Nog adres

ЦÆГАТ ИРЫСТОНЫ

ИРЫСТОН РАЙСТА ФЫЦЦАГ ЛИГЪДÆТТЫ СИРИЙÆ

Ацы бонты Ирыстоны зæххыл сæ къах æрæвæрдтой ирон лигъдæтты фыццаг фæлтæр Сирийæ. Уымæ цалдæр мæй цæттæ кодта Дзæуджыхъæуы Сирийы лигъдæтты фæдыл оперативон штаб хицауады сæрдар Тæкъоты Сергейы разамындæй. Уыцы рæстæджы мидæг визæтæ æмæ æнæмæнгхъæугæ документтæ кæмæн скодтой, уыдон сты 62 адæймаджы, уыдонæй уал æрцыдысты Æлбегаты бинонтæ фондзæй. Уыдон сфæнд кодтой, мидхæсты азарæй чи ныппырх æмæ æдасæй цæрæн кæм нал ис, уыцы бæстæй фæлидзын æмæ Ирыстоны сæ фыдызæххыл æрцæрын.
Лигъдæттыл æртæ чъири æмæ бæгæныйы кæхцимæ Кæсæг æмæ Ирыстоны арæныл сæмбæлдысты Национ хъуыддæгты фæдыл министрады æмæ Стыр Ныхасы бæрнон кусджытæ æмæ сæ тынг сбуц кодтой. Бинонты хистæр Æлбегаты Сухейл тæлмацгæнæджы æххуысæй куыд радзырдта, афтæмæй сæ хæдзар Дамаскы бынтондæр ныппырх, æдзух дзы цæуы хæстытæ, горæттæн сæ фылдæр хай сты дæрæн, ирæттæн бастдзинад нал ис кæрæдзиимæ, ахæм уавæрты уым баззайын у тынг тæссаг æмæ, æппынфæстаг, бирæ фыдæбæтты фæстæ сæмбæлдысты, сæ уидæгтæ кæм сты, уыцы историон бæстæйы.

Лигъдæтты фыццаг фæлтæр æрбынат кодтой, Æрхонкæйы сын рагацау кæй æрцæттæ кодтой, эмигрантты уыцы рæстæгмæ цæрæн Центры. Министрады бæрнон кусæг Цæллагты Артур куыд банысан кодта, афтæмæй лигъдæттæн Центры уыд æртæ мæйы лæвар цæрыны барлæвæрд, фæлæ сæ документтæ рæстæгыл кæй не срæвдз сты, уый тыххæй дзы дыууæ мæй ацыд, бар ма сын ис иу мæй паддзахады хардзæй цæрынæн, стæй дарддæр цы уыдзæн, уый цард равдисдзæн.
Хæстæг рæстæджы Ирыстоныл сæмбæлдзысты лигъдæтты дыккаг фæлтæр, стæй æртыккаг...
Визæтæ цы 62 адæймагæн æрцыд конд, уыдон уæлдай ма кæд бахъæуа, уæд арæзт æрцæудзæн оперативон штабы, сагъæссаг æндæр хъуыддаг у: дарддæр та куыд? Уыдон бынтондæр хъавынц ам баззайынмæ, уый та нысан кæны уыдон цæрæнбынæттæй сифтонг кæнын, æмæ нæ ихсыд, цæрæнбонты лигъдæтты проблемæтæй йæ хъуырмæ чи у æмæ сæ абон дæр чи нæ аскъуыддзаг кодта, уыцы республикæ цы сараздзæн, уый бæрæг нæма у. Уыимæ ма Сирийы ирæттæй се ‘взаг зонынц иуæй-иу активисттæ, иннæтæ йæ æмбаргæ дæр нæ кæнынц, нæ зонынц уырыссагау дæр. Ахæм уавæрты куысты бынæттыл дзурæн дæр куыд ис? Сирийы ирон лигъдæттæн æдасдзинады уавæртæ саразын æмæ, сæ фыдызæххыл цæмæй сæмбæлой, ууыл бацархайдта Сирийы ирон диаспорæйы сæрдар Æлбегаты Хишам. Уый æдзух бастдзинад дары Ирыстонимæ æмæ бæрæг кæны лигъдæтты уавæр. Куыд фехъусын кодта, афтæмæй лигъдæтты стыр хай та аивылд Туркмæ. Уый та сириаг ирæттæн Ирыстоны фæстæ у сæ дыккаг райгуырæн бæстæ æмæ сæ ныфс ис сæ бынат дзы кæй ссардзысты.

