Nog adres

НÆЙ НЫББАРÆН УÆЙГÆНДЖЫТÆН

Блиц-æрфарст: Илья II-æн Мæскуыйы фембæлд уыд Мæскуыйы цæрæг Гуырдзыстоны минæвæрттимæ, кæцыты 'хсæн уыдысты Мæскуыйаг ирон æхсæнады уæнгтæ - Торчынты Амырхан, Дзассохты Гоча æмæ Нугзар Журули. Цахæм комментаритæ ратдзыстут фембæлды фактæн æмæ ацы адæймæгты хъусынгæнинæгтæн, кæцытæ арæзт æрцыдысты ирон адæмы номæй, сæрамгондæй, «дыууæ адæмы 'хсæн раздæры хæлардзинад сæндидзын кæныны тыххæй, ирæттæ æмæ гуырдзиæгты 'хсæн цы æнæмбæрстдзинæдтæ уыдис, уыдонмæ æнæкæсгæйæ».

РХИ-йы Парламенты Сæрдар, Коммунистон партийы лидер Коцты Станислав: Фембæлд уыд хуымæтæг, уыдис ын хисæрмагонд характер. Æмæ йын уымæ гæсгæ уæлдай нысаниуæг нæ дæттын. Хуссар Ирыстоны адæмы интерестæ æвдисынц æмбæлон органтæ, ацы цауы парламент. Кæд æмæ чидæртæ хъарм, хæларадон уавæрты пъатæ кæнынц кæрæдзийы къухтæн, уæд уый махмæ нæ хауы. Уадз, уый уæд сæ цæсгомыл. Сæ хъусынгæ-нинагæн дæр ис хисæрмагонд характер, æмæ йын ирæттæм ницахæм ахаст ис, уымæн æмæ ирон тугæй ахуырст къухæн пъатæ кæнын у цыбырдзастдзинады нысан. Æмæ Илья II-æн иууыл хъармдæр ахастыты тыххæй дзурын, кæцытæ ирон адæм дарынц Гуырдзыстоны адæммæ - раст нæу. Мах æй зонæм, тугæй æвдылд къухтæн нæ апъа кæндзысты Хуссар Ирыстоны адæмы интерестæ æцæг æвдисджытæ. Гæнæн ис æмæ Илья II ферох кодта, æрæджыйы ивгъуыды нæм цахæм ахаст дардта, куыд сидт ирæтты марынмæ, уый, æлгъыста æрмæст, гуырдзиаджы чи амардта, уыцы гуырдзиæгты. Хуссар Ирыстоны къухдариуæгадæн ацы адæммæ æмæ ацы цаутæм ис иунысанон ахаст.
Цхуырбаты Мирæ, Республикæ Хуссар Ирыстоны Парламенты Сæрдары хæдивæг, национ политикæ, ахуырад, зонад, культурæ, дин æмæ дзыллон информацион фæрæзты фæдыл парламентон комитеты сæрдар:
Уый сусæггаг нæу, æмæ арæх Интернеты фыстытæ раст нæ вæййынц. Фæлæ кæд æмæ уыцы информаци, зæгъгæ, Торчынты А., Дзассохты Г., æмæ Журули Н. фембæлдысты Илья II æмæ йын йæ къух райстой, æмæ ма дзы домдтой, цæмæй сæ бафæдзæхса, уый раст у, уæд уый у ахæм рæстдзинад, кæцыйы мæн нæ бафæнддзæн нæ адæмы иунæг минæварæн дæр - нæдæр удæгасæн, нæдæр мардæн, нæдæр сылгоймагæн, нæдæр нæлгоймагæн, нæдæр æнахъомæн, нæдæр хистæрæн - никæмæн.
Илья II йæхи счъизи кодта куыд шовинист æмæ куыд гуырдзиаг фашизмы идеолог. Хуссар Ирыстоны уымæн алчидæр хъуыды кæны йæ шовинистон ныхæстæ. Уыцы ныхæстæн сæ бон нæу æмæ сын иумиагæй исты уа динимæ, æмæ уæлдайдæр та чырыстонадимæ, цыран уæлдæр миниуджытæй сæ иу у тæригъæддзинад. Илья II у уыцы католикос, уыцы чырыстон сауджын, кæцы 90-азты æмæ 2008 азы дæр хорзыл банымадта ирæтты ныхмæ дзуарджын стæр.
Æмæ кæд ацы адæмы уæлдæрзагъдгонд хицæн минæвæрттæ ахсджаигыл нымайынц, цæмæй райсой уыцы къух, кæцы хæцæнгарз ныддардта уырнынады тæккæ зæрдæмæ, уæд уыдонæн æнæнхъæлæджы ма уæд, сæ адæм сæ ныхмæ сæ зæронд æгъдау - хъоды куы райсой, ирон адæмы кады кодексмæ гæсгæ, уæд.
Гобозты Вячеслав, Социалистон парти «Фыдыбæстæ»-йы сæрдар, Хуссар Ирыстоны Папрламенты 1 æмæ Ш æрсидтыты депутат:
Æз ацы фембæлд нымайын æбуалгъ фактыл. Уыцы адæймагимæ фембæлд, кæцы у Хуссар Ирыстоны ныхмæ Гуырдзыстоны æппæт агрессивон ар-хайдтыты удон лидер æмæ фыд, кæцы хорзыл нымадта ирæтты скуынæг кæнын æмæ фæсурын сæ райгуырæн зæххæй, кæцы Хуссар Ирыстоны хоны æрмæстдæр Самачабло, мæнæн мæ бон у схонын æрмæстдæр Ирыстоны æмæ ирон адæмыл гадзарахатæй рацæуын.
Мæскуыйаг ирон диаспорæйы минæвæрттæ, кæцыты номæй дзырдтой ацы адæймæгтæ, хъуамæ саргъ кæной, цы æрцыди, уымæн.
Ацы адæймæгтæн иудзинадæй ницы ис Хуссар Ирыстонимæ, уыдонæн ничи радта бар ирон адæмы номæй дзурынæн. Гоча Дзассохашвилийы тыххæй та зæгъдзынæн афтæ, уый алыхатт дæр уыд, цæмæй Хуссар Ирыстон баззадаид Гуырдзыстоны сконды. Торчынты Амырханæн Хуссар Ирыстонимæ иудзинадæй ницы ис æмæ йын никуы уыд, афтæ Нугзар Журулийæн дæр.