Nog adres

Пресс-конференци / «ХЪÆУЫ ÆНГОМ ÆМÆ ÆМЗОНД КАМАНДÆ СКÆНЫН»

Медиа-центр «Ир»-ы 14-æм октябры уагъд æрцыд, нæ республикæйы Президенты бынатмæ регистраци чи æрцыд, уыцы кандидаттæй сæ иу Бибылты Анатолийы фыццаг пресс-конференци. Конференцийы рæстæджы фарстаты фылдæр хай уыд нæ республикæйы социалон-экономикон нывæстыл, кæцыйы размæцыдыл алыварсонæй архайынц Хуссар Ирыстон æмæ Уæрæсейы Федерацийы хуыздæр специалисттæ æмæ ахуыргæндтæ. Фарстатæн дзуапп кæнгæйæ Бибылты Анатоли куыд банысан кодта, афтæмæй республикæйы ныртæкæйы социалон-экономикон уавæр у æндыгъд, æмæ йæ рарастгæнæн ис æрмæстдæр нæ республикæйы цæрджытæ æмæ æфсымæрон Уæрæсейы Федерацийы æххуысæй. Бибылты Анатоли куыд загъта, афтæмæй республикæйы ног сæргълæууæджы архайдтытæй сæ иу æнæмæнгдæр хъуамæ уа коррупцийы ныхмæ карз тох, цæмæй Хуссар Ирыстоны цæрджытæ сæ тыхтыл баууæндой. Уый тыххæй коррупцийæ зæрдæхсайгæ адæймæгты ныхмæ хъуамæ цæуа карз тох. Бибылты Анатоли ма куыд загъта, афтæмæй закъон алкæмæн дæр хъуамæ уа æмхуызон, хуымæтæг адæймаг уа, æви бæрнон. Фыдгæнæг хъуамæ стæрхончындæуа æмæ ахæстоны сбада. Æнæагайгæ адæймæгтыл махмæ нæ уыдзæн.
Анатолийы хъуыдымæ гæсгæ Хуссар Ирыстоны Президентæн фыццаг рады аскъуыддзаг кæнинаг фарстатæ сты транспортон инфраструктурæ, цæрæн хæдзæртты фарст, фосдарды тыххæй къаддæр процентыл паддзахадон кредит рахицæн кæнын, Уæрæсейæ инвестортæ æрхонын æмæ афтæ дарддæр. Бибылы фырт ма куыд загъта, афтæмæй æппæт ацы фарстатыл бадзырдтæ цæуы Уæрæсейы Федерацийы минæвæрттимæ.
«Цæмæй нæ Райгуырæн бæстæ дидин æфтауа, уый тыххæй мах мауал хъуамæ цæрæм иу боны æмгъуыдæй, фæлæ хъуамæ ныфсимæ кæсæм фидæнмæ. Хъуамæ паддзахадон нывæстытæ аразæм фондз азы раздæр. Æмæ куыд æххæстгонд цæуынц уыцы нывæзтытæ, уый тыххæй сыл хъуамæ уа карз паддзахадон контроль.
Уый у æнæмæнгхъæуæг нæ бæстæйæн. Уый кæд æмæ тынг уæззау у, уæддæр ын сæххæстгæнæн ис æмæ уый тыххæй та хъæуы æнгом, æмзонд æмæ фæлтæрд командæ. Æмæ ахæм командæ мæнæн ис», - банысан кодта Бибылты Анатоли.
Бибылты Анатоли ма æгæрон бузныг загъта Хуссар Ирыстоны æмбæстæгтæн, йæ кандидатурæйы фарс кæй рахæцыдысты, уый тыххæй æмæ ма банысан кодта 2012 азы Хуссар Ирыстон æнтыстджын кахдзæф кæй акæндзæн йæ размæцыды.
Нæ уацх.