Nog adres

ЦÆЙ ТЫХХÆЙ АРÆЗТ ÆРЦЫД ПАРТИ «АККАГДЗИНАД ÆМÆ РÆСТДЗИНАД»

2012 азы 23-æм июны, Организацион комитеты æнæмæнгхъæуæг цæттæгæнæн куыстытæ ауадзыны фæстæ, уагъд æрцыд Республикæ Хуссар Ирыстоны политикон парти «Аккагдзинад æмæ Рæстдзинад»-ы бындурæвæрæн съезд. Галиуцентристон здæхты парти, кæцы йæ разы æвæры йæ рæнхъыты политикон æгъдауæй активон æмбæстæгты æрбаиу кæныны хæслæвæрд, кæцытæ куыдфæндыйы цæстæй нæ кæсынц нæ адæмы, нæ паддзхады хъысмæтмæ. Æппæт дунейы ирæтты иунæг хæдбар паддзахадмæ. Парти, ныры æмæ фидæны фæлтæрты раз бæрндзинад хæсгæйæ, йæ паддзахады æдасдзинад æмæ дидинæфтыд сифтонгкæнынмæ тырнгæйæ, адæймаг æмæ æмбæстагы бартæ æмæ сæрибардзинад, æхсæнадон æмæ политикон цардыуагы бындуртæ фидар кæнгæйæ, æцæг демократи саразынмæ тырнгæйæ, кæцыйæн гæнæн нæй æнæ конкуренцигæнæг политикон партитæй. Кæй зæгъын æй хъæуы, арæзтцæуæг политикон партиты нымæц комкоммæ дæр баст у æмбæстагон æхсæнады хъомылдзинад æмæ политикон культурæимæ.

Хуссар Ирыстоны арæзт æрцыд æмæ гæнæн ис ноджы дæр арæзт æрцæуой ног партитæ. Хуссар Ирыстоны сæвзæргæ æмæ дзы цы политикон партитæ ис, уыдонæн иумиагæй бирæ ис. Уыдон æмзæрдæ сты хицауады иу партийы монополи кæй хъуамæ ма уа, уыимæ, парламентон демократи сфидар кæныны æнæмæнгхъæуын-дзинады, Ирыстоны дыууæ хайы баиу кæныны, стыр Уæрæсемæ ориентаци кæныны. Уыимæ æппæт партитæн дæр, кæцытæ æрбавдыст сты уым, ис социалон æгъдауæй ориентацигæнæн программæтæ, кæцыты кæройнаг нысан у Республикæ Хуссар Ирыстоны дидинæфтыд. Æмæ алы политикон парти дæр Хуссар Ирыстоны рæзт æмæ дидинæфтыд уыны йæхирдыгонау, фæлæ уыдон иууылдæр æмзæрдæ сты уыимæ, æмæ æхсæнады кæй хъæуы серьезон ивындзинæдтæ. Ног къухдариуæгад цы курс уадзы, уый номхуындæй дæр здæхт у уыцы здæхты æмæ уымæ гæсгæ нæ парти хæцы ацы курсы æвварс. Политикон парти арæзт цæуы æхсæнады политикон царды активон хайад исыны нысанæн, уый руаджы РХИ-йы Парламент æмæ паддзахадон хицауады æмæ бынæттон хæдразамынды æндæр органтæм йæ уæнгты бавдисын.
Парти аккаг æмæ рæстагæй хъахъхъæндзæн РХИ-йы æппæт æмбæстæгты интерестæ, хиуæттæ æмæ сæ æцæгæлæттыл нæ дих кæнгæйæ.
Партийы уæлдæр нысан у национ идейæйы алыварс æмбæстæгты æмæ æппæт æхсæнады консолидаци. Ахæм национ идейæйы тыххæй, кæцымæ æнæхъæн царды бæллыдысты нæ фыдæлтæ æмæ абон бæллæм мах.
