Nog adres

Уæрæсе-Ирыстон | Иумæйаг тыхтæй — рæзты фæндагыл

pravitelstve.pngХуссар Ирыстоны Президент фембæлд Уæрæсейы Регионалон рæзты министримæ
4 июны Хуссар Ирыстонмæ кусæгон балцы æрцыд Уæрæсейы Федерацийы Регионалон рæзты министр Игорь Слюняев. Уæрæсейаг уазæджы Дзауы районы йæ резиденцийы райста РХИ-йы Президент Тыбылты Леонид.
Фембæлды рæстæджы банысан æрцыд, зæгъгæ, уæрæсейаг делегацийы балц уагъд цæуы, 2013 азы 21 майы Сочийы Уæрæсе æмæ Хуссар Ирыстоны президентты фембæлды рæстæджы цы бадзырдтæ сарæзтæуыд, уыдон фæлгæтты.
«Мах ардæм æрцыдыстæм, цæмæй фенæм объектты, базонæм, республикæйы цы арæзт цæуы, уый. Нæ хæс у, ацы азæн Инвестпрограммæ бацæттæ кæнынæн максималонæй баххуыс кæнын, алы объект, фæндаджы арæзтад, социалон инфраструктурæйы объектты, инженерон хызæгтæ фенын æмæ æппæт дæр саразын, цæмæй объекттæ эксплуатацимæ лæвæрд æрцæуой максималонæй цыбыр æмгъуыдмæ», — банысан кодта УФ Регионалон рæзты министрады сæргълæууæг.
Йæ ныхæстæм гæсгæ, Уæрæсе исы æртæазон финансон план, ныридæгæн райдыдтой бюджетон процедурæтæ æмæ Мæскуыйæн ахсджиаг у, цæмæй Хуссар Ирыстоны социалон объектты арæзтадæн рахицæнгонд алы сомæй дæр спайда чындæуа эффективонæй.
«Фæндид ма мæ æруынаффæ кæнын ног кусæн бынæттæ саразыны фарстатыл дæр, уымæн æмæ фаг хъусдард здæхт нæ цæуы экономикæйы реалон сектормæ. Мах нæ разы æвæрæм хæслæвæрд, хæстæг фондз азы дæргъы кусæн бынæтты нымæц 11 минæй 17 мины онг фæфылдæр кæныны тыххæй», — загъта Слюняев.
Уый банысан кодта, Уæрæсейы хайадистæй республикæйы бакондæрцæуæг куыстуæтты кусæн бынæтты динамикæйы гæзæмæ рæзт.
«УФ Регионалон рæзты министрады бæрæггæнæнтæм гæсгæ, ацы 11 мин кусæн бынæттæй 10 мины кусынц социалон сферæйы, уый тыххæй экономикæйы реалон сектор хъуамæ фæтыхджындæр уа», — бахахх кодта ми-нистр.
Уый банысан кодта, зæгъгæ, Инвестпрограммæйы цы объекттæ ис, уыдонæй алкæмæн дæр арæзт цæуы паспорт, уымæн æмæ ахсджиаг у объектты истори, иртасæнты бæрæггæнæнтæ, проектон-сме-тæйон документацийы уæвындзинад, финанскæнынады гуырахст, баззайæццаг аргъ æмæ алы объекты дæр эксплуатацимæ радтыны перспективæтæ æмбарын.
«Махæн тынг ахсджиаг у, цы хуызы фидар кæндзыстæм арæзтцæуæг объектты фæллойадон æмæ зæххон бартæ республикæйы. Уымæн æмæ уый у фидæны фæсауæрцы базæ, республикæйы рæзты фидæны перспективæтæ. Фæндон хæс-сын æргъты рæзты механизмтыл æруынаффæ кæныны тыххæй», — загъта Слюняев.
Йæ рады республикæйы Президент Тыбылты Леонид дæр бахахх кодта, зæгъгæ, Уæрæ-сейы Федераци æмæ Хуссар Ирыстоны президентты Сочийы фембæлды рæстæджы цы куыст райдыдта, уый абоны визит адарддæр кодта.
«Уæд бадзырдæуыд, республикæйы объектты арæзтад кæронмæ бахæццæ кæнын æмæ æххæстбæрцæй ног æнди-дзынгæнæн куыстытæм æрæв-налын», — бахахх кодта Тыбылты Леонид.
