Nog adres

УДВАРНЫ, ИУДЗИНАДЫ ÆМÆ СЫГЪДÆГДЗИНАДЫЛ

film.jpg
Æрæджы хуссарирыстойнаг киномæкæсджытæн равдыстой киноныв «Куырыхон зæронд». Уый дзурæг у г. Рылскы Николайы аргъуаны бардарæг архимандрит Ипполиты цард æмæ дунеон архайдыл. Архимандрит амард дæс азы размæ. Цымыдисон уый у, æмæ кæд Ирыстоны никуы уыд, уæддæр стыр куыст кодта, цæмæй дзы чырыстонад сæндидза. Беслæны алайнаг Рухс Успенаг нæлгоймæгты аргъуан æмæ Уæрæсейы территорийыл иууыл хуссайрагдæр Алагиры алайнаг сылгоймæгты аргъуан байгом сты йæ амындæй. Кинонывы автор æмæ режиссер Алагиры алайнаг сылгоймæгты аргъуаны бардарæг, не ‘мзæххон ингумен Нонна (Багаты чызг) куыд загъта, афтæмæй уый у «киноныв - мысинæгтæ». «Уарзын, хæрзаудæн, быхсын, барын уымæн хуымæтæджы ныхæстæ нæ уыдысты. Уыдон уыдысты йæ царды уаг, йæ дадзинты чи уыдис, уыцы туг», - зæгъы Ноннæ.
Сахаты дæргъы чи цæуы, уыцы кононывы æндæр æмæ æндæр адæймæгтæ дзурынц ацы диссаджы адæймаджы тыххæй, йемæ фембæлыны фæстæ сын сæ цардыл куыд бандæвта, уыдæтты тыххæй. Ноннæ йæхæдæг дæр дзуры кинонывы, фыд Ипполитимæ йæ фыццаг фембæлды тыххæй. Журналист уæвгæйæ, уый æрцыд Рухс Николайы аргъуанмæ, цæмæй Ипполитæй райстаид интервью. Фæлæ хъуыддаг фæзылд æндæрæрдæм – фыд Ипполит æй сразæнгард кодта аргъуаны куыстмæ.
Кинонывы сæйраг идейæ у хуссайраг æмæ цæгаттаг ирæтты, афтæ уыдон æмæ Уæрæсейаг адæмы удварнон иудзинад фидардæр кæнын, куыд иууон Ирыстон сæндидзын æмæ сфидар кæныны бындур, афтæ.

«Зæгъын хъæуы уый æмæ горæт Рылскы Рухс Николайы аргъуынмæ кæй æрбацæуынц бирæ ирæттæ æмæ-иу сын кæддæриддæр фыд Ипполит дзырдта: «Аздæхут Ирыстонмæ, аразут, æндидзын кæнут аргъуанты, хъахъхъæнут Уæрæсейимæ иудзинад æмæ æппæт дæр уыдзæнис хорз». Мæ хъуыдымæ гæсгæ уымæн йæ хъуыдыйы уыдис æрмæст территориалон, политикон иудзинад нæ, фæлæ дзырдта удварны иудзинадыл, чырыстонадыл, уырнынады сыгъдæгдзинадыл», - загъта Ноннæ, киноныв куы фæцис уæд.
Дины хъуыддæгты фæдыл РХИ-йы Президенты æххæстбарджын Хуыбиаты Соня республикæйы разамынады æмæ сæрмагондæй Тыбылты Леониды номæй стыр бузныг загъта кинонывы режиссерæн.
Киноныв æвдисыны рæстæджы залы уыдысты Алайнаг епархийы æмæ Цæгат Ирыстоны дины кусджыты минæвæрттæ. Ардæм ма æрбацыдысты РХИ-йы Парламенты Сæрдар Коцты Станислав уæлвæткон уавæрты фæдыл министр Бибылты Анатоли, Хуссар Ирыстоны Уæрæсейы Федерацийы минæварады, республикæйы æндæр æмæ æндæр министрадтæ æмæ ведомствоты минæвæрттæ.
Коцты Станислав дæр раарфæ кодта киноныв саразджытæн æмæ банысан кодта, зæгъгæ, ахæм адæймæгтæн, куыд Ипполит, Хуыцау ис сæ сæрты æмæ сæ зæрдæты æмæ бузныг загъта, ахæм тыхджын адæймаджы характер равдисын сын кæй бантыст, уый тыххæй.
Киноныв стыр тæлмæнтæ ныууагъта, чи йæм бакаст, уыдоныл.