Nog adres

«ЧИ ДÆ, ГОЧА, ДАВАЙ ДОСВИДАНИЯ»

Мæскуыйы Гуырдзыстоны Патриарх Илья II-ыл балцы рæстæджы не 'мирон адæмы хаттæй чидæртæ кæй фембæлдысты æмæ йын Хуссар Ирыстон æмæ Абхазы фæстæмæ Гуырдзыстонимæ баиу кæныны тыххæй ныфсытæ кæй февæрдтой, уый стыр æнæразыдзинад равзæрын кодта нæ республикæйы адæммæ, 20 азы дæргъы гуырдзиаг фашистон режимы амæттæгты хицæуттæ æмæ хæстæджытæм.
Кæй зæгъын æй хъæуы, уыдоны æнæразыдзинад æмбæрстгонд у, уымæн æмæ нæма басур нæ зæхх нæ цардуарзаг лæппуты тугæрхæмттæй, нæма æруазыл сты сæ мард буæрттæ, афтæмæй нæ адæмæй разынд ахæм «зæрдæрис» адæймæгтæ - Лохты Артемы фæдонтæ - Дзассохашвили Гочайы хуызæттæ. Æниу Дзассохашвилийы хуызæттæ гуырдзиаджы хинæйдзаг мидбылхудтыл баивдзысты сæ ныййарæг мады дæр. Табу Хуыцауæн, ахæмтæ бирæ не сты. Уыдоны нæ нымайынц куыд ирон адæм, афтæ гуырдзиæгтæ дæр. Уымæн æмæ йæхи туг, стæг адæмыл чи нæ ауæрды, уый æндæрты дæр ауæй кæндзæн, уæйгæнджытæн та сæ цард æбæрæг вæййы, сæ фæндаг - цыбыр.
Ацы адæймæгтæ хуссарирыстойнаг адæмæн æппындæр ничи сты, æгæрыстæмæй, сæ знæгтæ рахонын дæр æвзаг нæ тасы, уыдон сты тæппуд уæйгæнджытæ. 20 азы дæргъы ирон адæм цы хъизæмайраджы цард кодтой, ууыл ахæм адæймæгтæ хъуыды дæр никуы кодтой, æнкъарынадыл та дзырд дæр нæй. Нæ уæззау царды нын æххуыс нæ, фæлæ ноджы цæлхдуртæ æвæрдтой нæ разы. Уыдоныл ирон дзыллæ хъуамæ бакæнид хъоды.
И.О.

* * *
Хуссар Ирыстоны адæммæ негативон реакци сæвзæрын кодта, Гуырдзыстоны Патриарх Илья II-ыл Мæскуыйы ирон диаспорæйы минæвæрттæ кæй фембæлдысты æмæ Хуссар Ирыстон æмæ Абхазы фæстæмæ Гуырдзыстоны скондмæ бакæныны хъуыддаджы баххуыс кæнынæй йын ирон адæмы номæй ныфсытæ кæй æвæрдтой, уый тыххæй цы информаци уыд, уый.
Æнæразыдзинад равдыстой æмæ хъусинæгтæ сарæзтой республикæйы паддзахадон æмæ æхсæ-надон организацитæ, афтæ ма политикон партитæ дæр, уыцы нымæцы, Адæмон парти, Компарти, парти Ног Ир, Иудзинад, Иууон Ирыстон, Рæстаг Ир, «Ирыстон-сæрибары фæзуат» æмæ æндæртæ.