Nog adres

МИКРОРАЙОН ЛÆВÆРД ÆРЦЫД ГОРÆТЫ АДМИНИСТРАЦИМÆ

moskov.jpg
Республикæ Хуссар Ирыстоны Хицауады Сæрдар Хуыгаты Ростикы сæргълæудæй уагъд æрцыд «Мæскуыйаг» микрорайоны цæрæнуат дих кæныны фæдыл къамисы уæнгты кæронбæттæн рабадт. Хуыгаты Ростикы ныхæстæм гæсгæ, ацы къамис, кæцыйы сæргъ лæууы Владимир Ушаков, хæдзæрттæ лæвæрд цыдысты æнæзакъонæй.
«Хæдзæрттæ æнæзакъонæй лæвæрд кæй цыдысты, уый у, закъонхалыны нысан. Уыдонæн нæ уыди фатертæ дих кæныны æххæст бартæ. Зæгъæн ис æмæ ацы къамис цы сарæзта, уымæн хатдзæгтæ нæй. Кæй зæгъын æй хъæуы, бирæтæм дзы м æцæгæй дæр æмбæлдис хæдзæрттæ»,- банысан кодта Хуыгаты Ростик.
Нæ республикæйы Генералон прокуроры хæдивæг Битеты Сергей куыд банысан кодта, афтæмæй «Мæскуыйаг» микрорайоны горæт Цхинвалы администраци йæ балансмæ райста.
«Æз нымайын афтæ, æмæ цæрæнуат дихкæныны фæдыл æппæт документаци хъæуы горæты администрацимæ радтын, уадз, æмæ уыдон бабæрæг кæной алы хæдзар, алы фатер дæр. Уадз, æмæ горæты администрацийы цæрæнуатон къамис йæ рабадты æркæсæд, цæрæнуат раст дих æрцыд æви нæ, уымæ, æмæ уый фæстæ фехъусын кæнæд тæрхондонон органтæм дæр. Мах райстам уынаффæ, цæмæй дих цы цæрæнуат æрцыд, уый нымад æрцæуа æнæзакъоныл»,- банысан кодта Битеты Сергей.

Йæ ныхæстæм гæсгæ, уыдонæн бар нæй, цæмæй зилой алы фатертыл æмæ фæрсой цæрджыты, чи сын радта фатертæ æмæ дзы чи цæры.
«Абон «Мæскуыйаг» микрорайон ист æрцыд горæт Цхинвалы администрацийы балансмæ, ома, хæдзæртты хицау у горæты администраци. Горæты администраци хæсджын у, цæмæй фатерты кæнæ коттеджты цæрджытимæ бадзырдтæ сараза. Махæн нæ бон нæу тæрхондонмæ бахъаст кæнын, уыдонмæ иунæг документ дæр кæй нæй, уымæ гæсгæ. Цæрæнуатон къамис хъуамæ бацæуа уыцы хæдзæрттæм æмæ бабæрæг кæна, чи сæ цæры, уыдон закъонмæ гæсгæ æви æнæзакъонæй цæрыц, уый, æмæ администрацимæ æххæст информаци куы уа, уæд гæнæн уыдзæн тæрхондонмæ хъаст бадæттынæн дæр».
Ацы фарстайы фæдыл къамисы уæнгтæй алчидæр загъта йæ хъуыды æмæ иумиаг хъæлæсæппæрстмæ гæсгæ аскъуыддзаг кодтой, цæмæй къамис цы документтæ æрæмбырд кодта, уыдон лæвæрд æрцæуой горæты администрацимæ.
КОКАЙТЫ Зæринæ