Парти стратегион нысаны миниуæджы размæ кæны - бæстæйы интеллектуалон, культурон æмæ экономикон рæзт. Уый мидæг уынæм адæмы амондджындзинад æмæ æдасдзинады гаранти.
Парти йæ разы цы нысан æвæры, уый у куыстхъом хицауад, кæцыйæн бындурæвæрд хъуамæ æрцæуа адæмы равзæрст æмæ æууæнкдзинадæй æмæ уа карз демократон контролы бын. Уый у йе 'мбæстæгты фæрныгады тыххæй паддзахады бæрндзинад æмæ æмбæстæгты бæрндзинад сæ паддзахады эффективондзинады тыххæй. ППАР домдзæн хицауадæй, цæмæй ног къухдариуæгад активон паддзахадон поли-тикæ уадзыны фæдыл цы темп райдыдта, уый æппынæдзух рæза, кæцы ифтонг кæны бæстæйы æм-бæстæгты социалон æдасдзинад, бындурон социалон гарантитæ æххæст кæнын: аккаг куыстмызд æмæ пенси, лæвар медицинæ æмæ лæвар ахуырад, со-циалон цæрæнуат райсыны бартæ, коммуналон лæггæдтæн нормæйон фиддонтæ, адæмы культурон бынтæм сæрибар бацæуæн.
ППАР-ы экономикон политикæ у нормалон базарадон ахастыты уавæрты социалон ориентацигæнæн политикæ.
Нæ парти нымайы, зæгъгæ, æхсæнадон æмæ политикон царды фæрныгады критери у сæрибардзинад æмæ рæстдзинад.
Йæ саразыны сæйраг катализатор у æхсæнады ныртæккæйы уавæр. Хъæддаг базарад æгъатырдæр æмæ кæрæдзийы ныхмæ кæны адæмы, æвæры сæ баррикадæты алы фæрсты. Æхсæнады негативон ахаст ис уымæ, æмæ нæ горæттæ æмæ хъæутæ кæй æдзæрæг кæнынц, адæм стыр хъыгимæ ныууадзынц сæ райгуырæн бынæттæ, рацахуыр сты кусын, базары хæлцадон продуктты фылдæр хай ласт цæуынц фæсарæнтæй. Ссæдз азы дæргъы дзурæм куысты бынæттыл, фæлæ сæ нæ аразæм фаг бæрцæй, фæсивæд кæм бакусой, уый сын нæй, æмæ сын уымæ гæсгæ, нæй уавæр, цæмæй саразой хисæрмагонд бинонтæ æмæ афтæ дарддæр.
Адæм ма хъуамæ фесафой иумиаг нысаны æнкъа-рынад, историон иумæйагдзинад æмæ алы ироны сæрмагонд бæрндзинад сæ бирæхъизæмæрттæ бавзарæг Райгуырæн бæстæйы хъысмæтмæ.
Кæд нæ партийæн йæ бон бауа ацы негативон фæзындтытæ цахæмдæр бæрцы фæстæмæ аздахын, кæнæ та сæ бынтондæр аиуварс кæнын, уæд мах æнæхъуаджы нæ арæзтам нæ парти æмæ нæ куыст дзæгъæлы нæ фæци. Уымæ гæсгæ, нæ партийы уæнгтæ Хуыцау æмæ адæмы раз сæ мисси гæнæн ис æмæ банымайой сæххæстгондæй.
Парти йæ фæнд акæндзæн, цæмæй паддзахад куыстмызд фидыны къабазы, ахуырады, наци æмæ культурæ, æнæниздзинад, цæрæнуатон-коммуналон хæдзарад, пенсиисджыты, ветеранты æмæ инвалидты хъахъхъæныны тыххæй хæслæвæрдтæ сæххæст кæна.
