Nog adres

«МАХ ДУГ» 11

Æз нæ хастон къæлæт, æз нæ уыдтæн цагъар
Æз сæрибар мæ уды йас уарзтон.
Кæд-иу искуы, мыййаг, мæ цард нал уыд мæ бар
Уæддæр зæхмæ мæ уæраг нæ уагътон.

Ацы рæнхъыты автор – ирон поэзи æмæ прозæйы дæсны Нигерыл ацы бонты сæххæст 115 азы. Иннæ зындгонд ирон дзырды мастер Епхиты Тæтæрийæн та уыд йæ 100-азон юбилей. Уымæ гæсгæ литературон-аивадон æмæ æхсæнадон-политикон æрвылмæйон журнал «Мах дуг»-ы 11-æм номыры мыхуыргонд цæуынц сæ æвзæрст уацмыстæ, сæ æмдугонты мысинæгтæ. Стыр цымыдисаг æмæ нырыккон дуджы дæр ахсджиаг сты Тæтæрийы сатирикон радзырдтæ: «Æз уымæн йæ хъавд «зонын» æмæ «Бæрбæр Бæрбæры фырт».
Журналы егъау бынат (æнæхъæн 70 фарсы) æрцахстой поэт Дзасохты Музаферы «Мæйы дæргъæн азтæ».
Зын сбæлвырдгæнæн у ацы фыстæджытæн сæ жанр. Хуымæтæг мысинæгтæ, ома, мемуартæ сæ рахонæм æви цард æмæ адæймаджы тыххæй философон хъуыдытæ æви Музаферы царды боныгæй скъуыддзæгтæ… зын зæгъæн у.
Цæмæдæргæсгæ журналы разамынад сын радта егъау тыгъдад æмæ 8-æм номырæй райдайгæйæ мыхуыры цæуынц.
Номыры æрмæджытæй мæ цæст æрхæцыд поэт Кокойты Эльзæйы æмдзæвгæтыл. Сты зæрдæмæдзæугæ, курдиатджын. Йæ чызг Гуыцмæзты Рохсанæйæн фыст æмдзæвгæйы Эльзæ зæгъы:
Знаджы дзæхстæй кæд æфхæрд дæн, -
Мацæуыл мæ дом.
Уаз хæзнайæн нын æгъгъæд у
Сахъ Алешы ном.

Журналкæсæджы зæрдæмæ æнæмæнг фæцæудзысты ахæм æрмæджытæ: «Михаил Ломоносов. Хъуыдытæ» æмæ «Мах дуджы равдыст». Ацы рубрикæйы мæ сæрмагондæй фæнды редакцийæн раарфæ кæнын, уымæн æмæ иу номырæй иннæмæ ам мыхуыргонд цæуынц ирон нываивады тынг цымыдисон дæсныты куыстыты къамтæ. Цъары фæрстыл фенæн ис Дзалаты Иринæйы «Мæ хойы сурæт» æмæ Баликъоты Амираны «Маринкæ» æмæ «Кæрты паддзах»-ы. Курдиатджын скульптор Баликъоты Амиран ацы аз апрелы мæйы цæрынхъуагæй фæзиан. Рубрикæ «Мах дуджы равдыст»-ы фыццаг хай у йæ куыстытæй арæзт, дыккаг хай та фенæн ис Дзалаты Иринæйы пейзажтæ æмæ йæ конд ирон бæрæгбонон дарæс демонстрацигæнæг къамтæ.
Цымыдисаг сты журналы кæронбæттæн рубрикæ «Арвистон»-ы æмбырдгонд цыбыр юмористикон уацмыстæ æмæ анекдоттæ.
ДАМБЕГТИ Иринæ