Nog adres

Акци / СААКАШВИЛИЙÆН ХУДИНАДЖЫ ХОРЗÆХ

Æрæджы Францы президент Николя Саркози «Цыты легионы орденæй» Гуырдзыстоны президент Михаил Саакашвилийы кæй схорзæхджын кодта æмæ уый Хуссар Ирыстоны фæсивæды растыл кæй нæ банымадтой, уый сæраппонд се ‘нæразыдзинад равдыстой. Ацы хъуыддаджы тыххæй Республикæ Хуссар Ирыстоны Фæсивæдон Хицауады къухдариуæгадæй 19 октябры Мадымайрæмы аргъуаны цур организацигонд æрцыд акци ахæм номимæ: «Награды - героям! Саакашвили - медаль позора!».
Ацы акцийы ма активон хайадисджытæ уыдысты Тыбылты Алыксандры номыл Хуссар Ирыстоны Паддзахадон университеты Студентон совет, фæсивæдон организаци «Молодая гвардия» æмæ Адæмон партийы фæсивæдон организаци.
DSCN5503.jpg
Акцимæ ма се ‘нæразыдзинад равдисыны æмæ фæсивæды сæраппонд æрбацыдысты нæ республикæйы Ахуырад, зонад æмæ фæсивæдон политикæйы фæдыл министр Джиоты Арянæ, ХИПУ-йы ректор Кокойты Таймураз, культурæйы министры хæдивæг Дзеранты Джельеттæ æмæ æндæр бæрнон кусджытæ.
2.jpg
Акцийы хайадисджыты раз йæ раныхасы Фæсивæдон Хицауады минæвар Хъоцыты Сергей куыд банысан кодта, афтæмæй историйы фыццаг хатт Францы ацы стыр хорзæх бахауд, йæ къухтæ æнæаххос сабыр цæрджыты тугæй амæхст кæмæн сты, ахæмы къухмæ. Ацы хорзæх нырма афтæ дæлдзиныг никуы æрцыд. Уый у стыр æнæрастдзинад, раздæр æй чи райста йæ 200 - азон историйы, уыдонмæ ахасты. Никуы уыдис афтæ æмæ дзы хорзæхджын æрцæуа хъайтар нæ, фæлæ лæгмар. Лæгмартæ æмæ фыдгæнджытæн раздæр лæвæрд цыдысты худинаджы майдантæ. «Ахæм рагон традици сног кæнгæйæ, мах абон хъусын кæнæм, цæмæй арæзт æрцæуа «галстукы орден». Йæ идеятæ, йæ тау у махæн геноцид чи сарæзта, уыцы Михаил Саакашвили, кæцы æгас дунейы раз æууылдта йæ сырх галстук», - банысан кодта Хъоцыты Сергей. Æмæ ныхасы бар радта Фæсивæдон Хицауады пресс-секретарь Цоциты Игорæн. Уый акцимæ æрæмбырдуæвджытæн цыбыртæй æрдзырдта ацы мадзалы тыххæй æмæ банысан кодта:
- Мæ хъуыдымæ гæсгæ, 2008 азы цауты рæстæджы Николя Саркози уайтагъд Уæрæсемæ кæй æртахт æмæ Дмитри Медведевимæ Кавказы конфликт æрбæстон кæныны гæххæттытæ бафысгæйæ, уый Хуссар Ирыстоны æнæаххос адæмы сæрыл нæ рахæцыд, фæлæ рахæцыд Гуырдзыстоны бахъахъхъæныныл. Уый æххæст кодта Гуырдзыстоны фæнд æмæ лæууыд Гуырдзыстоны режимы фарсмæ. Бацархайдта, цæмæй Уæрæсейы æфсад уайтагъд рацæуой Гуырдзыстоны территорийæ. Кæд абон официалон Франц дæр æмæ Евроцæдис дæр адæмы бартыл тох кæнынц, хæст сты демократийыл, уæд цæмæннæ аххосджын кæнынц Гуырдзыстоны фашистон режимы хæстон архайдтытæ Хуссар Ирыстоны ныхмæ?
Николя Саркози йæ архайдтытæй равдыста, кæй у разы Гуырдзыстоны политикæйыл, кæй лæудзæн йæ фарсмæ æмæ Уæрæсейæн йæ размæ цæлхдуртæ кæй æппардзысты.
Мах, Ирыстоны фæсиæд, иудзинадыл хæст куы уæм, иу хъуыды нын куы уа, уæд махæн уыцы пиар-архайдтытæй бынтондæр ницы тас уыдзæн!
Дарддæр сæ хъуыдытæ дзырдтой ацы цауы фæдыл акцийы æндæр хайадисджытæ дæр. Фæсивæды ‘хсæн уыд ахæмтæ, кæцытæ англисаг æвзагыл дæр дзырдтой се ‘нæразыдзинады тыххæй. Афтæмæй кæрæдзи ивгæйæ акци цырын кодтой. Фæсивæд хъæрæй дзырдтой, сæ къухты цы лозунгтæ уыдис, уыцы цыбыр, фæлæ бæркадджын фразæтæ. Æрæмбырдуæвджытæн Фæсивæдон Хицауады сæрдар Бететы Михаил бузныг загъта, акцийы хайад райсыны тыххæй рæстæг кæй ссардтой æмæ кæй æрбацыдысты æмæ уый дæр цыбыртæй загъта йæ хъуыды ацы акцийы фæдыл.
Кæронбæттæны Хуссар Ирыстоны адæмы номыл фæсивæды фæндонмæ гæсгæ Саакашвили символикон æгъдауæй хорзæхджын æрцыд уыцы худинаджы галстукы орденæй.
ЦХУЫРБАТЫ Ларисæ