Nog adres

Сфидар кодтой фæлхасгæнджыты фæткойтæ

24 январы премьер-министр Хуыгаты Ростикы сæрдариуæгадæй цы рабадт ауагъдæуыд, уым райст æрцыд Республикæ Хуссар Ирыстоны Закъоны проект «Архайды хицæн хуызты лицензи кæныны тыххæй» Республикæ Хуссар Ирыстоны Закъонмæ ивындзинæдтæ бахæссыны тыххæй».
Ацы фарсты фæдыл раныхас кодта Хъалонтæ æмæ æмбырдты фæдыл комитеты сæрдар Плиты Руслан.
«Ацы закъоны проектмæ ивындзинæдты бахæссыны æнæмæнгхъæуындзинад сæвзæрд, этилон спирт, алкоголь æмæ алкоголь цы продукцийы ис, уыдон уадзын æмæ сæ уæй кæныны фæдыл архайд лицензи кæныны фæдыл Уагæвæрды проектыл кæй кусæм, уый тыххæй», - бамбарын кодта Плийы фырт.

Уый йæ ныхасмæ бафтыдта, зæгъгæ, ивындзинæдтæ сæрмагондæй хауынц закъоны статьятæй иумæ, кæцыйы дзырд цæуы, лицензи райсыны тыххæй цы документтæ бадæттын хъæуы лицензион органмæ, ууыл.
«Ацы уагæвæрдмæ гæсгæ лицензион органмæ лицензи райсыны тыххæй цы документтæ дæттын хъæуы, уыцы номхыгъд баххæст кæнын хъæуы», - загъта докладгæнæг.
Закъоны проектыл куы бауынаффæ кодтой, уый фæстæ йæ министрты кабинет райста æмхъæлæсæй.
Уый фæстæ фарстаты пакет уынаффæмæ рахаста РХИ-йы Фæлхасгæнджыты æмæ адæймаджы хæрзиуæгон цард бахъахъхъæныны сферæйы хъусдарды комитеты сæрдар Коцты Маринæ. Уый фæндон бахаста, цæмæй фидар æрцæуой республикæйы хицæн товарты уæй кæныны, цардуагон лæггæдты, туристон продукт реализаци кæныны фæдыл лæггæдты фæткойтæ, афтæ ма хуызæгтæм гæсгæ товартæ уæй кæныны фæткойтæ.
«Ацы фæткойтæ сты фæлхасгæнджыты бартæ бахъахъхъæныны тыххæй закъоны дæлзакъонон акттæ æмæ сæ æнæмæнг райсын хъæуы уый тыххæй, цæмæй закъон куса æххæстбæрцæй», - бамбарын кодта Коцты Маринæ.
Æмбырды хайадисджытæ уынаффæ рахастой ацы фæткойтæ сфидар кæныны тыххæй.
Æрæмбырдуæвджытæ ма уынаффæ кодтой, цæмæй «Хурзæрин»-ы территорийыл цы зæххы фадыг æмæ арæзтадон объекттæ ис, уыдон лæвæрд æрцæуой Цхинвалы администрацийы оперативон управленимæ. Хицауады уæнгты фылдæр хайы хъуыдымæ гæсгæ, территориалон административон арæн фæивыны фарстатыл уынаффæгæнæн нæй, республикæйы Генералон план фидаргонд куынæ уа, уæд. Загъдæуыд ахæм фæндæттæ, зæгъгæ, «Хурзæрин» лæвæрд æрцæуæд Цхинвалы районмæ.
Уымæ гæсгæ Хуыгаты Ростик банысан кодта, зæгъгæ, фарст серьезон у, æмæ цалынмæ скъуыддзаг æрцæуа, уæдмæ уал ыл лæмбынæг ахъуыды хъæуы.
Хицауады Сæрдар Паддзахадон мулчы комитет æмæ Юстицийы министрады къухдариуæггæнджыты бæрны бакодта, цæмæй ацы фарстыл ноджыдæр бакусой цымыдисгæнæг фæрстимæ.
Хицауады уæнгтæ ма уынаффæ кодтой республикæйы петербургаг компани Гом акционерон æхсæнады «ВТК групп»-ы фæтк æмæ куысты механизмыл.
Паддзахадон мулчы æмæ зæххы ахастыты комитеты сæрдар Пæррæстаты Сергей æмбырды хайадисджытæн фехъусын кодта, зæгъгæ, ацы акционерон æхсæнад фæнд кæны йæ инвестицитæ Хуссар Ирыстоны экономикæмæ бахæссын, республикæйы хуыйæн куыстуат саразгæйæ.
«Уый тыххæй семæ саразын хъæуы инвестицион бадзырд», - бамбарын кодта Пæррæстаты Сергей.
Æмбырды нысан æрцыд, зæгъгæ, ацы фарстыл хъæуы уæлæмхас бакусын æмæ скъуыддзаг æрцыд, цæмæй уыцы нысанæн ауагъдæуа сæрмагонд æмбырд.