Nog adres

Уазæгуаты хорз у, фæлæ хи хæдзары хуыздæр у

Нæ горæты цард цадæггай йæ гаччы кæй бады, уымæн æвдисæн сты, фæстаг цалдæр мæйы эксплуатацимæ лæвæрд цы арæзтадон объекттæ æрцыдысты, уыцы нымæцы, куыд цæрæн корпустæ æмæ хæдзæрттæ, афтæ паддзахадон уагдæттæ, уыдон.

Ацы аз марты мæйы эксплуатацимæ лæвæрд æрцыд, ныр дæргъвæтин рæстæджы цалцæг чи цыд, уыцы бирæпрофилон колледжы бæстыхай дæр. Колледжмæ бахизгæйæ, нырма æнкъардæуы бæстыхайы ног цалцæджы тæф, æмæ уый ноджы зæрдæйæн цахæмдæр æхцондзинад хæссы. Къæлидортæ æмæ хатæнтæм кæсгæйæ, адæймаг йæхинымæр бабуц вæййы æмæ ахъуыды кæны, зæгъгæ, мæнæ аргъæутты куыд вæййы, уымæй авд ахæм хуыздæр куы фестад. Хæрзæфснайд, райдзаст, уæрæх хатæнтæ æмæ къæлидортæм кæсгæйæ, адæймаджы уырны, тагъд рæстæджы нæ республикæ йæ къахыл кæй слæудзæн æмæ дзы кæй нал уыдзæн æрдæгпырх хæдзæрттæ æмæ уынгтæ.

2008 азы августы хæсты Цхинвалы æндæр корпустæ æмæ ахуырадон уагдæттæм гуырдзиаг лæгхортæ сæ дæрзæг æрмттæй куыд бавнæлдтой, афтæ сæ æппæрццаг фæд ныууагътой раздæры хъæууонхæдзарадон техникумы бæстыхайыл дæр, ныппырх æй кодтой æмæ йæ сæндидзын кæныныл цъус тыхтæ æмæ финансон фæрæзтæ куынæ бахардз, мыййаг.