Уыцы бон Цхинвалы ауагъдæуыд кусæгон æмбырд, цыран хайад райстой уæрæсейаг æмæ хуссарирыстойнаг хицауиуæгады органты минæвæрттæ. Æмбырды куысты хайад райстой Республикæ Хуссар Ирыстоны Президент Тыбылты Леонид, Уæрæсейы Регионалон рæзты министр Игорь Слюняев, Уæрæсейы Фе-дерацийы Æдасдзинады советы нымæрдары хæ-дивæг Рашид Нургалиев.
Фембæлды райдианы Тыбылты Леонид куыд банысан кодта, афтæмæй Хуссар Ирыстон цадæггай хизы паддзахадон управленийы ног системæмæ.
«Кæй зæгъын æй хъæуы, куысты уæрæсейаг стандарттæм цыбыр рæстæгмæ нæй рахизæн. Фæлæ мах æппæт дæр араздзыстæм, цæмæй уыцы системæимæ баиу уæм. Абон нын уæлæмхас рæстæг нæй, уый тыххæй хъуамæ цæуæм размæ», — фехъусын кодта республикæйы сæргълæууæг.
Йæ ныхæстæм гæсгæ, республикæйы цæрджытæ æмбарынц, æндидзынгæнæн процесс зæрдæйы фæндиаг темптæй кæй нæ цæуы, фæлæ тырнынц ауадзгæ рæстæг баххæст кæнынмæ.
«Зонæм æй, кусын, кусæн бынæттæ саразын, ног куыстуæттæ бакæнын хъæуы. Мах стæм рæзты фæндагыл цæуыны æмæ раздæры рæдыдтытæ ма æруадзыны зæрдæйыуагыл. Уæрæсейаг финансон æххуыс та хъуамæ ссара йæ бынат. Алы сомыл дæр контроль хъуамæ цæуа», — бахахх кодта Президент.
Бакæнгæ куыстыл дзургæйæ, Тыбылты Леонид банысан кодта, зæгъгæ, абон федтам иуæй-иу обектты. Уыдонæй бирæтæ сты фæуынхъус.
«Сæ арæзты рæстæджы бирæ рæдыдтытæ æруагъдæуыд, фæлæ æз мæ разы хæс æрæвæрдтон, цæмæй æппæт куыстытæ дæр райдайой æнæ-мæнгхъæуæг документаци æрбавдисгæйæ. Æппæт банысангонд плæнттæ реализацигонд хъуамæ æрцæуой республикæйы закъондæттынады фæлгæт-ты», — фехъусын кодта Президент.
Йæ рады Игорь Слюняев æрæмбырдуæвджыты базонгæ кодта уæрæсейаг æхсæнведомствойон къорды хæслæвæрдтимæ, кæцы Хуссар Ирыстоны кусдзæн цалдæр боны.
Йæ ныхæстæм гæсгæ, уæрæсейаг æххæстгæнæг хицауиуæгады органты минæвæртты бындурон хæс у, хуссарирыстойнаг коллегæтæн нормативон-методикон æххуыс бакæнын ацы азæн финансон документаци бацæттæ кæныны хъуыддаджы.
«Уымæй дарддæр ма анализ сарæзтæуыдзæн æндидзынады фарстаты уæвæг уавæрæн æмæ бæрæг æрцæудзысты приоритеттæ, куыд ацы азæн, афтæ астæуккагæмгъуыдон перспективæйы», — загъта уæрæсейаг министр.

***
Уæрæсейы Федерацийы Æдасдзинады советы нымæрдары хæдивæг Рашид Нургалиев йæ рады фехъусын кодта, зæгъгæ, Хуссар Ирыстоны арæн-гæрон пункттæ сæхимæ домынц серьезон ахаст, уым цыбыр рæстæгмæ хъæуы бынæттон цæрджыты цардуагон æмæ социалон уавæртæ фæхуыздæр кæнын.
Уæрæсейаг уазæджы ныхæстæм гæсгæ, райрæзты арæнгæрон программæ парахат кæны уыцы цæрæн пункттыл, кæцытæ хъуаг сты скъолатæй, сывæллæтты цæхæрадæттæй, донæй, афтæ ма транспортæй дæр.
