Nog adres

СÆ НÆМТТÆ УЫДЗЫСТЫ ÆНУСОН

DSC03920.JPG
Æрæджы Республикæ Хуссар Ирыстоны Парламент райста «Республикæ Хуссар Ирыстоны хъахъхъæнгæйæ чи фæмард, уыдон ном сæнусон кæныны» цытæн закъон. Адæм хъуамæ зоной сæ хъайтарты, уымæн æмæ уыдон тох кодтой ирон адæмы сæрибардзинадыл, йæ амондджын фидæныл.

Нæ горæтмæ скæсæнæрдыгæй æрбацæуæны 1992 азы Милицийы сæрмагонд нысаниуæджы къорд гуырдзиаг агрессорты æрбабырсты фыццаг бонты æнæмсæр тох кодтой ацы бынаты. Хъæбатырæй фæмард сты милицийы æхсæз хæстоны: Гуыбаты Зураб, Гæбæраты Станислав, Дзабиты Геннади, Юри Кожухов, Александр Михайленко æмæ Санахъоты Григори.

Милицийы сæрмагонд нысаниуæджы къорды командæкæнынады хъæппæрисæй уыцы бынаты арæзт æрцыд ацы æх-сæз хæстоны номыл цыртдзæвæн. Йæ гом кæныны цытджын мадзалмæ æрбацыдысты Республикæйы къухдариуæгад Президент Тыбылты Леониды сæргълæудæй, милицийы къорды службæгæнджытæ, фæмардуæвæг хæстонты хиуæттæ.

Милицийы сæрмагонд нысаниуæджы къорды командир Плиты Игорь йæ раныхасы банысан кодта ацы лæппуты стыр хъайтардзинад уыцы бонты. Бузныг загъта ацы хорз хъуыддаг аразынмæ сæм чи фæкаст, йæ гом кæныны мадзалы хайад чи райста, уыдонæн.

Цытджын уавæрты цыртдзæвæн байгом кæныны фæстæ Республикæйы къухдариуæгад Тыбылты Леониды сæр-гълæудæй дидинджытæ æмæ веноктæ сæвæрдтой йæ разы.

Республикæ Хуссар Ирыстоны Президент Тыбылты Леонид йæ раныхасы банысан кодта, зæгъгæ ацы бынаты бирæ хæттыты æрцыд уæззау тохтæ. «Бирæ лæппутæ, кæцытæ хъуамæ абон уаиккой не 'хсæн æмæ нæ сомбоныл цин кодтаиккам иумæ, уыдоныл ныр абон хъыг кæнæм. Махæй алчидæр хорз хъуыды кæны Ми-лицийы сæрмагонд нысаниуæджы къорд куыд арæзт цыд, уый. Уыцы уæззау бонты æмæ азты милицийы къорд цы сарæзта æмæ бафæрæзта, уыдон сæхæдæг хицæн истори сты. Уыдон хъуамæ зоной нæ кæстæр фæлтæр», - загъта республикæйы сæргълæууæг.
Дарддæр йæ раныхасы æрдзырдта Райгуырæн бæстæйы сæрыл йæ сæр нывондæн чи æрхастой, уыдон рухс нæмттæ сæнусон кæныны тыххæй цы хъуыддæгтæ арæзт цæуы, ууыл. Ныфс бавæрдта, фæмардуæвæг хæс-тонты ныййарджытæ республикæйы къухдариуæгады ‘рдыгæй æнæхъусдард кæй нæ уыдзысты.
«Хуссар Ирыстоны Паддзахадон хæдбардзинад Уæрæсейы Федерацийы 'рдыгæй нымад куы æрцыд, уымæй рацыд фондз азы. Уыцы юбилейон мадзæлтты 'хсæн уыдзæн нæ дзæнæттаг хъæбатырты номыл чингуытæ рауадзын æмæ сæйраг та Мемориалон комплекс саразын. Уыцы комплексмæ хаст æрцæудзысты гуырдзыйы агрессийы рæстæджы чи фæмард, уыдонæй алкæй нæмттæ дæр. Уадз æмæ йæ алчидæр зона, хæдбардзинадмæ тырнгæйæ цас æнæаххос туг ныккалд æмæ уымæн рохгæнæн кæй нæй», - загъта Президент.
Тыбылты Леонид дарддæр йæ раныхасы банысан кодта, зæгъгæ, архайдзыстæм ууыл, цæмæй нæ истори фидарæй-фидардæр кæна, уымæн æмæ йын бындур ацы лæппутæ сæвæрдтой. Æрсидт иудзинад-мæ, хорз сомбонмæ нæ зынгхуыст лæппуты номыл иумæ хъуамæ цæуæм размæ. Бузныг загъта ацы хорз хъуыддаг организацигæнджытæн республикæйы къухдариуæгады номæй.
Цытджын мадзалы раныхас кодтой æмæ сæ зынгхуыст хъæбулты тыххæй радзырдтой Санахъоты Гришик, Гæбæраты Станислав æмæ Александр Михайленкойы ныййарджытæ. Бузныг загътой сæ æгæрон хъусдард æмæ аудындзинады тыххæй республикæйы къухдариуæгад æмæ Милицийы къорды командæкæнынадæн.
КЪÆБУЛТЫ Маринæ