Nog adres

ÆНТЫСТДЖЫН УТ...

0023.jpg
Иу ирон æмбисонд афтæ амоны, зæгъгæ, бæлас талайæ тасы. Æмæ æцæгдæр, сабийæн чысылæй йæ зæрдæйы цы нывæрай, цæмæ йæ сразæнгард кæнай, цасдæрбæрцæй уымæй кæнгæ вæййы йæ фидæны цардвæндаг дæр. Абон арæх фæкæнæм, мадæлон æвзагмæ æмбæлон хъусдард кæй нал ис, кæстæр фæлтæры кæй ницыуал æндавы, фæлæ кæстæрты хатт баразæнгард кæныны йеддæмæ ницы фæхъæуы. Æмæ цæмæй куыдфæндыйы цæстæй ма кæсой суинаг фæлтæр ацы арфæйаг хъуыддæгтæм, уый тыххæй сын сæ чысыл зæрдæтæ разæнгард кæнын хъæуы, нæ фыдæлтæм цыдæриддæр хорзæй уыд, уыдонмæ, нæ адæмы абоны æнтыстытæм.
Ахæм арфæйаг хъуыддæгтæм разæнгард кæныны тыххæй Ленингоры районы Цъинагары астæуккаг скъолайы ахуыргæнинæгты хъæппæрисæй уагъд цæуы сæрмагонд цыппарфарсон газет «Арвырон». Ацы газет кæд æмæ 2009 азы райдыдтой уадзын «Дуне», зæгъгæ, ахæм номимæ, хатт-иу сæ фæрæзтæ кæй нæ амыдтой, уымæ гæсгæ цыдис стыр къуылымпытимæ. Фæлæ ацы аз сфæнд кодтой, цæмæй сæ газет æрвылмæйон суа. Уый тыххæй йын æвзæрст æрцыд редколлеги æмæ редактор дæр. Скъоладзаутæ сæхæдæг дæр тынг райгонд сты се 'нтыстытæй. Уæлдай æхцондзинад банкъарынц, се скъоламæ фæуазæгуæвджытæй сын интервью райсын куы бантысы, уæд. Ацы скъолайы 7-æм къласы ахуыргæнинаг Хъайсынты Иринæ куыд зæгъы, афтæмæй «газет уагъд цæуы скъолайæн йæхи тыхты æмæ фæрæзты фæрцы.

Газеты тематикæ у алыварсон, нæ газеты æрмæджытæ мыхуыр цæуынц дыууæ æвзагыл - ирон æмæ уырыссаг. Фæлæ æз мæхæдæг арæхдæр фæфыссын ирон æвзагыл. Мæхицæн стыр æнтыстыл нымайын, ацы аз нын нæ газеты фыццаг номырмæ ме 'мбалимæ не скъолайы директор Хуыбылты Заретæ Алексийы чызгæй интервью кæй райстам. Кæмæ бахатæм, уыдонæй нын алчидæр сразы вæййы интервьюйыл æмæ сын уый тыххæй зæгъын стыр бузныг».
Газеты ма мыхуыр фæцæуынц алыгъуызон рубрикæты бын æрмæджытæ, кæцыты фæрцы газеткæсджыты зонгæ кæнынц алыгъуызон цымыдисон цаутимæ. 9-æм къласы ахуыргæнинаг Хъодалаты Аннæйæн та уæлдай тынгдæр йæ зæрдæмæ цæуынц алыгъуызон рубрикæтæм æрмæджытæ цæттæ кæнын.
«Мах нæ газеткæсджыты зонгæ кæнæм не скъолайы цардæй цымыдисон цаутимæ, æнтыстджындæр ахуыргæнинæгтимæ æмæ нæ республикæйы историон бынæттимæ. Нæ куысты нын стыр æххуыс сты нæ ахуыргæнджытæ дæр, сæйраджыдæр та нæ уарзондæр ахуыргæнæг Гусойты Ласкъо. Уый нын баххуыс кæны темæтæ равзарынæн æмæ æрмæджытæ бацæттæ кæнынæн. Æмæ мæ уый тыххæй нæ газеты редколлегийы номæй стыр бузныг зæгъын фæнды, нæ райдиан къахдзæфты нæм йе 'ххуысы къух чи дары, æппæт уыдонæн», - загъта Хъодалаты Аннæ.
«Арвырон»-ы чысыл коллективы зæрды ис сæ газеты тематикæ рауæрæхдæр кæнын. Фæнды сæ хъæубæсты кардзыд цæрджытæй интервьютæ райсын дæр, цæмæй хистæр кар æмæ кæстæр фæлтæр кæрæдзийы комулæфт æнкъарой. Газеты тираж вæййы 40-50 экземпляры онг. Цæмæй газет хъæубæсты цæрджытæм афоныл хæццæ кæна, уый тыххæй ба-дзырдтой сæ хъæуы постхæсджытимæ æмæ газет «Хурзæрин» чи рафыста, уымæн постхæссæг уæлæмхас фæдæтты газет «Арвырон» дæр.
Алы ног райдайгæ фæндаг дæр зынцæуæн вæййы, фæлæ фылдæр хатт йæ фæстиуæг та - æнтыстджын. Ацы чысыл коллективæн нæ зæрдæ зæгъы сæ архайды бирæ æнтыстытæ æмæ иудзинад, цæмæй газет «Арвырон» скъолайы рауагъдонты фæлтæргай ива. Æмæ сæ, уадз, макуы ферох уæд, сæ газет цы ныхæстæй райдыдтой, Хетæгкаты Къостайы уыцы ныхæстæ:
«Весь мир - мой храм,
Любовь - моя святыня,
Вселенная - отечество мое».

КОКАЙТЫ Зæринæ