«Мах хъуамæ æмбарæм, республикæйы уыдон сæхи иууон бæстæйы кæй хъуамæ хатой», — банысан кодта Нургалиев.
Уый ма хъусдард аздæхта, арæнгæрон цæрæн пунктты цæрджытæ медицинон æххуысæй хъуаг кæй сты, уымæ дæр.
«Уый стыр проблемæ у, алчи дæр æхцайы фæ-рæзтæ æвæры социалон факторы. Ам саразын хъæуы цалдæр модулон фельдшерон-акушерон пункты», — загъта РФ Æдасдзинады советы нымæрдары хæ-дивæг.
Уымæй дарддæр ма банысан кодта, арæнгæрон цæрæг æмбæстæгты вазыгджын уавæр, уыдонæй бирæтæн сæ хæдзæрттæ арæзт кæй сты паддзахадон арæны уæлæ, уый фæстиуæгæн.
«Арæнгæрон саразын бахъæудзæн 200 хъæдын хæдзары, кæцыты арæзтады нæ хъæуы проектон-сметæйон документаци. Ныридæгæн бакуыстæуыд цалдæр проектыл, фидар æрцыдысты сæ æргътæ, сæрмагонд хъусдард здæхт хъуамæ æрцæуа республикæйы ныгуылæн арæнтæм — Дзауы районы Синагур æмæ Карзманы здæхты. Махæн нæ бон сметæтæ саразын суаид, кæд 200 объектæн нæ, уæд 30 уæддæр, цыран ахæм уæззау уавæрæн быхсæн нал ис. Мах хъуыды кодтам, ацы хæслæвæрдтæ хицæн программæйы фæлгæтты среализаци кæнын, фæлæ, гæнæн ис, фыццаг къахдзæфтæ уæвæг Инвестпрограммæмæ бафтауын», — бахахх кодта Нургалиев.
Уый куыд загъта, афтæмæй ма ис ноджы иу ахсджиаг фарста — арæнгæрон районты фæндагон-транспортон инфраструктурæ.
«Уый тынг ахсджиаг у, уымæн æмæ адæм хатынц, ома, кæд Цхинвалы фæндæгты цалцæг кæнынц, кæдæмдæрты бауагътой электроны рухс æмæ газ, уæд ис ахæм бынæттæ, цыран 70-80 азтæй фæстæмæ хъил дæр ничи ныссагъта. Уый æвзæрын кæны серьезон проблемæ, адæмæн та — ахæм уавæры æнæм-барындзинад», — бафиппайдта Нургалиев.
Уый хъусдард аздæхта республикæйы экономикон рæзты ноджы иу пунктмæ — Къуайсайы æрзæткъахæн управленимæ.
«Æндæр æмæ æндæргъуызон цæстæй йæм ис кæсæн, йæ нысаниуæджы тыххæй дзурæн, фæлæ уый у иунæг куыстуат, кæцы Советон Цæдисы рæстæджы комкоммæ уыд ССР Цæдисы Хуызджын металлургийы министрады дæлбар. Сахуыр æмæ саргъ кæнын хъæуы ацы æрзæтгуырæнæй спайда кæныны æууæлтæн. Æз зонын, уымæ цымыдис кæнынц немыцаг специалисттæ, кæцытæ дзы ссардтой стæмзæххон згъæртæ. Абон уыдон цæттæ сты æхца нывæрынмæ, сæ бæстæйæ дард ранæй уыцы згъæрты æрласыны тыххæй, æгæрыстæмæй, æнæсыгъдæггондæй», — банысан кодта уæрæсейаг уазæг.
Уыимæ иумæ ма Нургалиев банысан кодта, зæгъгæ, инвестортæ Хуссар Ирыстонмæ куы бацымыдис кæной, уæд æнæмæнгæй сæвзæрдзысты зæххы ахастыты фарстатæ.
«Инвестицитимæ ардæм ничи æрцæудзæн, амалиуæггæнæгæн объекты, зæххы сфидар кæныны бар куынæ уа, уæд. Уыдон ахæм закъæттæ сты, кæцытæ æнæхъæн дунейы сты бындурон. Уый серьезон проблемæ у, гæнæн ис, æмæ ам мах ныццауæзæм», — бафиппайдта уый.