Nog adres

Фæзынд инфекцион низ. Йæ фæзынды аххосаг бæрæг нæма нæу

DSC01667_2.JPG
Ацы мæйы райдианæй фæстæмæ нæ горæты тынг сарæх инфекцион низтæй рынчынты нымæц, уыдоны 'хсæн фылдæр ис сывæллæттæ. Кæй зæгъын æй хъæуы, уый тыхстдзинад æвзæрын кæны канд сывæллæтты ныййарджытæм нæ, фæлæ нæ республикæйы дохтыртæм дæр. Уымæн æмæ кæронмæ бæрæг нæу ацы низы равзæргæ аххосаг.
Сæвзæргæ уавæры фæдыл мах бахатыдыстæм нæ республикæйы рынчындоны инфекцион хайады гæс Козаты Варварæмæ цæмæй нæ базонгæ кæна, ацы низ аиуварс кæныны ныхмæ цы куыст цæуы, уыимæ.
- Фыццаг февралæй фæстæмæ нæм тынг бирæ æрбацыд рынчынтæ. Уыдонæн сæ фылдæр уыдысты 3 мæйæ 16 азы онг кæуыл цæуы, ахæм сывæллæттæ. Рынчындонмæ æрбацæугæйæ, уыдон хъаст кодтой сæ зæрдæтæ хæццæ кæнынæй, гуыбыны рыстæй æмæ бæрзонд тæвдæй. Рынчынты уавæр-мæ гæсгæ аскъуыддзаг кæнæм, цæмæй иууыл уæззаудæр рынчынты схуыссын кæнæм рынчындоны. Тынг тыхст чи не сты, уыцы рынчынтæ дæр æнæ хъусдард не сты, уыдон та сты сæ фадыгон дохтырты хъусдарды бын. Медикаменттæй ифтонг стæм æмæ нæ нырма нæ бахъуыд рынчынты республикæйæ æддæмæ арвитыны сæр, нæхæдæг нæхи тыхтæй æххæсæм. Уыдис нæм дыууæ уæззау рынчын сывæллоны, фæлæ уыдон дæр фæдзæбæхдæр сты. Рынчынты 'хсæн ис куыд горæтæй, афтæ районтæй дæр.

Ацы сæвзæргæ уавæрмæ йæ хъус дары нæ республикæйы Æнæниздзинад хъахъхъæнынады министр Григори Кулиджанов. Уый сæрмагондæй бабæрæг кæны рынчынты æмæ бынаты базонгæ вæййы уавæримæ.
Кæй зæгъын æй хъæуы, тынг цымыдис нæм æвзæрын кæны ныртæккæйы уавæр. Уый фæдыл анализтæ æрвыст æрцыдысты Дзæуджыхъæумæ æмæ нæ республикæйы санэпидстанцмæ, фæлæ нырма дзуаппытæ нæ райстам. Уый фæдыл сидын, канд æвзонг мæдтæм нæ, фæлæ æмткæй нæ республикæйы цæрджытæм дæр, цæмæй сæ сывæллæттæн цы дыргътæ æлхæнынц, уыдон æхсой æхсидгæ донæй, нуазгæ дæр кæной æхсыст дон. Уый хауы канд сывæллæттæм нæ, фæлæ хистæр кар адæймæгтæм дæр. Уæлдæр куыд банысан кодтон, афтæмæй бæрæг нæу, низы ратæдзæн кæцæй у, æмæ хи бахизын хъæуы донæй дæр. Алчидæр æй зоны, нæ горæты коммуникацитæ ивд кæй цæуынц, уый фæдыл горæты уынгтæ цæуынц къахт æмæ хорз уаид, боны рæфты цас гæнæн ис, уыйас ныййарджытæ сæ сывæллæтты куы кæниккой сыгъдæг уæлдæф кæм ис, ахæм рæттæм, зæгъæм, паркмæ кæнæ фæсгорæтмæ, - банысан кодта дохтыр.
Козаты Варварæ ма нын куыд загъта, афтæмæй, рынчынты нымæц абоны онг нæма фæкъаддæр.
Мах ацы уавæрмæ дарддæр дæр нæ хъус дардзыстæм æмæ уæ зонгæ кæндзыстæм нæ газеты фæрстыл.
ТАНДЕЛАТЫ Виленæ