Nog adres

ЛЕУАХИЙЫ ХЪАРÆГ - ТЕРЧЫ ЗАРÆГ?..

kikabidze.jpg
Æгас дунейы цæрæг адæмтæ гуырдзыйыл дисæй мæлынц, сæхи уæлбикъон кæй æнхъæлынц, афтæ кæй нымайынц, Хуыцау сæ сæрмагонд адæмæй сфæлдыста, уый тыххæй. Фæлæ цæмæн афтæ у, уый кой ничи кæны. Ис ахæм æмбисонд: адæм дæ сохъуыр куы хоной, уæд хъуамæ дæ иу цæст бацъынд кæнай. Уый махмæ, ирæттæм дæр хауы, фæлæ æппæт адæммæ, ома, нацимæ ахасты нæ, - иугай гоймæгтæм. Кæмæйдæр, зæххон адæймаг уæвгæйæ, хуыцау саразæм, фæтабу йын кæнæм. Стæй уый дæр бауырны, хуыцау кæй у, æмæ нæм уæлейæ бынмæ куы 'ркæсы, уæд та йыл къахæй балæгæрдæм.
Уыцы миниуæг гуырдзымæ дæр ис. Цæвиттонæн сын æрмæст сæ Мишикъойы хъысмæт куы 'рхæссæм, уæддæр фаг у. Фæлæ уыдон хуыцæуттыл нымайын æппæт гуырдзиæгты дæр, кæд кæрæдзи хъуын-хъис хæрынæй сæ диссаг ныхъхъæр, уæддæр.
Уæддæр цæмæн? Уымæн æмæ сæ фæйнæрдыгæй буц кæнынц æмæ уыдон дæр сæхимæ ныззындысты, сæхи комы дæгъæл, бæсты бикъ банхъæлдтой. Уæрæсейаг телеканалтæй искуы гениалон Шаляпины кой фехъуыстат? Никуы. Уый хыгъд Сосо Павлиашвилийæ цæстытæ сцъæх сты. Æмæ цы у? Цы йæ хъæлæс у, цы - йæ бакаст. Йæ гуырдзиаг акцентæй хъусты дæлгоммæ сынчъытæ зайы, йæ бакаст - æртындæсæм хъыбыл сылыйæ куыд ныддæнгæл уа, уый хуызæн. Уырыссаг зарджыты кæлæнгæнæг зæлтæ фæхуыдуг сты, иронæй чи сгуырдзиаг, уыцы Меладзейы хъыллисты.

Стъыгъддæндаг Кикабидзейы чи слæг кодта, эстрадæйы стъалы дзы чи сарæзта, Мæскуыйы иууыл хуыздæр бынæтты йын ресторантæ бакæныны фадат чи радты, уыцы уырыссаг адæмыл бату кодта, уæддæр æй уарзынц, йæ зарджыты йын мысынц. Байхъус сæм, уæд æнæ чито-грито уырысæн цæрæн нал ис.
Уæдæ куыднæ хъуамæ ныззыной гуырдзы сæхимæ, сæхи уæлбикъон куыднæ æнхъæлой!
Фæлæ мах, ирон адæм та цы ми кæнæм? Кæд хъæр кæнæм, иу дин, иу æвзаг, иу культурæ нын кæй ис, уæд нын иу знаг цæмæннæ хъуамæ уа? Кæд иу адæм стæм (æмæ стæм), уæд нын цæгатæй хуссармæ æмхуызон знæгтæ хъуамæ уой мæхъæлæттæ дæр æмæ гуырдзиæгтæ дæр, уымæн æмæ нæ туг, не стæджы знæгтæ сты.
Гуырдзиаг эмиссартæ Цæгат Ирыстонмæ цæуыны фæнд куы скодтой, уæд нæ республикæйы Президент Тыбылты Леонид загъта, зæгъгæ, Ирыстоны цæгат æмæ хуссар хайы æхсæн хъавынц цурк ныкъуырынмæ. Фæлæ Цæгат Ирыстоны нæ загътой афтæ. Кад æмæ сыл цытимæ сæмбæлдысты, пъатæ, хъæбыстæгæнгæ сæ æрзилын кодтой сæ фæрныг къуымты.
Цæгат Ирыстон куынæ уыдаид æмæ уаид, уæд нал уыдаид Хуссар Ирыстон дæр. Мах æнæкæрон бузныг стæм нæ цæгаттаг æфсымæртæ æмæ хотæй, фæлæ цæмæн, цæмæн нын риссын кæнынц алыхатт нæ рыствæллад зæрдæты?.. Паддзахадон газетты ахæм диссæгтæ фенæм, æмæ нæ уырнгæ дæр нæ бакæны, ацы газеттæ æфсымæрон адæммæ цæуынц, уый. Августы хæсты хæдфæстæ Дзæуджыхъæуы сæйраг базары цы æвирхъау теракт æрцыд, уый фæдыл Михаил Саакашвили тел ныццавта Цæгат Ирыстоны Сæргълæууæгмæ, цыран «осуждает терроризм» (!) Æмæ йын паддзахадон газеттæ йæ телы текст мыхуыр кæнынц æнæ комментарийæ. Афтæ йын ничи загъта: фыццаг террорист дæхæдæг куы дæ, уæд кæцы терроризмы ныхмæ дзурыс?.. Ныр рæстæг куы рацæуа, Цæгат Ирыстоны августы хæсты фæстæ чи райгуырд, уыцы сабитæ куы бахъомыл уой, уæд сæ куыд бауырндзæн, Саакашвили Ирыстоны иу хайæ быгъдæг быдыр аразынмæ кæй хъавыд, уый?..
Ацы бонты газет «Северная Осетия» ныммыхуыр кодта иу къаннæг уац æнахуыр диссаджы рубрикæйы бын «Неужели?» Цæуыл у йæ дис æмæ йæ цины сæр паддзахадон газетæн? Уæрæсе æмæ Гуырдзыстоны 'хсæн хъарм ахастытæ кæй фæзынд,ууыл. Æмæ гуырдзыйы хонынц æфсымæрон адæм! Кæд, дам, цæфæй нæ мæлыс, уый та дын - рæхуыст!
Уацы кæсæм, зæрдæйы тугтæ кæмæй тæдзынц, ахæм рæнхъытæ: «Особенно радует, что после долгого перерыва в Москву собирается приехать народный артист СССР Вахтанг Кикабидзе».
Ныр бафæрсæм нæхи, чи у махæн Кикабидзе? Уый у, уыцы фыццаг зындгонд гуырдзиаг, кæцы æргомæй рацыд, чи йæ слæг кодта, уыцы Уæрæсейы ныхмæ, Хуссар Ирыстоны адæмы бынтон скуынæгæй кæй бахызта, уый тыххæй, бату йыл кодта.
Ам ма комментаритæ хъæуы? Цæмæн?..