Nog adres

ЦАД - ÆХЦОНДЗИНАДХÆССÆГ

DSC01716.JPG
Сæрд, сæйраджыдæр, у улæфты рæстæг. Фæлæ махæн, хъыгагæн, нæ царды уавæртæ ахæм æмвæзадмæ нæма схызтысты æмæ нæ алчидæр хъуыды кæна, кæм хуыздæр улæфæндоны кæнæ курорты арвита йæ рæстæг. Бирæтæн, тынг бирæ-тæн сæ бон нæу, сæ фадæттæ сæ нæ амонынц нæ республикæйæн æддæмæ ацæуа æмæ зæрдæйы фæндиаг йæ рæстæг арвита, баулæфа, куыд йæ зæрдæ зæгъа, афтæ. Нæ адæм та афтæ сахуыр сты фæстаг дыууын азы сæ уавæртыл, афтæ æрфидыдтой сæ хъысмæтимæ æмæ ссарынц уæддæр зын уавæртæй рахизынæн фадæттæ. Мæнгæй нæ акæнынц, зæгъгæ, мæгуыр фæрæзджын у.
Ацы уавæр бахынцыдтой нæ горæты цæрæг æвзонг, куыстуарзаг лæппутæ Козаты Сергей æмæ Челехсаты Гарик æмæ ма фарон сæрд дæр сфæнд кодтой, улæфынмæ ацæуынæн рæстæг цы сабитæн нæ вæййы, уыдонæн æхцондзинад æрхæссын. Фæлæ фарон сæрды дæр кæд архайдтой, уæддæр уый уадиссаг сæ къухты нæ бафтыд, уымæн æмæ цады донмæ иу кодта канализацион хахх æмæ тæссаг уыд куыд сабитæн, афтæ ма, ам йæхи сæрдыгон тæвд бонты асатæг кæнынмæ чи цыдис, уыдонæн се ‘ппæтæн дæр. Уый æддейæ, йæ алыварс уыдысты алыгъуызон брæттæ. Ныр ацы аз уавæр фæивта. Ссыгъдæг æй кодтой йæ алыварс брæттæй, телцæджындзтыл ссыгъдысты рухсытæ, сæвæрдтой дзы фылдæр фæхсбандæттæ, цады дон ивд цæуы, ауагътой дзы катамарантæ, фæзынд дзы æндæр хиирхæфсæн бынæттæ - чысыл бассейн æртæ чысыл «науимæ» - иууыл чысылтæн, дыууæ хъазæн мотоциклеты, æндæр æмæ æндæр хиирхæфсæнтæ дæр.

Ам фæуæй кæнынц нартхоры цæкуытæ æмæ сæ сывæллæттæ æлхæнынц тынг зæрдиагæй. Рæстæг æрвитыны тыххæй ардæм æрбацæуынц канд сабитæ нæ, фæлæ сæ ныййарджытæ, сæ нанатæ æмæ зæронд дадатæ дæр. Катамарантыл уæлдай тынгдæр ленк кæнын уарзынц фæсивæд, стæй сывæллæттæ дæр. Уыдонмæ сæрмагондæй сæ хъус дарынц хъусдарджытæ. Козайы фырт куыд зæгъы, афтæмæй ма ам ноджыдæр сараздзæнис æндæр хиирхæфсæн аттракционтæ дæр.
Ныр ам ис, сæрмагондæй сыгъдæгдзинадмæ йæ хъус чи дары, ахæм адæймаг дæр. Фæлæ Сергей куыд зæгъы, афтæмæй уым доны былтыл æхсæвыгон фæбадынц нозтуарзджытæ æмæ сæ брон ныууадзынц алы рæтты пырхытæй. Цы бачындæуа, æхсæв дзы хъахъхъæнджытæ нæ сывæрдзынæ, зæгъы Сергей, æмæ цалынмæ адæм нæ сызмæлынц уæдмæ сæ ныссæрфæм, фæткмæ æркæнæм йæ территори.
Нæ горæты цæрджытæн æмæ стæй нæ уазджытæн дæр сæ уарзондæр бынат у ацы цад. Æмæ зæрдæйæн æхсызгон у ацы сæрд сабитæ сæ улæфт кæм суадзой, уый сын кæй фæзынд. Цин кæнынц æвзонг фæси-вæд, сабитæ, сæ циныл та цин кæнынц кæй зæгъын æй хъæуы сæ ныййарджытæ.
Ныфс бавæрæн ис ацы дыууæ æрыгон лæппуйы ноджыдæр кæй равдисдзысты сæ патриотизм æмæ куыстуарзондзинад æмæ ноджыдæр кæй бацархайдзысты цады алыварс фæаивдæр æмæ фæхæрзарæзтдæр кæныныл. Ацы хъуыддаджы та хорз уаид, сæ фарсмæ куы æрбалæууид горæты адми-нистраци æмæ цады территори срæсугъд кæныныл куы бацархаиккой.
БЕСТАУТЫ Валя