Nog adres

ÆРТЫНДÆСÆЙ ИУ

Адæймагæн йæ туджы куы ахъары йæ фыдæлты бæстæм уарзондзинад, уæд кæмфæнды ма цæра, уæддæр йæ хъуыдытæ, йæ бæллицтæ кæддæриддæр уыимæ баст вæййынц. Йæ фыдæлты райгуырæн бæстæимæ баст уыдысты гудзареттаг лæппу Джыгкайты Феликсы бæллицтæ дæр. Уый кæд гуыргæ æмæ хъомыл дæр Гудзареты комбæсты Сырх хъæуы кодта, уæддæр æй магнитау йæхимæ æлвæста Ирыстоны зæхх.

Феликс райгуырд 1960 азы Боржомы районы, Гудзаретгомы Сырх хъæуы, фæрнджын бинонты 'хсæн. Гудзареты астæуккаг скъола каст фæцис 1977 азы æмæ æрцыд Хуссар Ирыстонмæ. Кусынмæ бацыд Цхинвалы арæзтадон трестмæ æмæ куыстуарзаг лæппу йæхиуыл нæ ауæрдгæйæ, цæсгомджынæй æххæст кодта, фæлтæрд кусджытæ йын цы амыдтой, æппæт уыдæттæ. Æгъдауджын, хиуылхæцгæ лæппуйы коллектив айста зæрдиагæй. Ацы куыстуаты бирæ нæ акуыста, æрсидтысты йæм Советон Æфсады рæнхъытæм. Йе службæйон хъысмæт æй ахаста дард Хабаровскы краймæ. Феликс та ам дæр ирон лæджы кад дæлæмæ не 'руагъта, йæ хæстон хæслæвæрдтæ æххæст кодта намысджынæй.

Йе'мбæстагон хæс куыд æххæст кодта, уымæн æвдисæнтæ сты йæ хорзæхтæ æмæ цы æфсæддон хайы службæ кодта, уый командиртæ йын йæ ныййарджытæ Ханджери æмæ Женямæ цы арфæйы фыстæджытæ æрвыстой, уыдон.
Æфсæддон службæйы фæстæ, 1981 азы уый æрыздæхт Цхинвалмæ æмæ кусынмæ бацыд милицимæ - мидхъуыддæгты горæтон хайадмæ. Милицийы кусгæйæ йын феххуыс æфсæддон службæйы фæлтæрддзинад æмæ цыфæнды зындзинæдтæ аиуварс кæнынмæ дæр уыд цæттæ. Бирæ фæткхалыны цаутæ аиуварс кодта æмæ фæткхалджыты раргом кодта Феликс. Уый фæстиуæгæн ын лæвæрд æрцыд лейтенанты цин.
Гуырдзиаг шовинисттæ Хуссар Ирыстонмæ куы бырстой, уæд Джыгкайты Феликс мисхал дæр йæ цардыл нæ ахъуыды кæнгæйæ, æрлæууыд йæ Фыдыбæстæйы хъахъхъæнджыты фарсмæ æмæ аккаг ныхкъуырд лæвæрдта гуырдзиаг лæгсырдтæн.
О, фæлæ знагимæ тох кæнын вазыгджын æмæ зын у, уымæй дæр знаг хин æмæ кæлæн куы вæййы, уæд. Хинæйдзаг уыд Гуырдзыстоны мидхъуыддæгты министрад дæр æмæ цалынмæ Хуссар Ирыстонимæ хæстон архайдтытæ нæ райдыдта, уæдмæ уал хуссарирыстойнаг милицийы табелон хæцæнгæрзтæ æруыгътой æмæ сæ аластой Тбилисмæ.
1991 азы Ирыстоны сæрмæ сау мигътæ куы æмбырд кодтой, Гуырдзыстоны мидхъуыддæгты министрады баиугæндтæ, кæцыты сконды уыдысты, ахæстæттæй цы лæгмарты рауагътой, уыдон, Хуссар Ирыстоны районтæм, хъæутæм, æмæ горæтмæ куы бырстой, Цыппурс æхсæвы горæтмæ сусæгæй куы бахъуызыдысты, уæрæсейаг Мидхъуыддæгты æфсæддонты разыйæ, уæд фыццаг бонæй райдыдтой Хуссар Ирыстоны милицийы табелон хæцæнгæрзтæ исын. Цы 14 автомат ма сæм баззад, уыдон Гæззаты Вадимы инициативæйæ æмбæхст æрцыдысты. Иу бон сæм мидхъуыддæгты горæтон хайадмæ бацыд гуырдзиаг инæлар, горæты комендант Кванталиани æмæ æрдомдта, цæмæй сæ табелон хæцæнгæрзты иууылдæр радтой. Фæлæ ахуыргæнæн хæцæнгæрзты йедтæмæ куы ницы ссардта, уæд сæ карзæй афарста, иннæ хæцæнгæрзтæ кæм сты, уымæй. Уыдон сдзуапп кодтой, зæгъгæ, къухты сты.
