Nog adres

ЦЫРТ - ХÆСТЫ ФÆМАРДУÆВÆГ ХÆСТОНТÆН

satik.jpg
9 майы Цхинвалы районы Сатихъары хъæуы, Уæлахизы 68 азы цытæн баконд æрцыд цырт, ацы хъæуы цæрджытæй Стыр Фыдыбæстæйон хæсты чи фæмард, уыдонæн.
Монумент бакæныны церемонийы хайад райстой РХИ-йы Президент Тыбылты Леонид, Парламенты Сæрдар Коцты Станислав, Президенты Администрацийы, Хицауады минæвæрттæ, уæрæсейаг арæнхъахъхъæнджытæ, УФ-йы Хъахъхъæнынады министрады 4-æм æфсæддон базæйы æфсæддонтæ, хъæуы цæрджытæ.
Уазджытыл хъæуы цæрджытæ фембæлдысты ирон æгъдаумæ гæсгæ - æртæ уæливых æмæ хæдзарон арахъхъимæ.
«Абон мах ардæм æрбацыдыстæм, цæмæй ноджыдæр æрымысæм уыцы салдатты нæмттæ, кæцытæ ацыдысты фронтмæ Сатихъары хъæуæй æмæ 1941 азæй 1945 азмæ Стыр Фыдыбæстæйон хæсты быдырты фæхæцыдысты.

Ахæм хуызы фæмардуæвæг салдатты нæмттæ сæнусон кæнын чи сфæнд кодта, уыдонæн стыр бузныг. Мах сын хъуамæ арæм сæ рухс нæмттæ æмæ сын ма рох кæнæм сæ хъайтардзинад, кæцы нæ æркодта уæлахиз-мæ», - загъта Тыбылты Леонид.

Цырт саразæг, республикæйы адæмон нывгæнæг Икъоты Никъалайæн бузныджы ныхæстæ загъта республикæйы ветеранты советы сæрдары хæдивæг Уалыты Гайоз.

«Стыр бузныг, цырт саразын æмæ йæ байгом кæнынæн чи баххуыс кодта, уыдонæн се 'ппæтæн дæр. Карз тохты чи фæмард, уыдон ацы цырт нал фендзысты, фæлæ нæ рæзгæ фæлтæр номгай зондзысты сæ хъайтарты», - загъта Уалыйы фырт.
Нывгæнæг Икъоты Никъала куыд загъта, афтæмæй цырт аразыныл бахъуыд фондз мæйы. Цырты æвдыст цæуы хæстæй æрыздæхæг салдат, кæцы мысы йæ фæмардуæвæг хæстон æмбæлтты.
Цхинвалы районы администрацийы сæргълæууæг Плиты Алан куыд загъта, афтæмæй ахæм цырт æвæрд æрцыд 8 майы Джеры хъæуы дæр.
Мадзалы кæронбæттæны сæ аивад равдыстой Сатихъары скъолайы сфæлдыстадон кружок.