Nog adres

ЦÆГАТ ИРЫСТОНЫ

ПОЭЗИЙЫ БАЗЫРТЫЛ...
Фæстаг азты нæ хистæр кары фысджыты уарзон ныхас ссис, курдиатджын фæсивæд нæм нæй, зæгъгæ. Æцæг у уыцы курдиæттæ раргом кæныныл архайгæ дæр уыйас ничи кæны. Фæлæ ис ахæмтæ, æмæ сфæлдыстадон фæсивæдæн æцæг зæрдийæ чи æххуыс кæны. Ныр æрвылаз æвдæм хатт спорт æмæ фæсивæды хъуыддæгты фæдыл министрады хъæппæрисæй арæзт æрцæуы райдайгæ поэтты конкурс «Цвети, Осетия моя!». Конкурсы нысан у æрыгон курдиæттæ раргом кæнын æмæ сын æххуыс кæнын, адæмы рæгъмæ сæ поэтикон рæнхъытæ рахæссын сæ цинтæ æмæ сæ хъыгтимæ.

Сфæлдыстадон фæсивæдыл аудæг куынæ уа, куы ничи сæ нымайа, уæд фылдæр хатт курдиаты цæхæр бамынæг вæййы. Афтæ хъуыды кæнынц конкурсы организатортæ, спорты æмæ фæсивæды хъуыддæгты фæдыл министрады бæрнон кусджытæ Диакъонты Тимур æмæ Хъороты Димитр.
Ацы аз конкурсы архайдта бирæ фæсивæд республикæйы уæлдæр ахуыргæнæндæтты студенттæй. Æрыгон поэтты сфæлдыстадæн аргъ кодтой жюрийы уæнгтæ: ЦИПУ-йы ирон филологийы факультеты декан, журналист Хозиты Барис, поэт Касаты Батрадз, прозаик, журнал «Дарьял»-ы бæрнон нымæрдар Саламты Таймураз. Бирæ зæрдæмæхъаргæ æмдзæвгæтæ зæлыд уыцы бон сценæйæ. Зын уыд хуыздæрты равзарын, фæлæ жюри равзæрста се 'ппæтæй хуыздæрты: фыццаг бынат лæвæрд æрцыд Паддзахадон медицинон академийы студенткæ Аслæмырзæты Дзерассæйæн, дыккаг бынат райста æфсæнвæндаджы транспорты техникумы студенткæ Мысыккаты Аланæ æмæ æртыккаг бынаты аккаг та ссис Гергиты Валерийы номыл аивæдты лицейы ахуырдзау Мария Шманатова. Уæлахиздзаутæ хорзæхджын æрцыдысты министрады дипломтæ æмæ зынаргъ лæвæрттæй. Аслæмырзæты чызг та æвдыст æрцыд фæсивæдæн æххуысы фæдыл национ проект «Образование»-йы фæлгæтты преми райсынмæ. Банысан кæнын хъæуы уый, æмæ нырмæйы конкурсты уæлахиздзаутæ кæй сарæзтой сæхи поэзийы клуб æмæ уый дæр кæй схуыдтой «Цвети, Осетия моя!». Жюрийы уæнг Хозиты Барис куыд загъта, афтæмæй бæрæг у, конкурс кæй суыдзæн традицион, поэзи уарзджытæн та уыдзæн бæрæгбон. Рацæудзæн азтæ æмæ дзы бирæ курдиатджын поэттæ зæгъдзысты, кæддæр се сфæлдыстадон фæндаг конкурс «Цвети, Осетия моя!»-йæ кæй райдыдтой.
Нæ уацх.