Фæстæдæр нæ лæппутæ знаджы горæтæй куы ассыдтой, уæд горæты алы районты арæзт цыдысты хъахъхъæнынады къордтæ. Уыдон лæууыдысты горæтгæрæтты æмæ знаджы горæтмæ æрбахизын нæ уагътой.
Ахæм къорд арæзт æрцыд милицийы кусджытæй дæр. Гæззаты Вадим æрæмбырд кодта, йе 'мкусджытæй ныфс кæмæй æвæрдта æмæ тынгдæр кæуыл æууæндыд, уыдоны æмæ сын Милицийы Сæрмагонд Нысаниуæджы къорд саразыны тыххæй йæ фæндон куы загъта, уæд йæ фарсмæ цы 12 зынгзæрдæ патриоты балæууыдысты, уыдонæн сæ фыццæгтæй уыд Джыгкайты Феликс.
Феликс æмæ йе 'мбæлттæм райдианы уыд æрмæстдæр уыцы цыппæрдæс автоматы, фæлæ уый фаг нæ уыд, хъуыд сæ хъомысджындæр хæцæнгæрзтæ æмæ уый фæстиуæгæн æвзæрстой зындзинæдтæ. Фæлæ фæстæдæр сæ къухы бафтыдысты дыууæ БТР æмæ уæзтæласæн машинæ. БТР-тæ уыдысты хæлд, нæ сын уыд, æгæрыстæмæй, æхсæн хæтæлтæ дæр æмæ, Феликс куыд загъта, афтæмæй Вадимæн уыд автомашинæ «Москвич» æмæ йæ ауæй кодта æмæ дзы БТР-тæн балхæдта хæйттæ.
Феликс цал æмæ цал хæстон операциты райста хайад. Лæууыд иууыл тæссагдæр бынæтты æмæ хъахъхъæдта йæ адæмы æнцойад куыд æддагон знæгтæй, афтæ мидæггагон фæткхалджытæй дæр. Знаг горæтмæ бырста, фæлæ нæ хъæбатыр патриот-лæппутæ æнæмсæр хæсты удуæлдай тох кодтой, кæд хæцæнгарзæй уабæрæг ифтонг нæ уыдысты, уæддæр. Сæ сæр тынгдæр кæм хъуыд, уырдæм цыдысты оперативонæй æмæ-иу æрлæууыдысты иннæ хъахъхъæнджыты фарсмæ.
Райдианы Милицийы сæрмагонд нысаниуæджы къорды сконды кæд 13 адæймаджы йедтæмæ нæ уыд, уæд сæм фæстæдæр цæуын райдыдтой адæм, уымæн æмæ адæмы 'хсæн сæ авторитет рæзт æмæ сæ нымæц фылдæрæй-фылдæр кодта. Республикæйы районты дæр арæзт æрцыдысты Сæрмагонд Нысаниуæджы Милицийы Къордтæ.
Феликс бæргæ куыста, фæлæ йын æнцойад нæ лæвæрдта уæлдæр ахуырад райсыны фарст æмæ бацыд ХИПУ-йы историон факультетмæ, каст æй фæцис æнтыстджынæй. Фæстæдæр университеты юридикон факультет куы бакондæуыд, уæд та уыцы факультеты райдыдта ахуыр кæнын. Кæй зæгъын æй хъæуы ам дæр йæ ахуыр нæ æрныллæг кодта æмæ та уый дæр каст фæцис хæрзтыл.
Милицийы Сæрмагонд Нысаниуæджы къорды баслужбæ кодта 1994 азмæ. Йæ радтæг адæмы стыр патриот уæвгæйæ ма йæм организаторон æвзыгъддзинад кæй уыд, уый тыххæй йæ республикæйы къухдариуæгад снысан кодта Знауыры районы мидхъуыддæгты управленийы хистæрæй. 1995 азы та нысангонд æрцыд Хуссар Ирыстоны Паддзахадон автоинспекцийы хистæрæй æмæ дзы фæкуыста 2002 азмæ. 2002 азы кусын райдыдта Мидхъуыддæгты министрады пенсион фонды хистæрæй æмæ дзы фæкуыста 2003 азмæ, уый фæстæ йæ куыст ныууагъта, пенсийы кæй ацыд, уый фæстиуæгæн. Фæлæ куыстуарзаг адæймагæн æгуыстæй йæ бон бирæ бадын нæу, æмæ та 2004 азы кусын райдыдта Æнæведомствойон хъахъхъæнынады управленийы хистæрæй æмæ дзы цæсгомджынæй кусы абон дæр.
