Nog adres

Мадзал - Нобелы премийы лауреатты цытæн

nobell.jpg
Колыты Аксойы номыл Цхинвалы Аи-вæдты паддзахадон лицейы уагъд æрцыд литературæйæ Нобелы премийы лауреат-ты цард æмæ архайды цытæн мадзал.
Мадзалмæ хуынд æрцыдысты Респуб-ликæ Хуссар Ирыстоны Хицауады Сæрдары хæдивæг Джиоты Аллæ, Ахуырады министр Цыбырты Маринæ, Хуссар Ирыстоны Россотрудничествойы минæварады къухдариуæггæнæг Михаил Степанов, паддзахадон университеты ахуыргæнджытæ æмæ æндæртæ.
Æрæмбырдуæвджытæн лицейы ахуыргæнинæгтæ радзырдтой Нобелы премимæ кæй бавдыстой, уыцы зындгонд фысджыты сфæлдыстады тыххæй. Æвзонг лицейонтæ банысан кодтой дунеон культурæйы Редьярд Киплингы, Рабиндранат Тагоры, Ромен Ролланы, Бернард Шоуы, Иван Бунины, Эрнест Хемингуэйы, Борис Пастернакы, Михаил Шолоховы æмæ æндæрты хайбавæрд.
Мадзалы организатор, Аивæдты лицейы уырыссаг æвзаг æмæ литературæйы ахуыргæнæг Плиты Риммæйы ныхæстæм гæсгæ, ацы фысджытæ Нобелы премийы аккаг систы се ‘нувыд куысты фæрцы.

«Абоны мадзал куы цæттæ кодтам, уæд равзæрстам ахæм фыстджыты, кæцытæ æввахс уыдысты нæ зæрдæтæм, нæ миддунемæ, кæцыты сфæлдыстад махæн уыдис æввахс. Литературæйæ Нобелы премийы лауреаттæ сты 108 адæймаджы, кæй зæгъын æй хъæуы, уыдонæй алкæуыл нæ бон не суыдаид дзурын ацы мадзалы», - банысан кодта Плион.

10-æм къласы ахуыргæнинаг Елизавета Петраченко ныфсджынæй загъта, зæгъгæ, сомбоны нобелянтты номхыгъды гæнæн ис фæзына Хуссар Ирыстоны æмбæстæгты нæмттæ дæр.
Цыбырты Маринæ бузныджы ныхæстæ загъта мадзалы организатортæн, ахæм хорз тæлмæнтæ сын кæй балæвар кодтой, уый тыххæй.
«Мæн бафæнддзæн, цæмæй уæ ахуыргæнинæгтæн уа стыр æнтыстытæ æмæ сæ мах та уæм сæрыстыр», - загъта министр.
Мадзалы кæрон ахуырдзауты раз раныхас кодта Джиоты Аллæ.

«Мадзалмæ сæрæй кæронмæ æз кас-тæн уæ цæстытæй, æмæ кæд зонддзинад æмæ æцæгдзинад ис цæстыты, уæд уынын, куыд хъæздыг у Хуссар Ирыстон, æмæ мæ уырны, Ирыстоны сомбон æу-уæнкджын къухты кæй ис», - загъта Джиоты Аллæ.
Йæхи рады Михаил Степанов дæр бузныджы ныхæстæ ракодта æмæ центры номæй зæрдылдарæн чингуытæ радта мадзалы организатортæн.