Социалон политикæ райдайы ивгъуыдæн кад кæнынæй æмæ фидæны раз бæрндзинадæй. Хистæр æмæ æвзонг фæлтæртæм ахаст у æхсæнады хъомылдзинады бæрæггæнæн. Нæ парти тырндзæн, кæй зæгъын æй хъæуы, конституцион методтæй, æхсæнады фæлтæрты æфтиæгты æмæ хæрдзты раст дих кæнынмæ, цæмæй фæсивæды ныфс уа йæ райдайгæ царды фæндагыл ын баххуыс кæнынæй, ацæргæ адæймæгтæн уа сифтонггонд зæронды бонтæ. Махæн бар нæй, цæмæй нæ сывæллæтты æмæ нæ сывæллæтты сывæллæтты фидæнмæ æрвитæм æвзæр ахуырдзинадимæ, лæмæгъ æнæниздзина-димæ, иу боны цардæй цæрыны фæндондзинадимæ, æвæлмас æмæ апатийы уавæр дарын не 'хсæнады цы цæуы, уымæ. Хъæуы кондады къабæзты, хъæууон хæдзарад, ахуырад, æнæниздзинад, культурæйы рæзт райдайын æмæ куысты бынæттæ аразын, фæсарæйнаг инвестицитæ æрбакæнын.
Бæрæг куыд у, уымæ гæсгæ нырыккон паддзахадæн йæ бон нормалонæй уæвынад кæнын нæу æнæ реалон политикон цардæй, кæцыйы бындур у партиты конкуренци. Бирæпартиондзинад у æхсæнады политикон царды æнæбайсгæ хай. Цард куыд фенын кодта, уымæ гæсгæ цæрджытæн ис сæхи хъуыды республикæйы алы уæвæг партийы ахасты дæр. Нæ парти у, цæмæй РХИ-йы Парламенты баконд æрцæуой иумондатон зылдтæ, ома, æвзæрстыты хæццæ системæ.
Цæрджытæн фадат хъуамæ уа, цæмæй сæхи æхсæнæй æвзарой уæлдай аккагдæр минæвæртты, кæцытæ хъахъхъæниккой конкретон адæймæгты æмæ территориты интерестæ. Æвзарæгæн бар хъуамæ уа, уыцы депутатмæ фæстæмæ фæсидын, кæцы йын нæ раст кæны йæ æууæнкдзинад æмæ нæ цымыдис кæны æвзарджыты цардмæ.
Парти тырндзæн, цæмæй хицауады дихкæныны принциптæ, кæцытæ фыст сты РХИ-йы Конституцийы, хъуамæ хъахъхъæд цæуой æнæмæнгæй. Закъоны раз æмбæстæгты æмбардзинады принцип у барадон паддзахады бындур. Алы æмбæстагæн дæр хъуамæ фадат уа, тæрхондоны йæ барты сæрыл тох кæнынæн закъонæй сфидаргонд æмгъуыдты. Тæрхондонон хицауад хъуамæ лæггад кæна закъонæн. Политикон парти «Аккагдзинад æмæ Рæстдзинад» у, цæмæй республикæйы территориалон-административон иуæгты сæргълæуджытæ æмæ тæрхонгæнджытæ æвзæрст цæуой адæмы хъæлæсæппæрстмæ гæсгæ. Тæрхондонон системæйы рæзт хъуамæ аиуварс кæна коррупцийы аххосæгты æмæ сифтонг кæна тæрхонгæнджыты реалон хæдбардзинад.
Коррупци у æвзæрдзинад, кæцы дискредитаци кæны æхсæнады бындурон хæзнатæ æмæ у национ æдасдзинады комкоммæ тæссагдзинад.
Парти нымайы: закъоны цæстæнгасмæ гæсгæ гæртамисын хъуамæ æмхуызон нымад цæуа паддзахадыл гадзрахатæй рацæуынимæ. Гæртамисын æмæ служ-бæйон уавæрæй фыдархайд кæныны тыххæй æфхæрд хъуамæ уа максималон, исад сконфискаци кæнгæйæ. Уæлдай коррупцион архайдтыты тыххæй æфхæрды системæмæ гæсгæ хъуамæ ахæмтæн гæнæн мауал уа паддзахадон службæйы дарддæр кусынæн.
