Nog adres

Адæмон музыкæ æмæ кафты концерт

img_9792.jpg
Цхинвалы уыдис адæмон музыкæ æмæ кафты концерт, кæцыйы хайад райстой Хуссар Ирыстоны зард æмæ кафты паддзахадон ансамбль «Симд» æмæ адæмон инструментты оркестр «Айзæлд». Концерты уыдысты РХИ-йы культурæйы министр Кокойты Махарбег, Республикæ Абхазы культурæйы министр Бадра Гунба, аф-тæ ма зонадон æмæ сфæлдыстадон интеллигенцийы минæвæрттæ.
Концерты æххæст цыдысты ирон адæмон æмæ фæсарæйнаг композиторты уацмыстæ. Залæй едзаг адæм сæ къухæмдзæгъдæй дыккаг хатт хуыдтой артистты сценæмæ номыр ногæй сæххæст кæныны тыххæй.
Концерт конд уыд дыууæ хайæ: фыццаг хайы ралæууыд адæмон инструментты оркестр «Айзæлд» композитор æмæ дирижер Уалыты Нинæйы разамындæй; дыккаг хайы та сæ арæхстдзинад æвдыстой паддзахадон ансамбль «Симд»-ы артисттæ.
Йæ тæлмæнтæ концерты фæстæ ИА «Рес»-æн зæгъы нæ горæты скъолатæй сæ иуы рауагътон Годжыцаты Виктория:

«Мæ зæрдæмæ тынг фæцыд концерт - зæлыд иттæг рæсугъд музыкæ, кафджытæ та уыдысты нарты эпосы хъайтарты хуызæн - сæ цæрдæг, æнæлаз фезмæлдтытæ уацары æппæрстой адæймаджы».
Йæ хъуыды ма концерты тыххæй загъта куысты ветеран, пенсиисæг Плиты Верæ: «Симд» та нын ногæй фенын кодта йæ диссаджы профессионалондзинад æмæ цæттæдзинад, тынг æхсызгон у, нæ культурон цард размæ кæй цæуы æмæ афтæ бирæ фæсивæд кæй æрбацыд концертмæ».
Концерт сорганизаци кодта Цхинвалы администрацийы культурæйы, фæсивæды æмæ спорты управлени зард æмæ кафты паддзахадон ансамбль «Симд»-имæ иумæ.