Фæлæ сæ цæрæнбон бирæ нæ ног хицауадæн Президент Тыбылты Леониды сæргълæудæй, уый æппæт тыхтæй дæр архайы хæсты фæстиуджытæ аиуварс кæныныл, йæ рыст зæрдæ, фæллад адæмы цард фæхуыздæр кæныныл.
2008 азы хæсты фæстæ, уæд нырма хъæууонхæдзарадон техникумы коллектив æмæ студентты бахъуыд ахуыр кæнын хæдзарæн æдтейæ, ома, нырма иу азы бæрц ахуыр кодтой Цхинвалы 10-æм астæуккаг скъолайы æмæ уый фæстæ техникумæй бирæпрофилон колледж арæзт куы æрцыд æмæ йæ контингент куы фæфылдæр, уæд сын ацы скъолайы хатæнтæ кæй нал фаг кодтой, уымæ гæсгæ сæ бахъуыд 3-æм астæуккаг скъоламæ бацæуыны сæр. Фæлæ ам дæр ахуыр кодтой къуындæг æмæ зын уавæрты, нæ сын фаг кодта хатæнтæ. Уымæ гæсгæ «Автоматикон системæты программон ифтонгады» дæсныйады студенттæ ахуыр кодтой нæ горæты сывæллæтты техникон станцы æмæ хæринагаразæг-кондитеры дæсныйады студенттæ та нæ горæты скъола-интернаты. Ахæм уавæрты нормалон ахуырадон процесс æмæ практикон ахуыртæ та зын уадзæн сты. Уазæгуаты хорз у, фæлæ хи хæдзары хуыздæр кæй у, уымæ гæсгæ бирæпрофилон колледжы коллектив æнæрхъæцæй æн-хъæлмæ каст раздæры хъæууонхæдзарадон техникумы бæстыхай кæд фæуыдзæн цалцæггонд æмæ сæхимæ кæд рацæудзысты, уыцы бонмæ. Æмæ мæнæ марты мæйы сæ бæллиц сæххæст. Нырыккон домæнтæн дзуапп чи дæтты, уыцы бæстыхайы 18-æм марты уагъд æрцыдысты фыццаг ахуыртæ æмæ ма сæ цинæн кæрон кæм уыд колледжы коллектив æмæ студенттæн.
Бирæпрофилон колледжы ахуыры хайады сæргълæууæг Тыбылты Джульеттæ нын радзырдта ахуырадон уагдоны тыххæй æмæ загъта: «Мах тынг райгондæй баззадыстæм бæстыхайы цалцæггæнæн куыстытæй, æппындæр нæм ницы претензитæ ис. Арæзт дзы æрцыд хъармгæнæн системæ дæр æмæ студенттæ уазалы нал фæлмæцынц, ис нæм хæринаггæнæн дæр, кæцы ифтонг у æппæт нырыккон ифтонггæрзтæй, ис дзы хъарм дон, ам хæринаггæнæг-кондитерон хайады студенттæ цæудзысты практикæ дæр. Нырма студенттæн нæй хъарм сихор, фæлæ сын вæййы цай, какао, булкæтæ». Уый фæстæ нæ райзæрдæйæ азилын кодта уагдоны хатæнты, бацыдыстæм, программонтæ цы дыууæ хатæны ахуыр кæнынц, уырдæм дæр æмæ нæ зæрдæ тынг барухс. Хатæнтæ ифтонг сты компьютертæй. Кæд сын раздæр 6 компьютеры йедтæмæ нæ уыд, уæд сын ныр æлхæд æрцыд ноджы 19 ног компьютеры æмæ сын ныртæккæ иууыл иумæ ис 25 компьютеры. Кæй зæгъын æй хъæуы, уый хорзæрдæм æндавы студентты ахуырыл. Ахуыры хайады сæргълæууæг ма куыд загъта, уымæ гæсгæ сын «Автомеханик» æмæ «Строительство здании и сооружений»-йы хайадтæн нырма нæй æрмадзтæ, фæлæ уыдон дæр иу азы æмгъуыдмæ арæзт æрцæудзысты колледжы кæрты, фæлæ уал уæдмæ студенттæ практикæ цæудзысты æндæр арæзтадон объектты.
Ныртæккæ колледжы ис 5 дæсныйады хайады - «Повар-кондитер», «Программное обеспечение вычислительной техники и автоматизированных систем», «Строительство и эксплуатация зданий и сооружений», «Мастер отделочных строительных работ» æмæ «Автомеханика». Абон колледжы ахуыр кæны 162 студенты, уый кæд раздæры, ома, Советон Цæдисы рæстæгимæ абаргæйæ бирæ къаддæр у, уæддæр азæй-азмæ студентты нымæц фылдæр кæны. Гуырдзиаг агрессийы размæ техникумы уыд дыууæ уырыссаг æмæ гуырдзиаг секторы, студентты нымæц-иу схызт 600 онг, уыдис-иу дзы стыр конкурс. Тыбылты Джульеттæйы ныхæстæм гæсгæ, ног ахуыры азæй сæ зæрды ис хъæууон хæдзарады æмæ хуыйæджы хъуыддаджы ноджы дыууæ дæсныйады хайады бакæнын. Æмæ уæд горæты æмæ районты æрыгон фæси-вæдæн професситæ равзарыны хъуыддаг ноджы фæуæрæхдæр уыдзæн. Ног ахуыры азмæ сын «Швейное дело»-йы хайады материалон-техникон базæ ныри-дæгæн цæттæ у, балхæдтой хуыйæн машинæтæ дæр æмæ ацы хайад æнæкъуылымпыйæ конд æрцæудзæн 2013 азы 1-æм сентябры. «Фермерское дело»-йы хайады бындур дæр хъуамæ бацæттæ кæной æввахс рæстæ-джы, цыран фæнд кæнынц агрономон, зоотехникон, ветеринарон фельдшеры æмæ механизаторы дæсныйæдтæ бакæнын, кæцытæ абон тынг хъæуынц нæ республикæйы.
«Ленингоры районæй нæм абон ничи ахуыр кæны, дæргъвæтин æмæ æвзæр фæндаджы аххосæй, фæлæ ныр фæндаг фæцыбырдæр æмæ план кæнæм ацы дæрддаг районæй фæсивæды фæхонын. Махæй алчидæр хъуыды кæны, Ленингоры районæй Цхинвалмæ цас хъæууонхæдзарадон продукттæ ластой, уый, сты тынг куыстуарзаг адæм æмæ сæм хорз специалисттæ куы фæзына, уæд уый хъуыддагыл хорзæрдæм бандавдзæн æмæ та раздæрау бæркадджын суыдзæн сæ бы-дырты тыллæг», - банысан кодта ахуыры хайады сæргълæууæг.
Куыд зонæм, афтæмæй раздæры хъæууонхæдзарадон техникумы æмдзæрæндоны ныр 20 азæй фылдæр цæрынц лигъдæттæ æмæ уый фæдыл колледжы къухдариуæгад фæнд кæны студенттæй искæйы цæрæнуат куы хъæуа, уæд уый тыххæй нæ университеты æмæ скъола-интернаты къухдариуæгадимæ бадзурын, цæмæй сын уыдон рæстæгмæ хатæнтæ радтой.
Колледжмæ цы фæндаг цæуы, уый дæр уыд æдзæллаг уавæры æмæ йæм ныр æрæвнæлдтой аразынмæ, ныридæгæн уал ыл ныккалдтой хуыр. Ацы фæндагыл УФ æмæ Хуссар Ирыстоны хъайтар Денис Ветчиновы цырт æвæрд кæй æрцыд, уымæ гæсгæ йæ хъæуы тынг хорз саразын. Афтæ ма нырма тыхсынц, транспорт сæм æвзæр кæй цæуы, уый тыххæй дæр, фæлæ сæ зæрды ис ацы проблемæйы тыххæй горæты администрацимæ бахатын, цæмæй сын ацы хъуыддаг дæр скъуыддзаг æрцæуа. Колледжы ис библиотекæ дæр, кæд дзы нырма бирæ чингуытæ нæй, уæддæр уыдоны нымæц дæр фæфылдæр уыдзæн.
Æрæджы бирæпрофилон колледжы 13 студенты хайад райстой РЦИ-Аланийы уагъдцæуæг æвзæнгты 'хсæн профессионалон дæсныйады чемпионаты. Студентты чемпионатмæ фæхуыдта Æрыдоны аграрон-технологон техникумы директор Моурауты Алан. Ныртæккæ та колледжы студенттæ сты горæт Самарайы, уым дæр уагъд цæуы ахæм чемпионат æмæ та колледжы коллективы ныфс ис, уым дæр сæ хъомылгæнинæгтæ сæхи хорз кæй равдисдзысты, уымæй æмæ та уым дæр хорзæхджын кæй æрцæудзысты зæрдылдарæн лæвæрттæ æмæ сертификаттæй.
ДЖИОТЫ Екатеринæ