Nog adres

ХУССАРИРЫСТОЙНАГ ЛÆППУЙЫ ÆНТЫСТЫТÆ РОСТОВЫ ОБЛАСТЫ

katia_0.jpg
Ацы бонты Интернеты бакастæн цхинвайлаг лæппу Уанеты Вадимы æнтыстыты тыххæй, кæцы ныртæккæ цæры горæт Ростовы æмæ йын ис йæхи сæрмагонд маргъдарды комплекс «Евродон». Уанеты Вадим райгуырд Цхинвалы 1961 азы. Йе 'мбæстагон хæс бафидыны фæстæ 1988 азы каст фæцис Новочеркаскы политехникон институт æмæ райста инженер-механикы дæсныйад. Уыцы аз райдыдта бизнесы архайын дæр. Ис ын бинонтæ æмæ æртæ сывæллоны. Компани «Евродон» арæзт æрцыд 2003 азы, 2006 азы райдыдта йæхи рауадзгæ гогызы фыдызгъæл уæй кæнын. Ныртæккæ «Евродон» у уæрæсейаг базары гогызы фыдызгъæл уадзынæй лидер. Ныгуылæйнаг партнертæ йын йæ компанийæн куыд саргъ кодтой, уымæ гæсгæ абон «Евродон» у дунейы нырыккон гогызы комплекстæй сæ иу. Компанийы æнтыстджын рæзты фæрцы Ростовы областы Октябры районы фæзынд 1700 кусæгон бынаты.
Ивгъуыд аз компани «Евродон» фæфылдæр кодта йæ рауадзгæ продукци 16 проценты æмæ рауагъта 39,6 мин тоннæйы гогызы фыдзгъæл удæгас уæзы. Уый руаджы Ростовы областы Октябры район сси маргъы рауадзгæ продукцийы бæрæггæнæтæм гæсгæ абсолютон лидер иннæ муниципалон компаниты 'хсæн. Ростовы областы губернатор Васили Голубев раарфæ кодта компани «Евродон»-ы генералон директор Уанеты Вадимæн æмæ йæ схорзæхджын кодта «Ростовы областы социалон-экономикон рæзтмæ йе стыр хайбаврæды» тыххæй Кады грамотæйæ. 2012 азы 29-æм ноябры «Деловой квартал» ауагъта æрвылазон хæдбар регионалон преми «Человек года». Фæбæрæг сты 11 фадыгон номинациты уæлахиздзаутæ. «Евродон»-ы генералон директор Уанеты Вадим сси хæлцадон сæудæджерады азы адæймаг. Афтæ ма Уанеты лæппумæ ис ноджы бирæ хорз фæндтæ йæ комплекс рауæрæхдæр кæныны фæдыл.

Цхинвайлаг лæппу рохуаты нæ уадзы йе 'мзæххонты дæр. Уымæн йæ компанийы кусы бирæ ирæттæ, уыцы нымæцы Хуссар Ирыстонæй дæр.
Зонгæ уæ кæнæм комплекс «Евродон»-ы пресс-службæйы хъусынгæнинагимæ дæр.
5-æм апрелы Уæрæсейы Федерацийы Хъæууонхæдзарды министр Николай Федоров бабæрæг кодта Ростовы дзидзакуыстгæнæн маргъдарды комп-лекс «Евродон»-ы æмæ базонгæ мæргъты хъомыл кæныны процессимæ.
Комплекс уыныны рæстæджы министр бацымыдис кодта уыцы гогызы хъысмæтмæ, кæцыйы нывæй уый размæ «Евродон»-ы генералон директор Уанеты Вадим дисы баппæрста паддзахады фыццаг адæймæгты.
- Цæры! - загъта министрæн Уанеты Вадим. Гиннессы рекордты 39 килограммы хъауджыдæр евродонаг гогызы уæз у 45 килограммы онг. Фæлæ ацы маргъ у нæхи мæргъты сæрмагонд мыггаг, кæцы дæтты инкубацион айк. Æргæвдынæн цы мæргъты хъомыл кæнæм, уыдоны уæз 20 килограммæй фылдæр нæу!
Дзидзакуыстгæнæн комлексыл экскурсийы фæстæ министры фæхуыдтой продукцийы дегустацимæ, цыран ассортименты 40 хуызы 'хсæн равдыстой ног бакуыстгонд продукци: гогызæй салями, зельц, гузка æмæ æндæр продукттæ.
- Ницæй тыххæй йæ нæ базыдтаин хуыйы фыд кæнæ стуры фыд кæй нæу, уый. Хъæуы гогызы фыдызгъæлмæ рахизын - ам холестерин нæй! - дегустацийы рæстæджы йæ комментаритæ загъта министр.
- Æз ныридæгæн бирæ фехъуыстон «Евродон»-ы æмæ йæ курдиатджын адæймæгты тыххæй, кæцытæ кусынц ам, афтæ йæ чи сарæзта, къухдариуæггæнæг, «Евродон»-ы автор Уанеты Вадимы тыххæй, - фехъусын кодта Николай Федоров. Дисы мæ æппарынц æрмæст комплексы экономикон бæрæггæнæнтæ нæ, фæлæ ма продукты хæлцадон гъæд дæр. Продуктты гъæд æмæ перспективæтæ мыл ныууагътой стыр тæлмæнтæ. Нæй базонæн, æппæт ацы алыгъуызон продукттæ гогызы фыдызгъæлæй арæзт сты, уый. Продукт уадзынмæ ахæм ахаст дарынæй, ацы проектæн ис стыр фидæн. Йæ перспективæтæ сты тынг хорз.
Министр бахæс кодта, цæмæй бацæттæ кæной кусæгон фембæлд «Евродон»-ы компанийы проекттæн баххуыс кæнын æмæ æмархайды конкретон фарстатыл æруынаффæ кæныны тыххæй.
Æрмæг мыхуырмæ
бацæттæ кодта
ДЖИОТЫ Екатеринæ