Nog adres

Уæрæсе - нæ иумæйаг Фыдыбæстæ/ «ÆППÆТ ИВЫНДЗИНÆДТÆ ДÆР ХЪУАМÆ ХУЫЗДÆРЫРДÆМ АХАДОЙ ÆХСÆНАДЫ ЦАРДЫЛ»

Знон горæт Ростовы йæ куыст кодта «Æппæтуæрæсейон адæмон фронт»-ы конференци. Æмбырды архайдта æмæ раныхас кодта Уæрæсейы Президент Владимир ПУТИН. Конференцийы архайджытæ бæстон æркастысты бæстæйы царды ахсджиагдæр фарстатæм.
«Зынаргъ хæлæрттæ! Зæрдиаг салам уын дæдтын «Æппæтуæрæсейон адæмон фронт»-ы фыццаг конференцийы куысты рæстæг. Фыццаджы-фыццагдæр мæ зæгъын фæнды, ахæм уæрæх фембæлдтыты фæлгæтты хæстæгдæр мæйты рæстæг арæх кæй æмбæлдзыстæм, уый тыххæй. Уымæн æмæ, фарон Президенты æв-зæрстыты рæстæджы цы програм-мæтæ снысан кодтам, уыдонмæ хъæуы лæмбынæг цæстдард, æхсæнады 'рдыгæй дæр, стæй Хицауады 'рдыгæй дæр. Кæй зæгъын æй хъæуы, дунеон экономикæйы бирæ лыггæнинаг фарстатæ фæзынд, бирæ хъуыддæгтæ нырма æбæлвырд сты. Фæлæ цы рæзты программæтæ сфидар кодтам, уыдонæй иу дæр хъуамæ рох ма уа.

Гæнæн ис, æмæ цард цавæрдæр ивддзинæдтæ хæсса уыцы программæтæм. Фæлæ уыцы ивындзинæдтæ хъуамæ арæзт цæуой æргомæй, æхсæнады цæстдардæй. Адæм сæ куы ‘мбарой, зæрдæмæ дæр сæ уæд райсдзысты. Æппæт ивындзинæдтæ дæр хъуамæ хуыздæрырдæм ахадой æхсæнады цардыл», - ахæм хъуыдытæ загъта йæ раныхасы Президент.
В. Путины ныхасмæ гæсгæ, «Æппæтуæрæсейон адæмон фронты» размæ бирæ хæстæ лæууы, ацы организацийы бындурыл кæрæдзийы фарсмæ æрбалæууыдысты, бæстæйы рæзтмæ алыхуызон цæстæнгас чи дары, ахæм адæм. Уыдонæн фадат уыдзæн æргом быцæуныхасы фæрцы фидыдмæ æрцæуынæн, бæстæйы дарддæры рæзты программæтæ снысан кæнынæн.
Президент фæндон бахаста, цæмæй «Æппæтуæрæсейон адæмон фронт»-ы бындурæвæрæн съезд арæзт æрцæуа 11-12 июлы. Фæстæдæр конференцийы архайджытæ сæ фарстатæ радтой Владимир Путинмæ. Кæй зæгъын æй хъæуы, иу фембæлды рæстæг Президентæн фадат нæ уыд æппæт фарстатæн дæр дзуапп радтын, фæлæ сæ сæйрагдæртæ æнæ дзуаппæй нæ баззадысты. Уыдон та баст уыдысты не 'хсæнады царды æппæт къабæзтимæ дæр: экономикон рæзт æмæ сидзæр сывæллæттæ, нæ Фыдыбæстæйы истори æмæ Фæллойы Хъæбатыры кадджын ном, æмæ афтæ дарддæр.
Конференцийы чи архайдта, æмæ Президентæн йæ хъуыдытæ зæгъыны фадат кæмæн фæци, уыдонæй иу уыд бирæсывæллонджын мад Наталья Сарганова. Президент æй уайтагъддæр базыдта. Æрæджы, Кремлы бирæсывæллонджын ныййарджытæн куы кад кодтой, уæд уыцы æмбырды На-тальяйæн Президент радта паддзахадон хæрзиуæг.
«Æз хъомыл кæнын 37 сидзæр сывæллоны, уыдонæй дыууæ сты мæхи сывæллæттæ. Кæй зæгъын æй хъæуы, не 'рвылбоны царды вæййы лыг-гæнинаг фарстатæ. Фæлæ нын паддзахады разамынд æмæ регионалон администрацитæ зæрдиаг æххуыс кæнынц. Уый тыххæй сæ стæм бузныг», - загъта Наталья Сарганова.
Фембæлды архайæг, Паддзахадон Думæйы депутат Валери Трапезников фæндон бахаста, цæмæй сног кæнæм Фæллойы Хъæбатыры кадджын ном. Уыцы хъæппæрисыл Президент сразы. Йæ ныхасмæ гæсгæ, боны кæронмæ уыцы фарста лыггонд æрцæудзæн.
Конференцийы архайджытæ боны фæткмæ цы фарстатæ рахастой, уыдоныл дарддæр ныхас цæудзæн.
«Рæстдзинад»