Nog adres

ХЫГЪД РАДТОЙ ХИЦАУАДЫ РАЗ

РХИ-йы Хицауады Сæрдар Вадим Бровцев ауагъта æмбырд горæтон æмæ районон администрациты сæргълæуджытимæ, цыран уынаффæ цыдис, Цхинвалы æмæ республикæйы районты бюджетон фæрæзтæ куыд хардз цæуынц, уыцы фарстатыл. Æмбырды ма хайад райстой РХИ-йы финансты министр Иринæ Сытник, Хицауады аппараты кусджытæ.
Администрациты сæргълæуджытæ хыгъд радтой, бюджетон фæрæзтæ хардз кæныны тыххæй, сæйраг хъусдард здæхт æрцыд бынæттон цæрæнуатон-коммуналон хæдзарадты рæзтмæ.
Бавдисгæ докладтæм æркæсгæйæ, Хицауады Сæрдар банысан кодта, зæгъгæ, бюджетон фæрæзтæй пайда цæуы планмæ гæсгæ æмæ Финансты министрадæн бахæс кодта, цæмæй районтæн æххæстæй рахицæн æрцæуой, ацы аз сын нысангонд чи сты, уыцы фæрæзтæ.
Уый нæ хауы Цхинвалы горæтон администрацимæ. Бровцевы ныхæстæм гæсгæ Хицауадмæ сæвзæрыд фарстатæ горæты администрацийы бюджетон фæрæзтæ нысанмæздæхтæй хардз кæныны фæдыл, уыцы нымæцы хи цæрæнуатон-коммуналон хæдзарад рæзын кæныны бæсты коммерцион подрядон организациты æнæбындурæй хоныны фарстайы дæр.