Nog adres

Æнæниздзинад/ Зымæгон витаминтæ: баххуыс кæнæм иммунитетæн

vitamini_0.jpeg
Адæймагæн сæйраг у йе 'нæниздзинад бахъахъхъæнын. Райсомæй уæ бон нæу райхъал уат? Кофе дæр нал æххуыс кæны, цæмæй фæхъæлдзæг уат? Уæ организмæн хъæуы витаминтæй баххуыс кæнын, фæлæ кæм самал кæнæм зымæг витаминтæ?
Хъыгагæн, цыфæнды хорз зымæг ма уа, уæддæр адæймаджы организмæн нæ фаг кæны бирæ æнæмæнгхъæуæг буарадтæ. Нæ фаг кæны хуры хъарм, дыргътæ, халсæрттæ æмæ организмыл фæтых вæййынц вирусон низтæ, уазалдзыд.
Цæмæй фæхуыздæр кæнат хи æнкъарынад æмæ зæрдæйы уаг, афтæ ма баххуыс кæнат организмæн уымæй ныхмæ фæлæууа уазалдзыдæн æмæ вирустæн, уый тыххæй хæрды рацион сдзаджджын кæнын хъæуы витаминтæй. Организм хъæуæг витаминтæ исы хæрзгъæд æмæ пайдайаг хæринæгтæй, афтæ ма витаминты комплексæй. Хæрзгъæд хæрды продукттæ, халсæрттæ, дыргътæ зымæджы райдианы, витаминтæ æмæ минералты комплекс - зымæджы кæрон.

Цæхджын къабускæ: хъæздыг у С витаминæй. Къабускæ цæхджынгæнгæйæ цæхх къаддæр кæнын хъæуы, цæмæй дзы С витамин фылдæр баззайа.
Денджызон продукттæ: æнæмæнг сты зымæгон рационы. Уыдон сконды сты В æмæ РР къорды витаминтæ. Хъæздыг сты йод, кали, магни, натри æмæ æндæр элементтæй, кæ-цытæ æххуыс кæнынц, цæмæй иммунитет нормæйы уа.
Цъæх хъæдындз: бирæтæ сæхæдæг хæдзары æрзайын кæнынц цъæх хъæдындз. Хъæдындзы цъæх сыфтæ хъæздыг сты В1, В2, РР витаминтæй, афтæ ма С витаминæй.
Цитрусонтæ: Стыр нысаниуæг сын ис, С витамин сæ бирæ кæй ис уый тыххæй. Грейпфрут, лимон, мандарин, зындгонд сты аскорбины туагадæй, кæцы, кæй зæгъын æй хъæуы, тынг пайда у адæймагæн. Фæлæ дзы хæрын хъæуы, цас нæ фæнды, уыйас нæ, фæлæ бæрцæй. Ацы продуктты æгæр хæрд, гæнæн ис, расайа аллергион реакци.
Киви: Чемпион у йе 'сконды С витаминæй. Бон иу киви бахæрынæй баххæст кæндзыстут С витамины суткæйон нормæ. Кивийы ма ис В къорды витаминтæ дæр, афтæ ма минералон буарадтæ æмæ чырæгтæ.
Гранат: Хъæздыг у В къорды витаминтæй, афтæ ма С витаминæй æмæ аминотуагадтæй, минералон буарадтæй. Æххуыс у профилактикæ æмæ уазалдзыдæн, иммунитет бахъахъхъæнынæн. У хæрзад продукт, пайда дзы кæнынц кулинарийы. Алы бон дæр гæнæн ис æмæ пайда кæнæм гранатæй доны хуызы, хæринæгтимæ.
Цъæх цай: Цъæх цайы бирæ ис каротиноидтæ, аскорбины туагадтæ, В, К, РР къордаы витаминтæ, дубилон буарадтæ, аминотуагад, магни, æрхуы, марганец, селен, цинк æмæ хром. Цъæх цай у хорз антиоксидант æмæ æххуыс кæны организмæн инфекциты æмæ вирусты ныхмæ тохы. Авитаминозы æмæ гемоглобин ныллæг куы уа, уæд амонынц хæрдæй иу сахат размæ цъæх цай цымын чисмис æмæ курагæимæ.
Зæрдылдарын хъæуы уый, æнæнизæй цæрын уæ кæд фæнды уæд бахъахъхъæнут уæ нуæртты, стресты фæстæ уадиссаг нæ ахъаз кæнынц витаминтæ, къаддæр хæрут адджинæгтæ, сурвых кæнæ, фæздæгмæ чи сцæттæ ахæм хæринæгтæ. Архайут цæмæй пайда кæнат С витамин фылдæр кæм ис, ахæм продукттæй.
Кальци æмæ фосфор æнæмæнгхъæуæг у стджытæн æмæ уый тыххæй та организм ифтонг кæнын хъæуы Д (кальциферол) витаминæй. Сæрды хуры тынтæ дæр фаг сты, фæлæ зымæджы организм ацы витамин исы сойаг, æхсыр æмæ кæсаджы сойæ.
Æнæниз мын ут!