Парти тырндзæн закъон æххæст кæнынмæ, кæцымæ гæсгæ бар нæ уыдзæн бизнес æмæ паддзахадон органты æмæ æрбавдисгæ хицауады службæ иу кæнгæйæ.
Нæ парти у стабилон æмæ демократон бæстæйы тыххæй, цивилизацион оппозици уæвынад кæныны тыххæй, кæцы хæцы æхсæнады бындурон хæзнаты æвварс æмæ йæ разы æвæры рæзты альтернативон курс бакусыны хæслæвæрд, цæмæй æвзæрстыты куы фæуæлахиз уа, уæд йæ бон суа ацы курс сæххæст кæнын. Оппозици æвдисы равзæрсты уникалон фадат, æнæ тыхархайдæй, конституцион демократон æгъда-уæй хицауад адих кæнын.
Парти нымайы æддагон политикæйы сæйрагдæр хæслæвæрдыл республикæйы суверенитет бахъахъ-хъæнын, нæ хæдбардзинад банымайыны фæдыл куысты активондзинад.
Парти архайдзæн æхсæнадæмон ахастытæ рæзын кæнынмæ, æрмæстдæр, демократи, æмбарадон æмæ паддзахадты кæрæдзийæн кад кæныны принциптыл. Нæ нацийы хуыздæр минæвæртты тугæй бахъахъхъæд хæдбардзинадмæ ногæй æркæсыны фæдыл цахæмфæнды бафæлвæрдтыты ныхмæ карзæй лæу-уын, нæ бæстæмæ афтæхуыйнæг «территориалон претензитæ» бавдисгæйæ.
Регионалон иумиаг æмбырдтæ уадзыны рæстæджы, партийы организатортæ, æмбæстæгты раныхæстæм хъусгæйæ, мах уæлдай хатт бауырныдта, æхсæнады кæй ис нæ партийы хъæуындзинад. Уымæн æвдисæн сты æмбæстæгтæй æрбацæугæ куырдиæттæ нæ пар-тийы рæнхъытæм сæ райсыны тыххæй. Партийы уæнгты нымæц рæзы куыд æнхъæлдтам, уымæй тагъддæр.
2013 азы февралы партийы хайадты æппæт территориалон-административон иуæгты срегистраци кæныны фæстæ 7-æм февралы уагъд æрцыд партийы фыццаг рабадт регионалон политсоветы æппæт уæнгты хайадистæй, цыран сарæзтой хатдзæгтæ æмæ снысан кодтам организацион-партион куысты бæрæг хæслæвæрдтæ. Арæзт æрцыд къамис ног уавæрты ар-хайды программæ бакусыны фæдыл. Æнæрадон съезд ауадзынмæ бацæттæ кæнын бахæсгонд æрцыд пар-тийы политсоветæн.
Нæ парти у нырыккон политикон парти, кæцы йæ нысанæн æвæры Хуссар Ирыстоны тыхджын социалон-ориентацион раст паддзахад саразын, кæцы нæ дæтты афтид ныфсæвæрдтытæ æмæ уый дæр æвзæрстыты рæстæджы, фæлæ йæ æрвылбонон архайдæй организацион-дзыллон æмæ политикон куысты фæдыл ахъаз кæндзæн национ идейæйы алыварс æппæт æх-сæнады консолидаци. Парти арæзт æрцыд адæмæн, цæрдзæн адæмы тыххæй, алыхатт дæр уыдзæн сæ цуры хъыджы дæр æмæ цины дæр. Хуыцау нын æххуысгæнæг уæд.
РХИ-йы ППАР-ы
Политсоветы сæрдар БИТЕТЫ Л.С.