Nog adres

Ныстуан | Æмзонд æмæ æмдыхæй — хуыздæр фидæнмæ

lenia.jpeg Æппæт дунейы бæстæтæн сæ фылдæр хайы традицион у паддзахады сæргълæууæджы æрвылазон Ныстуан адæм æмæ Парламентмæ. Традицион уыдис нæ республикæйы дæр, кæд нырма фыццаг æмæ фæлварæн къахдзæфтæ кодтам не 'взонг паддзахады арæзтадмæ, æмæ алыгъуызон паддзахадон уагæвæрдтыл ахуыр нæма уыдыстæм, уæддæр. Стæй нæ, цæмæдæр гæсгæ, иу рæстæджы «айрох». Афтæмæй та хъæуы, хъæуы нæ - æнæмæнгхъæуæг хъуыддаг у. Президент у адæмы æвзæрст, æмæ адæмы фылдæр хай се 'ууæнк кæуыл бафтауой, уый хъуамæ афæдзæй-афæдзмæ йæ бакæнгæ куысты тыххæй хыгъд радта йæ адæмы раз, базонгæ сæ кæна йæ дарддæры фæндиæгтимæ, паддзахады раз цы хæстæ ис, уыдон куыд æмæ цы амæлттæй æххæст кæнынмæ хъавы, æппæт уыдæттимæ. Паддзахады сæргълæууæг бæрндзинад цы адæмы раз хæссы, уыцы адæмимæ цас æргомдæр æмæ æнгомдæр уа, уый бæрц ын æнцондæр уыдзæн кусын йæ адæмы, йæ бæстæйы хæрзиуæгæн. Нæ фыдæлтæ æнæхъуаджы нæ дзырдтой, æмзонд цуанæттæ саг марынц, æнгом бинонтæ цард арынц, зæгъгæ.

Знон нæ республикæйы Президент Тыбылты Леонид сарæзта йæ фыццаг Ныстуан республикæйы цæрæг адæм æмæ Парламентмæ. Ахæм мадзал нæм рагæй кæй нал уыд, уымæ гæсгæ æрхонгæ адæм бæрæгбонвæлыст æмæ хуыздæр фидæныл æууæндыны зæрдæйы равгимæ цыдысты хицауады æмбырдгæнæн залмæ. Ам уыдысты Хица-уады уæнгтæ, Парламенты депутаттæ, горæттæ æмæ районты сæргълæуджытæ, интеллигенци æмæ сфæл-дыстадон, æхсæнадон организациты минæвæрттæ.
zal_0.jpegТыбылты Леонид сæрысуангæй æрдзырдта нæ паддзахады уæвæг æддагон æмæ мидæггагон проблемæтыл, нæ рæзгæ республикæйы къухы бафтгæ æнтыстытыл. Президент стыр аргъ скодта нæ адæмы хъæбатырдзинад æмæ фæразондзинадæн, демократон размæцыдæн бындур æрæвæрыны хъуыддаджы цæвиттойнаг архайдæн. Æппæт зынтæн дæр кад æмæ радæй кæй ныффæрæзтам, уый нæ æркодта демократон цардарæзтадмæ, нæ паддзахады хæдбардзинад банымайынмæ. «Æндидзынадæй - рæзтмæ». Афтæ схуыдта Президент йæ Ныстуан. Иу аз бирæ нæу, нæу стыр ивындзинæдтæ æмæ æнтыстытæ къухы бафтын кæныны фаг. Æмæ кæд нæ къухы алыварсон æмæ зæрдæйы фæндиаг æнтыстытæ нæ бафтыд, уæддæр ис зæгъæн, аивгъуыйгæ аз иу ран кæй нæ бадтыстæм, нæ бон кæй у иу къорд политикон-социалон нысаниуæджы æнтыстытæ рæгъмæ рахæссын. Уый та, сæйраджыдæр, баст у стыр Уæрæсейы аудгæ ахаст æмæ нæ бæстæты 'хсæн æнусты дæргъы бахсидгæ хæлардзинадæн аргъ кæнын, æмгуыстадмæ æппæтфарсон тырнындзинадыл. Йæ Ныстуаны дыккаг хайы Президент сæйраг хъусдард аздæхта фидæны размæцыдмæ хауæг фарстатæм: фыццаг рады политикон-экономикон æмæ арæзтады къабазы хуыздæр фæстиуджытæ фенын кæнын, æнæниздзинад хъахъхъæныны объекттæм фылдæр хъусдард аздахын, барадон æмæ закъондæттынадон базæ сфидардæр кæнын, социалон сферæйы проблемæтæ, цардуагон хъуагдзинæдтæ гæнæн уæвгæйæ аиуварс кæнын, зонад æмæ ахуырады къабазы бирæ лыггæнинаг фарстатыл кусын, аивад æмæ культурæйы нысаниуæг бæрзонддæр æмвæзадмæ сисын, æмæ афтæ дарддæр. Паддзахад æмæ адæмы 'хсæн хъуамæ æппæт дæр уа æргом. Адæм хъуамæ зоной сæ хæрзгæнджыты дæр æмæ сын сæ царды размæцыдæн ныхдуртæ чи æвæры, уыдоны дæр. Уæлдай хъусдард аздæхтæуыд, фæсхæсты арæзтадон-æндидзынгæнæн куыстыты къуылымпыдзинæдтæ æмæ адæмы фæрныгадæн рахицæнгонд фæрæзты паплой кæнынмæ. Алчи дæр хъуамæ радта дзуапп адæмы, закъоны раз. Фæлæ уæддæр æмæ уæддæр Президенты сæйраг нысан у адæмы, æхсæнады иудзинад, кæрæдзиæмбарынад æмæ нæ рæзгæ паддзахады раз фылдæр бæрндзинад æнкъарын.
Рæстæг æмæ нын техникон аххосæгтæм гæсгæ фадат кæй нæй, уымæ гæсгæ уæ Президенты Ныстуанимæ æххæстæй базонгæ кæндзыстæм нæ газеты радон номыры.