Nog adres

Политикæ | Гуырдзыстоны нæ фæнды реалондзинад уынын

murat_10.jpgАцы аз, 26-27 марты уагъд æрцыдис Женевæйы дискусситы радон рабадт. Куыд зонæм, афтæмæй ацы дискусситæ уагъд цæуынц 2008 азæй фæстæмæ, хæст куы æрлæууыди, уæд Медведев-Саркозийы сразыдзинадмæ гæсгæ, Хуссар Ирыстон æмæ Абхазы республикæты ныхмæ Гуырдзыстон тыхæй ма спайда кæныныл сæ къухтæ куы бафыстой, уæдæй нырмæ. Уæдæй фæстæмæ Женевæйы дискусситæ цæуынц 23-æм хатт.
Хуссарирыстойнаг делегацийы сæргъ уыд постконфликтон æрбæстонкæнынады фарстаты фæдыл РХИ-йы Президенты æххæстбарджын минæвар Джиоты Мурат.

Женевæйы дискусситы рæстæджы цы вазыгджын фарстатæм æрцыдис хъусдард, уыдоны фæстиуджытимæ нæ базонгæ кодта Джиоты Мурат. Уый куыд загъта, афтæмæй ацы хатт дæр рабадты рæстæджы цыдис тынг вазыгджын æмæ уæззау ныхас. Раздæр куыд уыд, афтæ ныр дæр дискусситæ цыдысты дыууæ хицæн сæрмагонд къордæй. Фыццаг къорды уæнгтæ фæдзурынц æдасдзинады фарстатыл, дыккаг та — гуманитарон фарстатыл.

«Кæй зæгъын æй хъæуы, махæн æмæ Гуырдзыстонæн нæ ныхас кæрæдзийыл нæ бады, алчидæр йæхи позицитыл лæууы. Сæйраг ныхас уыди ацы ахсджиаг бадзырдтæ бацæттæ кæныны тыххæй, фæлæ цæмæй ацы бадзырдтæм бахæццæ уæм, уый тыххæй нæ позицитæ кæрæдзиимæ тынг дард сты. Æнудæсæм раунд куы уыд женевæйаг дискусситæн, уæд Уæрæсейы делегаци ахæм идейæимæ рацыд, цæмæй дискусситы уæнгтæ саразой сæрмагонд хъусынгæнинаг, цæмæй хæцæнгарзæй нырæй фæстæмæ пайдагонд ма æрцæуа. Ныхасæй алчидæр уыцы хъусынгæнинаджы хъуыдыйы фарс у, фæлæ гуырдзыйы делегацийы минæвæрттæ æппæт дæр аразынц, цæмæй ацы иумæйаг хъусынгæнинаг арæзт ма æрцæуа, фæлæ нæ ныфс ис æмæ ацы хъусынгæнинаг нæ радон фембæлды рæстæджы ист æрцæудзæн», — загъта Джиоты Мурат.
Джиоты Мурат ма куыд фехъусын кодта, афтæмæй стыр полемикæ сæвзæрын кодта, Хуссар Ирыстон æмæ Гуырдзыстоны ‘хсæн цы паддзахадон арæн ис, уый алфæмблай хъахъхъæныны фарст. Рабадты рæстæджы дискусситы хайадисджытæн фехъусын кодтам, зæгъгæ, арæх арæ-ны режим хæлд кæй æрцæуы, ахæм факттæ, ома, куыд иу фарсæрдыгæй, афтæ иннæ фарсæрдыгæй дæр арæны сæрты ахизынц æнæзакъонæй.
«Банысан кæнын хъæуы уый, æмæ Гуырдзыстон æмæ ныгуылæйнаг бæстæтæй сæ фарсхæцджытæ ацы арæн хонынц административон арæнгæрон хахх, нæ сæ фæнды æмæ йæ схоной паддзахадон арæн. Фæлæ мах карзæй загътам, зæгъгæ, фæнды уæ æви нæ, арæн у паддзахадон æмæ йæ сæрты ахизын уыдзæн, æрмæстдæр паддзахадон арæны сæрты ахизыны цы режим вæййы, уый æнæфехалгæйæ», — банысан кодта Джиоты Мурат.
Уый куыд загъта, афтæмæй арæны сæрты ахизыны режим арæзт цæуы Хуссар Ирыстоны закъондæттынадмæ гæсгæ, æмæ нæ республикæйы цы нормативон акттæ кусынц арæнты тыххæй, уыдонмæ гæсгæ.
Йæ ныхæстæм гæсгæ ма рабадты рæстæджы уæлдай хъусдард аздæхтой, Эргнеты цы фембæлдтытæ вæййы, уым дæр лæмбынæгæй кæй æркастæуыд ацы фарстмæ, зæгъгæ, цæмæй Хуссар Ирыстоны арæны алыварс арæзт æрцæуа ахæм зонæ, кæцы сæрибар уыдзæн хæцæнгарзæй Гуырдзыстоны фарсæрдыгæй æмæ æрсидтыстæм, Евроцæдисы хъусдарджытæм уый сæ комкоммæ хæс кæй у æмæ йыл цæмæй лæмбынæгæй бакусой. Уымæй уæлдай ма æрæмбырдуæвджыты хъусдард аздæхтам, цæмæй Хуссар Ирыстоны уæлдæфон тыгъдад хæлд ма цæуа, уымæн æмæ фæстаг рæстæджы ахæм факттæ хынцыд æрцыдысты.
Рабадты рæстæджы стыр хъусдард аздæхтæуыд гуманитарон фарстатæм. Дзырд цыд доны фарстыл, Ленингоры районы газæй сифтонг кæныны фæдыл.
«Цæмæй Ленингоры районы Гуырдзыстон газæй ифтонг кæна, уый фæдыл быцæу ныхас цыдис Гуырдзыстоны минæвæрттимæ. Кæд раздæр Ленингоры район газæй ифтонг цыдис Гуырдзыстоны фарсæрдыгæй, уæд 2008 азæй фæстæмæ уыдон Ленингоры цæрджытæн газ нал радтой. Цыппар азы дæргъы дзырдтам Гуырдзыстонимæ, цæмæй уыдон дарддæр дæр ифтонг кæной цæрджыты газæй æмæ мах цæттæ уыдыстæм газы аргъ фидынмæ. Фæлæ уыдон разыдзинад нæ равдыстой. Гуырдзыстоны ног хицауад куы ‘рлæууыд, уæд ахæм уынаффæ рахастой, зæгъгæ, разы сты Ленингоры цæрджыты газæй сифтонг кæныныл, фæлæ йæ скодтой тынг зынаргъ, 1 мин кубометрæн æркуырдтой 390 доллары. Уый, кæй зæгъын æй хъæуы, у тынг зынаргъ æмæ не сразы стæм ахæм хъуыдыимæ. Фехъусын сын кодтам, зæгъгæ, нæхæдæг ацы фарст аскъуыддзаг кæндзыстæм, рухс æмæ фæндаджы фарст куыд аскъуыддзаг кодтам, афтæ», — загъта Джиоты Мурат.
Фембæлды рæстæджы ма дзырд цыд историон æмæ культурон цыртдзæвæнты фарстатыл дæр.
ТАНДЕЛАТЫ Виленæ