуктты гъæд æмæ æдасдзинады закъоны проектмæ.
КОКАЙТЫ З.