Мидхъуыддæгты министрады Феликс кусын райдыдта лейтенантæй æмæ службæйон къæпхæнтыл уæлæмæ хизгæйæ ссис инæлар. Дыууæ азы размæ та йын РХИ-йы Президенты Барамындæй лæвæрд æрцыд инæлар-майоры чин.
Феликс ма у хорз бинонты хицау дæр. Йæ цардæмбал Джиоты Ирæимæ сын ис æртæ чызджы æмæ иу лæппу. Йæ зæнæг дæр йæхиау сты хиуылхæцгæ, уæздан æмæ æгъдауджын.
Фæзæгъынц, зæгъгæ, дам, фыды фарн мæрдтæм нæ цæуы. Ацы æмбисонд раст у. Джыгкайты Феликсы ныййарджытæ Ханджери æмæ Плиты Женя хъæрмуд, куыстуарзаг, куыд фæзæгъынц, фæрнджын бинонтæ уыдысты, цардфæразон, адæмуарзаг. Æрмæст хъæубæсты 'хсæн нæ, фæлæ комбæсты дæр уыдысты нымад, кадджын адæймæгтыл. Се 'гъдауæй цæвиттойнаг уыдысты сæ кæстæртæн. Сæ æртæ фырт æмæ иунæг чызджы дæр цайдагъ кодтой куыстыл, амыдтой сын царды хæрзиуджытæ æмæ уыдон дæр сæхиау сты хæрзæгъдау, куыстуарзаг, ирон æгъдæуттыл хæст, хайджын сты сæ фыдæлты фарнæй. Царды дæр ссардтой аккаг бынæттæ, алкæмæн дæр сæ ис хорз бинонтæ. Уыдон Гудзаретгомы цардысты 1991 азмæ.
Ханджери æмæ Женя Хуссар Ирыстоны цы цаутæ цыд, уыдоны, кæд иууыл нæ, уæддæр дзы цыдæртæ хъуыстой æмæ сæ зæрдæ тынг æхсайдта сæ фырт Феликсмæ. Сæхи мæт сæ æппындæр нæ уыд, уымæн æмæ æнхъæлдтой, хъæрмудæй цы гуырдзиæгтимæ цардысты, уыдон сæ нæ рауæлдай кæндзысты. Фæлæ гуырдзиæгтæ Гуырдзыстоны фашистон режимы раздзог Звиад Гамсахурдиайы сæргълæудæй æндæр нацийы минæвæртты ныхмæ, сæрмагондæй та - ирæтты ныхмæ куы растадысты ахæм лозунгимæ, зæгъгæ, «Гуырдзыстон-æрмæстдæр гуырдзиæгтæн», уæд Гуырдзыстоны алы районтæй, уыцы нымæцы Гудзаретгомæй дæр, фæсырдтой ирæтты. Ханджери æмæ Женя дæр ныууагътой сæ хæдзар, сæ фос, цæрæнбонты цы фæллæйттыл фæфыдæбон кодтой, уыдон, æмæ комбæсты иннæ адæмимæ иумæ фистæгæй февралы мæйы хъызт зымæджы астæумæ миты Триалеты хæхты сæрты ахызтысты Цъалкъайы районмæ (цæрынц дзы сомихæгтæ), уырдыгæй ацыдысты Ереванмæ æмæ сын сомихæгтæ удыбæстæ скодтой - хæдтæхджытыл сæ арвыстой Цæгат Ирыстонмæ.
Ацы диссæгтæ бавзаргæйæ Ханджери бирæ нал ацард, зæрдæниз райста æмæ аивгуыдта йе 'нусон бынатмæ, фæлæ Женя абон дæр цæры Цæгат Ирыстоны йæ кæстæр фырт Славикимæ.
Мæ зæронд дада-иу афтæ фæдзырдта: дæ алыварс адæмы хорзæх дæ куынæ уа, уæд Хуыцауы хорзæхмæ дæр ма æнхъæлмæ кæс. Феликс та уыцы хорзæхæй æххæст у.
ОСИАТЫ Индирæ