Nog adres

Ног хæдзары - зæрдæрухс цард. Президент азылд арæзтæдтыл

Ацы бонты Президент Кокойты Эдуард Хицауады бæрнон уæнгтимæ радон хатт азылд æмæ бынаты бабæрæг кодта арæзтадон объектты æмæ капиталон æгъдауæй цалцæг чи цæуы горæт Цхинвалы, уыцы сæрмагонд æмæ муниципалон цæрæнуæттыл. Куыд рабæрæг, афтæмæй иуæй-иу пырх хæдзæртты арæзтады ныццауæзтæн ис дзæвгар аххосæгтæ. Бирæты дзы арæзтадон куыстытæ нæ райдыдтой хæдзæртты хицæуттæн сæхи аххосæй, бирæтæ та разы не сты арæзтадон куыстыты æмгъуыдæй дæр. Арæзтадон объекттæ эксплуатацимæ радтын æмæ арæзтады гъæдæн дзуапп чи дæтты, уыцы министрадтæ æмæ ведомствоты къухдариуæггæнджытæн Кокойты Эдуард бакодта конкретон хæстæ, сæвзæргæ уавæртæ æрнывыл кæныны тыххæй.
prez2.JPG
«Аразинаг хæдзæртты номхыгъдты æркæнут æмбæлон уагмæ. Æрбæстон кæнут æппæт сæвзæргæ проблемæтæ æмæ сыл æрдзурут финансты министрадимæ. Мах хъуамæ бæлвырдæй зонæм, фæрæзтæ ма нæ цас бахъæудзæн, уый, цæмæй ныппырхгонд хæдзæрттæ се ‘ппæт дæр арæзт æрцæуой»,- Президент ахæм хæс бакодта нæ республикæйы Паддзахадон арæзтадон комитет æмæ финансты министрадæн.

Республикæйы сæргълæууæг ма бабæрæг кодта нæ горæты 2-æм сывæллæтты рæвдауæндон æмæ Парламенты хæдзар дæр.

Кокойты Эдуард бирæсывæллонджын Мæргъиты Димитры бинонтæн та балæвар кодта Мæскуыйаг микрорайоны коттедж. Ацы мæй Мæргъиты бинонты хæдзары рухс дунемæ фæзынд æртæ кæстæры - æртæ фазон Кокойты Эдуард Мæргъиты бинонтæн хæдзар лæвар кæнгæйæ куыд банысан кодта, афтæмæй ацы хæдзар резервон фонды уыд ахæм хъæлдзæг ахсджиаг цауы тыххæй. «Куы фехъуыстон æртæ фаззоны уын райгуырд, уæд æз аскъуыддзаг кодтон ацы хæдзар сымахæн балæвар кæнын, цæмæй уæ цыппар кæстæримæ иумæ цæрат зæрдæрухсæй»,- банысан кодта Кокойты Эдуард.

Балцы фæстæ нæ республикæйы сæргълæууæг сарæзта æмбырд, цыран хайад райстой Хицауады уæнгтæ, Президенты администрацийы уæнгтæ, æхсæнадон химæисæн, арæзтадон структурæйæн дзуаппдæдтджытæ æмæ Цхинвалы горæты администрацийы минæвæрттæ.
prez1.JPG
Кокойты Эдуард куыд банысан кодта, афтæмæй æхсæнадон химæисæнмæ арæзтадон объектты фæтк халыны тыххæй цы 62 куырдиаты ‘рбацыд, уыдонæй 12 объекты бынаты бæрæг æрцыдысты, æмæ дзы цы проблемæтæ рабæрæг, уыдонæн æрнывылкæнæн уыд æнæ республикæйы сæргълæууæджы архайдæй дæр, сæ хæстæ рæстмæ куы æххæст кодтаиккой, уæд. «Адæммæ хъæуы байхъусын æмæ семæ ныхас кæнын, сæ проблемæтæ сын скъуыддзаг кæнын. Нæ сын хъæуы уæлдæр инстанцитæм амонын æмæ дзурын, зæгъгæ, уын æрмæстдæр республикæйы сæргълæууæг аскъуыддзаг кæндзæн уæ фарст. Афтæ дзурыны бæсты сын хъæуы æххуыс кæнын», - банысан кодта Кокойты Эдуард. Президент ма йе ‘нæразыдзинад равдыста «Стройтехконтроль»-ы службæйы куыстмæ дæр, ома, æмбæлонæй не ‘вдисынц сæ принципиалон ахаст, арæзтæдты цы згъуыдтæ ауагъдæуыд, уыдон иуварс кæнынмæ, номхуындæй та горæт Цхинвалы зæххыбын коммуникациты арæзтады. Уыдон арæзт цæуынц Уæрæсейы «Нывæстытæ æмæ проекттæ реализаци кæныны Хуссайраг дирекци»-йы заказæй. «Абон сымах куынæ равдисат уæ принципиалон позици æмæ куынæ аиуварс кæнат подрядон организацитæн сæ куыстыты згъуыдтæ, уæд райсом, куыдфæндыйæ дæр, махæн уыцы згъуыдтæ аиуварскæнинаг фæуыдзысты æмæ нæ уым та бахъæудзæн нæхи бюджетон фæрæзтæ»,- банысан кодта Кокойты Эдуард. Бæстæйы сæргълæууæг ма бафæдзæхста, цæмæй горæты коммуникацитæ ивыны рæстæг цы фæткхалæн цаутæ ‘рцыд, уыдон бавдыст æрцæуой Уæрæсейы регионалон рæзты министрадмæ. Уымæн æмæ «Хуссайраг дирекци» ис уыдон ведомствойы дæлбар.

Президент ма нæ республикæйы Арæзтадон программæтæ æмæ проекттæ реализаци кæныны паддзахадон комитетæн бахæс кодта, цæмæй финансты министрадимæ сбæлвырд кæной, арæзт цы хæдзæрттæ цæуынц, уыдон номхыгъдтæ æмæ æрбавдисой сæ куырдиæттæ куыстытæ æххæст кæнынæн финансон фæрæзты тыххæй.

Президент Хицауады бæрнон уæнгтæм æрсидт, цæмæй фылдæр кусой адæмимæ, сæйраджыдæр та стырдæр хъусдард аздахой Стыр Фыдыбæстæйон хæсты ветеранты проблемæтæм. Афтæ ма 2008-æм азы хæсты æфхæрдбаййафджытæн æмбарын кæной арæзтадон процесс.

Кокайты Зæринæ