Nog adres

Районты / Арæзт цæуынц цæрæнуат хъуаг цæрджыты номхыгъдтæ

Хуссар Ирыстоны Ленингоры районы администрацийы сæргълæууæджы хæдивæг Æлборты Алан куыд фехъусын кодта, афтæмæй районы æрæвнæлдтой, сæ цæрæнуатон уавæртæ фæхуыздæр кæнын кæмæн хъæуы, уыдоны номхыгъдтæ аразынмæ, цæмæй сын сарæзтæуа хъæдæй хъæдзæрттæ.
«Хуссар Ирыстоны арæнгæрон районты социалон-экономикон рæзты Паддзахадон комплексон нысанмæздæхты программæйы фæстиуæгæн хицæнгонд æрцæудзысты хъæдын хæдзæрттæ, республикæйы арæнгæрон хъæуты мæгуырдæр цæрджытæй иууыл карзæй цæрæнуатон уавæртæ æвзæр кæмæн сты, уыдонæн.

Нæ районы фæнд цæуы 50 хъæдын хæдзары саразын, кæцыты райсдзыстæм майы мæйы райдианы. Уыцы рæстæгмæ хъуамæ саразæм номхыгъдтæ, кæцытæм хаст æрцæудзысты, æдзух Ленингоры арæнгæрон хъæуты чи цæры æмæ, æцæгæйдæр, йæ цæрæн уавæртæ фæхуыздæр кæнын кæмæн хъæуы, уыцы бынæттон цæрджыты», - загъта Æлборты Алан.
Районы сæргълæууæджы хæдивæг лæмбынæгдæр бамбарын кодта, зæгъгæ, номхыгъдтæ араздзæн, сæрмагондæй цы къамис æвзæрст æрцыд, уый, кæцыйы сконды сты, куыд районы чиновниктæ, афтæ æхсæнады минæвæрттæ дæр.
«Номхыгъдты максималон æргомдзинады æмæ объективондзынады тыххæй къамисмæ конд æрцыдысты бынæттон чиновниктæ дæр æмæ æхсæнады минæвæрттæ дæр», - загъта Æлборты фырт.
Кæронбæттæны уый банысан кодта, зæгъгæ, ма ацы куыстмæ баконд æрцыдысты бынæттон барадхъахъхъæнæг органты минæвæрттæ.