«ÆХСÆРДЗÆН" ЙÆ КУЫСТ КÆНЫ»

Дзæуджыхъæуы Центрон библиотекæйы филиалы йæ радон æмбырд ауагъта литературон къорд «Æхсæрдзæн». Ныхас дзы цыд, боны фæткы цы фарстатæ уыд, уыдоныл: библиотекæ æмæ чиныгкæсæджы ахастдзинæдтæ æмæ журналист Хозиты Барисы уацхъуыд «Москва слезам не верит»-ы тыххæй. Уац кæд цалдæр азы размæ фыст æрцыд, уæддæр актуалон у абон дæр.
Ныхас дзы цæуы кæстæр фæлтæр фысджыты цæрæнбонты размæ кæй ничи уадзы æмæ дæлдзиныг кæй цæуынц, хистæр кары фысджытæ "нæй нæм кæстæртæ" дзурын йедтæмæ кæй ницы зонынц, уый тыххæй. Уый фæдыл сæ хъуыдытæ загътой къорды уæнгтæ Хозиты Барис, Хадыхъаты Фатимæ, Тъехты Тамерлан æмæ иннæтæ. Барис куыд банысан кодта, афтæмæй университеты ирон факультеты бирæ ис, литературæмæ йе ‘ргом чи здахы, ахæм фæсивæд, уæдæ фæстаг азты рауагъдонтæй дæр бирæ ис, сфæлдыстадон куысты бæрæг къахдзæфтæ чи акодта, ахæмтæ. Уыдон сты Баситы Зæлинæ, Дзуццаты Зæлинæ, Касаты Аслан, Гасанты Валери æмæ бирæ æндæртæ.
Уыдонæн æххуысгæнæг куы нæ уа, уæд сабыргай сæ зæрдæйы цæхæр бамынæг уыдзæн. Хозийы фырт ма куыд загъта, афтæмæй бацархайдта, фæсивæдæн æрвылазон литературон конкурс аразын, ныридæгæн иу хатт уыд. Ныр та баныхас кодта культурæйы министр Хæбæлаты Фатимæимæ, цæмæй скæной фæсивæдон преми ирон литературæйæ æмæ уыцы фæндон фæцыд министры зæрдæмæ æмæ баныфсæвæрдта уыцы хъуыддаг царды ауадзынæй. Хуыздæр уацмыстæн преми лæвæрд цæудзæн дыууæ азы иу хатт, архайдзысты дзы 15 - 35 азы кармæ.
Æмбырды кæрон къорды уæнгтæ бауынафæ кодтой фæсивæдон газет «Слово»-йы мæй иу хатт сæрмагонд фарс цæттæ кæнын сæхи уацмыстæй, уыимæ рæстæгæй-рæстæгмæ фæсивæды фыст уацмыстæ бацæттæ кæнын æмæ сæ хицæн рубрикæимæ рауадзын. Фæстæдæр, кæд къухы бафта, уæд сæрмагонд, мæй иу хатт чи цæуа, ахæм литературон газет уадзын. Литературон къорд «Æхсæрдзæн»-ы радон фембæлд уыдзæн февралы кæрон. Уæд алчидæр æрбахæсдзæн йæ фыст уацмыстæ æмæ сын равзардзысты сæ хуыздæрты, уыдон та мыхуыр æрцæудзысты «Слово»-йы сæрмагонд фарсыл.
Нæ уацх.